Ka sual atan ka tlantuin ama thisen min pe
Isaia 53:05- "Nimahsela ani chu kan bawhchhiatnate avangin hliamin a awm a, kan khawlohnate avangin vuak thitlinin a awm a; kan thlamuanna tura thununna chu a chungah a tla a; a vuakna vualtea tihdamin kan awm ta."
He hla Isaac Watts (1674-1748) phuah 'Ka sual atan ka Tlantuin, Ama thisen min pe (Kristian Hla bu no 216) tih kan sak apiang hian ka rilru ngaihtuahna hian nasa takin Lal Isua min hmangaihzia hi ka ngaihtuah a, ka tlin lohzia leh ka sualzia ka hmu chiang em em ṭhin. A thu leh a thluk hrim hrim hian min hneh a, ka thlarau nun chau tak hi a tichak thar fo ṭhin.
Ka sual nasa tak, keimah maia ka siam ṭhat theih tawh loh chu Lal Isua hian siamṭhat a ngaihdam a nih theih nan a thisen min pe a. Keimah mai ni loin keimah ang chiaha mi sualte tan Kraws-ah khenbehin a awm a nih kha, a va ropui em!
Lal Isu, nangin i thisen hlu tak sengin min tlan tawh a, nghet taka nangmah ringtu nih ka duh a. I awmna Vana Vantirkoh sang tamtak te'n an fak ban theih loh lai che pawhin, kei misual tak, chak lo leh tlu fo ṭhin, ṭawmkailo hi khawngaih takin min hre ve reng ang che.
Kraws chungah khan natna, mualphona tawpkhawk leh hmuhsitna tawpkhawk kha ka tan i tuar a nih kha - kei misual ngaihdam a ka awm theihna turin. Min hmangaihzia hi amak ka ti lutuk a, ka ngaihtuah seng lo a, ka ngaihtuah thiam lo a, ka phu hlawl si lo a, ka mittui hi a tla tawp mai a ni.
Ka tana i thih lai khan khawvel hian hreawm a ti em em a. Ni eng takngial pawhin a sun che a, a enna a chhuah thei lo a nih kha. Kei misual tana i hreawm tawrh nasa lutuk hliahkhuh tur khan chhum te pawh an zing a nih kha. Isu, min va hmangaih em!
Misual boral mai mai tur ka ni chung pawha min hmangaih tlat avang hian i bulah ka lo kal lo thei lo a, insit tak chungin chibai ka buk lo thei lo che, I nunna hial hlanin min hmangaih si a. Ka lawm em em a, ka sawi thiam si lo a, ka hril thiam hek lo. Ka lawm lutuk avanga ka bianga mittui luang hi khawngaihin min pawmsak mai ang che aw?
Khawvel thil lungkhamin lungngai ila, engmah a sawt dawn lo. Chung chuan chawlhna leh hahdamna min pe thei dawn lo tih ka hria. Chuvangin, tling lo leh chak lo tak chungin, ka nunna leh ka nihna ang angin, ka rilru bawlhhlawh tak hi ka pe tawp mai che a. Insitin tling miah lo mah ila thil dang ka ti thei chuang si lo a, khawngaih takin nangin min nei mai ang che.
A tawp nan hei hi ka sawi leh ang- I thisen hlu tak sengin min tlan a, nghet taka nangmah ring tlat turin min pui ang che. Kei chu heti mai hi ka ni a, i rilru ka tina fo a, i thu ka zawm reng thei lo. Ka hnawl che a, ka ti zak che a, ka kalsan ṭhin che. Mahse Vana Vantirhkoh sang tam takte'n an fak ban theih loh lai che pawh hian kei mi sual tak hi khawngaih takin min hre reng ang che aw?
- Rinfela Zadeng