YMA leh MZP an ṭawng chhuak dawn em?

Tun hmaa Mizo­ramin harsatna lian tham kan tawh apianga che chhuak zar zar ṭhin YMA leh MZP hian tun hnai-ah beisei an phak lo ta fo hian rilru chhungril hi a rukin a tibuai ṭhin.

YMA inrawlhna tur ngeia ka ngaihah pawh hian an ngawi reng ta ṭhin a, hnam issue kan tih tak tak chinah pawh hian kan MZP te an reh ta duak mai hi i dawn ve ngai em?

Tun hnaiah khan Lengpui-ah kan Airport neih chhun chu a chim rup mai tih kan hria a ni. Lengpui Airport kha lei min vanga chim a ni lo a, lir a nghin vang a ni hek lo; a sak a chhiat vang liau liaua chim a ni.

Kan infrastruc­ture lian ṭha leh ropui sak a chim rup kha political party lam bengchhenna tawk lekah em ni kan MZP leh YMA hian an ngaih? Kha thil kha politics ni lovin hnam thil, kan ram leh hnam tana rotling tur chhe taka siam a nih vang a ni si a, ram leh hnam humhalh a ngai a ni - Lengpui Airport lamah hian.

Tun hnaiah Class I Contractor list thar a lo chhuak a, Mizo mipuite pânah chingal min tat lui tih turin Lengpui Airport Contractor chu Class I Con­tractor tharah hlan kai a ni tlat. Pu Kamrul-a hi a hmaa a sak chim vang tal pawha lo paih rih awm, a nih loh pawhin amah pawh inthlahrungin, "Tun hnaiah ka hming­chhe si a, YMA leh MZP te thikthu pawh a chhia ang a, nakin deuhah min promote rawh u," a tih tura ngaih a nih laiin contractor, a hma lawka hming­chhe tak chu Class I Contractor a ni leh ta vu a nih chu!

Hei hi kan MZP leh YMA hian an thlir liam mai mai a nih chuan kum 2023 inthlan hma hian MZP leh YMA aṭang hian candidate an nih em loh pawhin an ngawih hmiah chhan hi mipuiin kan la hmu lovang tih pawh a sawi theih tawh loh. Chutiang em ni tur chuan ka ring phal bawk si lo.

Kan hnam chhan a ngaih hun leh kan ramin humhalh a mamawh hun takah hian rawn ṭawng chhuak se an pawl zahawmna atan pawh a ṭha dawn si.

- Marema Chhakchhuak