Helicopter service chhe lutuk

Mizoramah kum 2/3 aṭang khan Aizawl leh district hrang hrangah helicopter a service a, engemaw chen chu a tluang viau a, mahse tunlai hian khawchin zir loh vang pawh ni lo, technical problem tih chhuanlam hmangin flight cancell a tam hle.

Mipuiin an ring a, motor-a nileng kal ṭhin kha minute 20 lek lekah an thlawk thleng zung zung a, mipui pawhin an ṭangkai pui hle a ni. Mipui rawngbawlna a nih hriain Mizoram sorkar pawhin hek huamin mipui tan copter hi a service tir a ni a, chu chu mipui pawhin kan hriat a ngai. Hetianga sorkar malsawmna kan dawng hi a lawmawm takzet a ni.

Amaherawhchu, Pawan Hans hian an helicopter hman mek, Mizoram chhunga a service tir hi a ṭawng deuh mah mah tawh niin a lang. Keini mimawl ngaihah pawh han en reng reng leh han chuan hian a hlui deuh tawh niin hriat a, service tir rau rau-ah hei aia ṭha deuh zawk, technical problem awm fo lo tur hi service tir thei se a duhawm ngawt mai.

Tunhnai maiah pawh khaw chhiat vanga service loh a awm nual a, khaw ṭhat hnuah pawh a khawl lam fel loh vangin cancell a tam hle. Aviation department lam pawhin theihtawp chhuah mahse Pawan Hans lam hian ṭan an lak ve a ngai a, thuneitu lam pawhin hei hi bawhzui a ngai ta hle a ni.

Mipuiin awlsam taka zin veivah nan kan mamawh a, nikhat lek khawl lam chian loh vanga cancell nghah chuan vui vai a awm lem lo. Ni 2/3 nghah thlawn a awm ta fo hi hriatthiam a har a, a ṭha lo ngawt mai. Damlo phurh nan copter service hi a ṭangkai em em a, mahse khawl lam fel loh vanga thlawh theih loh a tam ta riau hi a dik lo ngawt mai. State danga Pawan Hans copter service hi eng ang tak ni ve ang maw?

Chief Minister pawh Teikhang-ah programme pawi­mawh neiin copter hmanga lehlan a tum a, mahse copter khawlin a zir loh vangin a ṭhulh ṭhak nghe nghe a, a zia lo ngawt mai. Chuvangin, hotu lian lam hian Pawan Hans hotute hi ngen ngawl deuh se, hei aia copter ṭha leh rintlak zawk service rawn pe thei se a duhawm ngawt mai.

Chetsualna rap­thlak a thlen hma leh, mipui tana ṭangkai zawka an awm theih nan a ni e.

- Lalkhirhvela