INTIHLAL NGAWL VEI

Maharashtra-a Osmanabad Lok Sabha bial MP, Shiv Sena mi, Ravindra Gaikwad (56) chuan thla hlui ni 23 velah khan Air India thlawhnaa thawk pa pakhat, kum 60 mi chu kut a thlak chiam mai a, vaiho duh loh ber mai chiin a pheikhawkin vawi 25 vel a vua a, thlawhna kailawn aṭanga nam thlâk te a tum niin a sawi. A chhan bul chu Business Class ticket (a man to, a nuam chi) nei chunga mi dang zinga Economy Class-a chuantir a nih vang niin an sawi a, a chuanna thlawhnaah hian Business Class a awm miau loh avangin tih ngaihna a awm si lo! A thinrim chu an ṭum hnuah pawh a chhuk duh lova, chhuk tura va hrilhtu chu kut a thlâk ta a ni awm e. A lal lutuk a, thil awm lote nen lam a ngèn a, a mualpho ta a ni.

Air India (AI) Chairman-cum-Managing Director (CMD), Ashwani Lohani-a'n a lo hriat chuan a sa phat mai rëng a, ani hi Mechanical Engineer, 1980 batch Indian Railways Service officer a ni a, Indian Tourism Development Corporation CMD pawh lo ni tawh, officer thianghlim leh hmingṭha a ni a. AI CMD a nih hnuah pawh a hmaa mite anga amah leh a chhungte tana free ticket vawi khat mah la hmang lo, rela zin fo, thlawhnaa a zin ve pawha ṭumhmuna lal taka lo dawnsawn pawh duh lo chi a lo ni si. He MP chêt dan a hriat rual hian AI thlawhnaa chuang ve tawh lo tura a tih bâkah private airline 5 pawh a hmin nghal a, he MP ticket lâk sa pawh cancel nghal a ni a, airline dangah an hnar zel bawk si a, a buai bechhe ta mai rëng a ni.

2015 November thla pawh khan AI CMD hna a chelh aṭanga thla thumah YSR Congress MP, Mithun Reddy chuan a chhungte hruaiin Boarding Gate khar hnuah kal tlang luih a tum a, an phal tawh loh avangin MP hian Tirupati ṭumhmuna AI Station Manager chu a béng a, Ashwani hian MP hi a mantir hmiah tawh bawk. Hemi ṭum leh tun ṭumah pawh Aviation Minister, Ashok Gajapathi Raju chuan CMD hi a ṭan tlat zel a, an buai fe zel a ni. Tunah pawh hian Gaikwad-a hian Minister hnenah thupha chawina a thawn a, tihnawn tawh loh a tiam bawk a, an ngaidam ta hram a ni.

Khawi khawiah emaw hian intihlal lutuk avanga dan leh tihdan phung palzùt hnial lo leh, intihtheih nana hmang zawk mah hi an awm fo a, dan hmanga roreltu, Judge te pawh an bäng lo. Thlawhnaa an chuanin an ṭum veleh Court sanga Judge-te chu VIP lounge-ah hruai nghal an ni a, an bungrua pawh mi dangin an buaipui vek a. Kum 2012 khan High Court Judge intilal lutuk chuan a ṭhutna chunga a Cabin baggage khai chhuak turin pawn lama Protocol Officer chu a beisei pek a, thlawhna lamin luh an remti si lo a, Judge chu a thinrim ta. A áng buan buan mai a, thlawhna officer pakhat walkie-talkie pawh a ben thlâksak hial a ni. Nikumah khan Bombay HC Judge pa­khat­in Rajasthan HC Judge pakhat chu lehkha a thawn a, a fapa chawlh hmang tur thlen nan VIP suite leh VIP light vuahna car lo ruahman turin a ti pek a, a mualpho hnuah a ziahsaktu officer chuan, 'Judge tan hetiang lehkha hi a hma lawkin ka ziak a, a fapa zinna tur chungchang ka ziah hian a thu ka lo siam ṭhat theihnghilh' a ti!

Intihlal hi inthîk leh inen­tawn a awl khawp mai lehnghal a, phu ve chiah lo pawhin ngam zawngte chunga tih ve chiam awl tak a ni. Kum 2013 khan Supreme Court ukil lar tak, Harish Salve chuan Delhi-a Tees Hazari Court Judge pakhat lehkha, Punjab-a an khaw hlui a tlawh huna VVIP ang chiaha lo sawngbawl a, pilot leh escort car nena lo ruahman tura Punjab DGP a hrilhna a lek velh velh mai a, SC bench hnenah a pe lût ta a nih kha. Hetah pawh 'Ka sawn darh vek mai tur che u a nia.... Tongkolong ... tih te hi a ri leh vuai vuai ṭhin a. Kan tih lutuka dan kalh deuh reuha kan chêt phei chuan sorkar kutke dangte thinrimna berhbu hi Gaikwad-a ang mai hian kan tawng baw ve ang a, dawl zawrin kan zawr ve thei tih hriat a ṭha.

Tuna AI CMD pawh hian ITDC CMD a nih laiin Tourism Minister of State, Vinod Khan­na kha Janpath Hotel aṭanga chaw a laktir ṭhin man, cheng nuai tléma zawng a ṭhing pek a, Minister hi a phun ngam miah lo an tih kha. Bawrhsap leh BDO vel hnena, 'mi 50 tan zanriah lo buatsaih ula' tih fote hi a hrisel lo thei! Bawrhsap pakhat pawhin lal chaw man tur a awm loh thu a sawi ngam, an tihte kha ka beng chhe ri em maw ni!?

- RK Lianzuala