BJP ka hlau lo, Hindutva ka hlau

Mi ṭhenkhat chuan India rama roreltu BJP hi kan hmu sakawlh deuh ṭhin a, a ṭhenin kan hmu Setan a, a ṭhenin kan political party-ah kan pawm nghet tlat thung. BJP hi kei chuan an hlauhawmna ka la hmu ve lova, a ken tel Hindutva politics hi chu ka hlau ngang mai a, hei hi kan thliar hran thiam pawh a ṭhat ka ring.

Tuna India Prime Minister ni ta Naren­dra Modi hi Hindu sakhaw vuantu ruh­kawl a ni a, tun hmain Gujarat Chief Minister a nihlaiin Muslim tam tak thihnaa mawhphurtu pakhata puh a ni a, thubuaite pawh a nei zak zak a ni. Kum 2002-a Gujarat Riots an tih maia Muslim mi 700 chuang thihnaah khan Modi hi a hming­chhe tawh hle a, hei hi Hindu chawi lar a duh vang a ni.

Tun hnaiah India rama state lian ber Uttar Pradesh-ah BJP chuan India ram barakhaihin rorelna an chang ta a, BJP-in UP-a rorelna an lak ai maha miin mak an tih zawk chu Chief Minister an ruat dan hi a ni. Chief Minister atana hming langsar tak takte an hnawl hnuah Hindu puithiam, “India ram hi Hindu ram a nih hma chu theihtawp ka chhuah zel ang,” titu Yogi Adityanath chu an ruat mauh mai.

UP-a Chief Minis­ter ni tura BJP lamin Yogi Adityanath an ruat chhan hi a fin vang te, a thiam vang te, mipuiin an duh vangte lam aiin India ram state lian bera Hindu sakhaw vawrh lar zel a, chuta ṭanga India ram hmun danga Hindu sakhaw vuak len zel a tumna a ni. He pa hian Hindu pawl, Hindu Yuva Vahini leh Gorakhnath Math-te hmang ṭangkaiin ke a pen chho zel a, tunah chuan India rama mi thiltithei ber pawl a lo ni ta hial a ni.

Yogi hian tun hmain ṭawngkam firfiak tak tak a lo hmang tawh ṭhin. Hman kum, kum 2014-ah mai khan "If they take one Hindu girl, we will take 100 Muslims girls," tiin Hindu tana a inpekna leh sakhaw dang a huatzia a tilang.

Heti khawpa Hin­du sakhaw chawi lar tum a, midangte hnawk ti em emtu hi BJP lama a vawn fung chelhtu an nih avang hian, ‘development’ tih kawra hmang hian a chhungah Hindutva hi an fûn ang a, a kawr an tuamna a mawi si ang a, Mizo Kris­tian-te hian kan lo lawm huam huam ang a, a tawpah paih bo theih tawh lovin an Hindutva chu kan kawl fur lo ang tih a sawi theih tawh loh.

India hmarchhaka BJP kaihhruaia poli­tical party inzawm khawm pawla an tel avangin kan ‘hnam movement’ kengtu intite chu an hawi sang mek a ni si!

- Lalremliana Khiangte