SEDP FAKSELNA

Mizoram Opposition Party lian ber MNF Party chuan sorkar chelh mektu Congress Party Policy NLUP leh NEDP aia ṭha an tih SEDP puan tur an neih chu an puang ta a. Tuna an puan chin hi an Program/ Project hman tur (Manifesto) ni hrih lovin, an Party Policy (Economic Policy) ni berin a lang. Nakum 2018 Assembly inthlan hunah MNF hian a tlinpui theih tur khawpin a ṭha dawn nge dawn lo, ngaihtuah zui atan tunah hian SEDP fakselna chu tlem a zawng, tarlang dawn ila:

SEDP fakna lam

1. SEDP hian a thil tum/ duh ber (vision pawh ti ila) chu Employment Oriented Production Economy din ni berin a lang a, chu mi awmzia chu ‘thawhchhuah tipung vak vak thei tura employment siam ṭeuh ṭhin’ kan tihsak thei ang. He thil tum hi Zoramin a mamawh pawimawh ber zinga mi a ni reng mai a. Hmasawnna bung thar kai ṭulna lai tak pawh a ni. Amaherawhchu, election mahifesto a la ni chiah lovin, engtiangin nge hnathawh an tum a la tarlan tel rih loh avang hian fak zawm thuina tur a vang rih a. Eng pawh nise, an thil tum leh an thil duh hi chu tuna Mizoram dinhmun tawn mek atan hi chuan a pawimawhna chu phat rual a ni lo.

2. CROP Insurance leh Price Support siam an tum hi Central Sorkar leh State dang te pawhin an lo hman ṭhin a ni a. Mizorama kut hnathawktute, a bikin lo neih lama eizawngte tan chuan thil lawmawm ni thei tur an ni. Crop insurance hi ‘thlai lu man,’ kan thlai chinten tawh sual an tawh palh hlauha lukhawng nei tura dahkhamna siamna ti ila a dik khat ang a. NCIP (National Crop Insurance Programme) te emaw, sorkar laipuiin Prime Minister Crop Insurance Scheme a duan thar anga in ṭanpui dan hman ve tumna a ni thei. Tin, price support hi thlai chingtuten a hralhna lama an hlawk ve theih nan ṭanpuina a ni. PSS (Price Support Scheme) leh MSP (Minimum support Price) te chu Central leh State sorkarten an hman ṭhin a ni ber a. State sorkarin a ngaih pawimawh dan a zirin budget a khung tel danin kawngro a su thui thei hle dawn a ni. ZNP Pu Duhawman ‘D A H’ a tih fo ang kha a ni ber ang chu.

3. Unemployment Allowance siam tum hi a ṭha danglam hle thei ang. State ṭhenkhat (State 7 vel) ah pawh inthlan dawna hetiang allowance pek tiam te leh hmang tawh state-te an lo awm tawh hial a. Mizoramah hian Employment Exchange a in register mi sang li sang nga vel hi Cl-X/ Cl-XII chunglam hnenah emaw SEDP hian pek nise a ti dawn pawh a ni mai thei.

4. Zu khap tumna hi thil ṭha tak, ‘Pathian leh kan ram tan’ titu Party tan chuan Policy pawimawh tak a neih awm reng a ni. A chhan chu Pathian thu bu Bible hian zu sak, zawrh leh ruih ṭhin te hi a ṭhat lohzia a sawi tam em em a ni. Chu bakah kan rama zu a zalen chuan chhungkaw tam tak leh khawtlang hian kan tawrhna a nasat turzia mipui hian kan hre vek awm e.

5. Cheng vaibelchhe sang zet mai mipuite hamṭhatna tur SEDP enkawl nan hman a inhuam danah hian MNF (SEDP) hian ram hmasawnna kawng ṭha a ngaipawimawh hle dawn niin a lang. A hman dan a dik phawt chuan Mizoram hian a changkan phahin a ṭhan duan phah theih ngei a rinawm.

SEDP selna lam

1. SEDP hi MNF hian a duhthu a samna niin a hmuh theih. Employment siam ṭeuh leh buh bal tharchhuah ṭeuh a tumna te hi sap hovin ‘Wishful Thinking, Day Dreams Fly’ an tih ang deuha duhthusam thlawk bo leh mai ṭhin a nih theih dan a awm. Entirnan, inthlan hmasak dawn lai te khan MNF President hian mau chin uar leh leilet siam uar ṭhat turzia a sawi tawh ṭhin a, mah se, Zoram leilung hmun zaa hmun hnih thum vel chauhah leilet a siam theih a. Chu bakah leilet hmun nei ve lo mipui 98% vel lai kan ni si a, chuvangin, mipui tam ber chuan kan tel ve theih lohna tur tih hriain kan bengkhawn nep phah a ni. Chutiang tho chuan mau hi, India rama a nei tam ber state nimah ila, Mizoram hmun 5 or 6 a hmun khat emaw bakah an ṭhang ṭha ngai lova, chuvangin, mipui zaa sawmriat vel tan chuan phur pui tak tak a harsa a. Buh thar chhuah ṭeuh chu Zoram mipui hian ṭha ti vek mah ila kan ram hmun dangte chhawr ṭangkai dan tur leh mipui tam ber 80/ 90% te hamṭhatna tur thleng phak Policy ni tawk lovah a ngaih theih a ni.

