Good Friday

Good Friday kan lo thleng leh dawn ta a, eng ang chiaha hlu nge a nih tih hi i ngaihtuah thar leh teh ang u.

'Good' tih chu 'ṭha' tihna a ni mai a... tichuan, good friday tih chu 'zirtawpni

ṭha' tihna a ni leh mai a. An lo vuah thiam/ fuh hle mai, ti rawh u? A ṭhatna êm êm chu Isua Kristan kan sualte Krawsa min tihthihsakna ni a ni tlat mai a. Zirtawpni ṭha tih loh rual a ni lo. Pu Kamlala chuan tihian hla a lo phuah a nih kha... "Ranthleng leh thing anchhedawng leh vana lallukhum a inzawm" tiin. Nun kan neihna turin Bethlehem (ranthleng) a pian ringawt kha a la tawk mai lova, thing anchhedawng kraws kha a thlen ngei ngei a ngai tlat mai. Chuti a nih loh chuan vana lallukhum a hlawh chhuah theih tlat loh a ni. Chumi avang chuan he ni, Good Friday hi ringtute tan chuan kan ni pawimawh êm êm a lo ni ta a nih chu.

Pastor Liangkhaia chuan tihian hlain a lo phuah chhuak a, "Aw ka thlarau, chu tlangah chuan chhun zanin va leng fo la, i LALPA kraws lera awm chu nungin i va hmu ang" tiin. Kraws lera Isua krista khan kan aia a thih thu, nungin min lo hrilh dawn a lo nih chu. "Nung turin nitin kan thi ang a" tih hla leh Paula'n nitin ka thi ṭhin (I Kor. 15:31), a lo tih angin, vawiin Good Friday a lo thlen hian i thi thar leh ang u.

Mombati pawh êng chhuak reng tur chuan a sathau a ral zêl a ngai angin, sual kan thihsan zêlnaah keimahniah Krista êng chu a lo êng zêl dâwn a ni. Chuti ni lova sual kan thihsan phal loh chuan krista êng chu a lang chhuak thei miah lovang.

Kan Lal Isuan a lo sawi "Buhfang leia a tlaka, a thih zet loh chuan a mal chauhin a awm reng ṭhin. A thih erawh chuan tam takin a rah ṭhin" a lo tih angin khawvêl sual kan thihsan phal phawt chuan nun duhawm leh nun chhenfakawm (abundent life) kan lo nei mai dâwn a ni. Paula'n Korinth mite hnêna a sawi "Nangni chu Pathian thlawhhma in ni" a lo tih angin, ringtute hi thlawhhma, thlawhfai rêng ngai kan ni a. Thlawhhma pawh a fai ṭhat poh leh thlai a ṭha ting angin, keini pawh sual laka kan fai ṭhat poh leh keimahniah Krista hmêl chu a lang chhuak tam ting mai dâwn a lo ni.

He ni lawmawm tak a lo thlen hian, a tharin i thi leh ila, tichuan kan tan zirtawpni ṭhatna tak tak chu a takin kan lo tem thar leh thei dâwn a ni. Chu chu chunglam min duhdân pawh a ni e.

Khawvêl sual thihsan tûrin i duhthlanna chiah kha a pawimawh ber chu a ni. Kan tihthih theih loh, Eden natna ‘original sin’ an lo tih, kan nihna sual, nu chhul aṭanga kan pian chhuahpui (sual) kan van kaina daltu, kan tihthih ngawt theih si loh chu Krawsah he zirtawpni hian tihthih/ tihhlum a lo ni tawh a. Amaherawhchu, vawiina keimahnia sual awm ve thung (sual chambang) erawh hi chu, ama chakna ringa nitina kan do ve tur atãn, thlân kan thlen thlenga awm reng tûr zâwk a lo ni.

Han sawi nawn leh ila, Mizo ka nihna (ka identity) ka sim thei lo ang hian, ka van kaina daltu lian tak, sual thlah/ setana fa ka nihna hi ka tithi ngawt thei lova. Chu tak chu krawsa kan Lal Isua thihpui tâk chiah pawh kha a ni rêng a ni. Tichuan, ka nihna sual, vân ka kaina daltu ber, ka duhthlannaa ka tihthih ngawt theih loh chu Isuan krawsah min lo tihthih sak ta a nih chu. Halleluiah! Good friday hi a lo va'n hlu teh reng êm!

Amaherawhchu, tuna kei­mah­nia sual chambang, la awm ve thung erawh hi chu, nitina kan thihsan a ngai ve thung dâwn tawh a ni. Tichuan, indona chawl tawh lo tûr chu nitin thlân kan thlen hma loh chuan kan hmachhawn reng tawh zawk dâwn a lo ni. Thia i inhlan apiangin nungin a inpuang zêl ang. Good Friday tak tak i han hmang thar leh ang u le.

- Evan. R.Lalvenhima