KAN THEUNEU LO

Mi dang, mi hran sawi loin kan mi thiam, kan sawrkar hnathawk, kan chhuanvâwrte hi han thlir ila.

Photogapher - thlalak mawi tak tak min hluitu, an thluak leh an idea a ṭha, khawvela thlalak thiam tak takte nena inel tâwk thial thial te pawh an awm âwm e.

News corres­pondent/ journalist/ copy-pasters - rang tak taka social net­work chi tinrenga chanchin pawimawh, a dik leh dik loh pawh fianfiah lêm loa min hluitu, kan beng tivartute, lâwm thu hrilh kan va ba nasa tak! Ti r’u?

Author/ transla-tor/ literary editor - mi ril tak tak, hring­nun chawm thei thu ṭha tinreng chhawp chhuaktute an awm a, chu bakah vitamin A-Z min barh hawng hawng thei khawpa fiamthu thiam te leh... a lehlin lam thiamte pawh hi sawi hmaih phal rual an ni nem le! Ti raw, lênghermawi?

Hetiang ti tura hun âwl ngah a ngaihzia chu lehkhabu chhuah­tute zâwt mai rawh.

Online game khelhna hun atana office hour lo chu hmang thiam lo, office bân hnua ṭhalai pâwl leh khawtlang thila a kûl a tâia inhmang leh thei khawpa taima, thilphal leh hawihhâwm, ṭhalai pawl chhawm nungtu ban rinawm tak tak, an sualna sawi tur vâng tak, mi ram gamer-te el pha khawpa game khelh thiamte hi kan ngah; mahse, intihtheihpui lutuk loh tur. Talent dang nei an la tam, kan sawi sêng lo ang, mahni hna ni miah loah, hlawh pakhat mah nei loin khitiang khian hmasâwnna kawngah Zofate min pênpui a nia, an va hlu em! An talent a ṭha, an theuneu lo; kan chhuang a ni, i hlim ang u, anmahni fakin.

Mahse, an hna an thawk ṭha em? Kan hre lo; an thawk ṭha ang, an taima alawm. Taima lo se kan sawi tâkte khi chuti maia thiam theih a ni lo a, chuti maia puitlin theih thil a ni lo. Office hour-ah khitiang an tui zâwng thil khi an ti ṭhin em? Kan sawi thei lo; an ti duh lo tawp ang; endiktu an awm kher loh pawhin office te chu ṭan hun dik takah an thleng a, ban hunah tak an hawsan leh chauh ṭhin alawm.

Politician kan sêl, minister kan rêl, director zawng zawng March 31-ah kan ringhlel; eng kawngah mah kan ram rethei hi hma min sawnpui lo nîa kan hriat mai bâkah, ram siamna tur sum tichingpentute niin kan hre tlat.

An ni ngêi em tih kan sawi thei lo; a chhan chu, kan hre lo a ni. An hnuaia thawk (a chunga kan sawi tak)-te erawh chuan, ram an enkawlna lamah kut benna tur a awm lêm lo a nih pawhin kawng dangah kan ramah thang an chhuah a, hma min sâwnpui a. Fak an va ṭûl em ve! An va fak tlak êm ve!

- Rempuia R. Lûtmâng