CM hoin AR nawr chhuak ang

Hmanni khan Mizoram sorkar hotute leh Assam Rifles hotute'n Aizawl khawpui laili aṭanga Zokhawsanga Assam Rifles insawn dan tur bawk chief minister Zoramthanga hoin an sawi ho leh tih news lamah kan lo hmu a ni.

Aizawl khawpui laili aṭanga AR ho insawn hun hi, hman hman aṭanga kan lo beisei tawh. A chhan chu tuna kan CM Pu Raman MNF an sorkar hunah AR an sawn chhuah vat dawn thu a sawi tawh ṭhin avang khan CM laiin a sawi hi thu dik ni turah ka lo ngai ve a ni.

MNF chu an sorkar a, Pu Rama sawi ang chuan AR chu an awm duh ta tlat lo. Tuna kan CM in AR ho insawn chhuah hun tur nia a sawi kha a pel daih tawh.

Hetiang taka Pu Rama thusawi a thleng dik thei ta lo hi mipui tan pawh a tlawmngaih thlak a, kan CM ve laiin AR ho insawn tura a sawi leh a nawr fo tawh hnuah pawh an awm hmun an sawn duh mia hlo mai hi a Mizo mipui ang pawhin thil zahthlak lutuk.

A chhan chu AR ho insawnna tur Zokhawsanga hmun­hma chei­bàwlnaah Mizoram sorkarin a tih tur angte a ti vek tawh a, chuti chung chuan Assam Rifles-te chu an la insawn lo chu a ni phawt mai a. Hetianga kan ram hruaitu lu berin dawt a sawi phah fo takah chuan AR ho hi mimal tak pawhin ka hua a, kan CM an ti thangtlawm lutuk te hi ka rilru a lo na ve a ni.

Sorkar thuchhuah, kum 2019-a Ministry of Home Affairs (MHA)-in Assam Rifles insawn thuai tura lehkha a rawn thawn tawh hnua thlamuang takin kan khawpui laili ah an la awm khup mai a, heti taka kan hotupa kan CM an zah lo leh an ngai pawimawh lo hi Mizo mipui tan pawh a zahthlak a ni.

Dan bawh­chhiat­na pawh ni rawh se, heti taka kan CM an zah loh avang hian Mizo mipui hian CM hoin kawng zawh ila. AR ho an awmna tur dik taka an kal bo vat theih nan CM in hma hruai se, chaw ngheiin AR gate bulah sawn nawrh i huaihawt ila. CM Pu Rama kaihza veng turin Mizo mipui, party ang ni loin i kal khawm bawk ang u.

- K. Lalchaka