2. Chhung tin hnena employment siam tumna hi thil lawmawm tak ni mahse, hun hmasa lamah pawh, ‘kan ti ang’ tia Party hrang hrang hotuten an sawi ṭhin, tih leh tak loh mipui hian kan hre ṭeuh mai. Chuvangin, he employment siam tumna MNF Party Policy-a awm hi inthlan dawn hnaih emaw, an Manifesto siama an telh dan turin kawngro a su dawn chauh niin a rinawm. Chu pawh chu eng tianga enkawl tur nge, NEDP anga Department kutah nge Party kutah nge PPP Mode-in nge scheme dangte tih hriat hnuah kan la zir thei dawn chauh a ni. Policy-a inziak leh sawi ngawt chu mipui hian ‘men-ah thlak’ mai turah kan ngaih a rinawm.

3. Crop Insurance leh Price Support te hi kuthnathawktute, a bikin lo neih lama eizawngtute tan chuan thil duhawm ni thei tur ni mahse, sorkarin a enkawl zui dan a dik tawk loh chuan NLUP semnaah Party mi duhsakna a awm nasa ṭhin ang chauh kha a ni thei dawn a. Ṭhenawm khawvengte inrel sep sep leh in huphurhna thlen theitu tur, kan moral tichhe theitu a ni thei dawn tlat. A enkawl dan tur ṭha tak leh budget-a sum dah ngei a nih dan tur te hriat chian phawt loh chuan sawi mawi vak chi niin a lang lo.

4. Unemployment Allowance hi thil tih tur ṭha tak a nih hmel a. Mahse, a dawng theitu tur hi tu te nge, a tehfung (criteria) felfai tak leh pek zat turte siam a nih loh chuan inthikna, induhsakna, leh NLUP sem ang a ni thei dawn. Tamil Nadu-ah chuan HSLC Rs. 300, Graduate Rs. 375, Post Graduate 450 zelin mi 25303 hnenah; Assam-ah Rs. 500 pm mi 5460 hnenah; Haryana-ah HSLC Rs.1000, Graduate 1500, Post Graduate 2000pm zelin mi 1700 hnenah chauh pek an ni. Tin, Pu Modi-a 2017 Budget hian mirethei hna nei lo mi maktaduaih 200 vel hnenah cheng 1500 pm ṭheuh pe turin cheng vaibelchhe nuai 3 vel ṭul tur hi a tih chi/ tih theih dawn em tih tunah hian an zir mek a ni awm a. Mizoram mipui let 30/40 a tam state te pawhin mi tlemte hnenah chauh an pe thei a. Keini State rethei ber leh sum ba ngah ve em em tan chuan hetiang allowance pek hi Nuthuri zuam ngawt loa fimkhur taka ngaihtuah a ngai ve ngei dawn ngawt mai.

5. Construction Corporation din tumna pawh hi thil ṭha tak tur ni mah se, eng ang corporation nge a nih dawn, Party mi te hamṭhat bikna tur nge mipui tan tih leh a inenkawl dan tur te hriat chian phawt loh chuan han sawi mawi hluah chi a ni bikin a rinawm loh.

Price Support hi State ṭhenkhawt chuan hmang ṭha thawkhat pawh nise Mizoramah hi chuan ‘thu va’uk’ maia a chan a hlauhawm thei tlat. A chhan chu a enkawl dan tur scheme ṭha tak leh hlawhtlin pui ngei ngei tur chi Party-in a neih phawt loh chuan ram mipui hian mipui bum tumna, vote zawnna Tactic chi khatah kan ngai mai thei a ni. A thuhrimin Price Support Scheme hi Class 9 &10 te pawh zir ṭha hleithei lova retheite hnenah Post Matric Scholarship a awm thu sawi mawi ang chauh a nihna a awm. Lo leh thlai hmun enkawl ṭha thei lo chhungkaw rethei tan chuan hralh tur khawp thlai tharchhuah a harsa ṭhin a. Mi hausa zawk, thlai hmun te enkawl nana hlawhfa chhawr thei chhungkuaten price support hi lo ṭhat pui thei pawh nise, chhungkaw rethei zual Zoram mipui 30% vel emaw tan chuan chhawr ṭangkai ve harsa em em tur, rualawh tina zualtuah a ṭang thei dawn tih hriat a ṭha ang.

Kan sawi tawh ang khan SEDP hi Mizoramin kan mamawh ber ber, employment leh buh leh thlai thawh chhuah tih pun tum lam a ni. Tin, ZNP pawhin Policy pui bera a neih ṭhin, thlai thar leina tur budget-a DAH a tih ṭhin pawh he SEDP hian ṭawngkam dang, price support hming hmangin a telh bawk a. Tin, Unemployment Allowance, Crop Insurance leh Construction Corporation leh a dangte pawh policy a telh hi thil ṭha tak an ni ngei mai. Amaherawhchu, policy-a awmte ‘kan ti ang’ tih ringawt hi Zoram mipui hian rin ngam har kan ti tawh. Mipui duhzawng ni awm policy ṭha tak sawi tlawr thiam te chu ngaiah kan nei tawh a. A pawimawh lai ber policy enkawl dan tur ṭha leh rin ngam a nih si loh chuan NLUP anga mipui tam tak tivui leh tibeidawngtu an ni thei dawn.

He SEDP pawh hi tuna policy an sawi dan chin hian lo hmang pawh ni ila leilet neitu chhungkaw tlemte, construction lama thawk mi tlem te, Unemployment Allowance dawng thei tur tlem leh thlai hralh tham thar chhuak thei chhungkaw engemawzat tan chuan a lawmawm thawkhat maithei. Mahse, mipui tam zawk, a bikin chhungkaw harsate tan chuan kan ṭangkaipui vena tur hriatthiam a harsa rih dawnin alang. Production and employment siam belhna projects ṭha leh enkawl (implement) dan tur rintlak takte puan belh tur an la nei a nih erawh chuan NLUP/ NEDP ai pawha ṭha zawk, ‘Chepa a ah Vahrit’ a lo ni thei mial mahna!?

- H. Lalhmachhhuana (Zobawm)