Taxi switch off khuahkhirh a ṭul
Aizawl khawpuiah taxi service ṭhahnem tak a awm a, khawpui dang aiin a rate a sang lawr lak a, chuti chung chuan kawng chhuk hlekah engine tinung loin switch off-in an tlan deuh vek a ni ber. Kawng chhuk tak takah pawh brake chauh hmangin an tlan ṭhin a, a him lo lutuk tih hriat a ṭha.
Hmanni lawkah kawng chhuk lutuk tak maiah taxi pakhat switch off-in a tlan thla a, a chhuk em avangin a brake-in a zo ta lo a, kan thawhpui Adawnga leh a fanu Tluangtluangi kawngsira lo ding chu na takin a su a, naupang pawisawi loin a nunna hlu tak a hloh phah kha a ni a, a pawi tawpkhawk a ni. Kha taxi khan engine nungin, gear lianin tlan se brake-in a zo lutuk dawn a, engine a off miau avangin a brake sa tawh lutuk kha a ding zo ta lo a nih hmel.
Aizawl khawpui taxi service reng reng hi a rate a sang hle a, rate sang taka an tlan chung pawhin an petrol ren hian switch off-in kawng chhuk hlekah chuan an tlan a, traffic flow pawh a timuangin, traffic an tijam nasa hle a ni. Vaivakawn chhuk Temple aṭanga kawng tluanin switch an off a, tlan pelh dawna pelh hleih theih si lohin. Lirthei tlan a timuang tia inthlahrunna nei lek si lo, hawihhawmna awm map loin taxi driver tam zawk an service ṭhin.
Motor vehicle Act-in a phal loh zingah switch off a tlan hi a ni. Dan a awm a, a lekkawhtu an awm tur a ni a, chu dan lekkawh tur chu traffic police an ni. Hmanni khan Aizawl Traffic SP chuan thuchhuah a siam thar leh nghal a, heng dan bawhchhia an mante chu dan ang taka hrem zel nise tuman an zawm lo ngam lo ang. Passenger-te pawhin man chawiin taxi kan hire tih hriat a, off chunga an tlan phal loh ngam a ngai ta khawp mai.
Tuna Aizawl taxi tam zawk hi Maruti 800 a ni tlangpui a, heng motor hi power brake leh power steering a nih loh vangin kawng chhukah chuan engine nung loin a tlan theih viau a, oil ren deuh tan chuan a remchang phian a ni. Mahse chhuk deuh dek dekah hnung lama lirthei switch off-a tlan ve theih loh, engine nung renga tlan ngai an timuang hle ṭhin.
Chuvangin, dan lehkawhtuhte hian lirthei khalhtute chungah khawng zawkin hma han la teh se. Dan bawhchhe na na na chu tuman kan ṭan ngai lo a, traffic police-te kan sawisel dawn lo. Lirthei hlui tawh lutuk ang chi phei chu mipui tan a him lo a, check uluk zual teh se.
City bus hlui lutuk tawh service pawh an tam ta. Lirthei hlui lutuk hman hian accident tam zawk a thlen a hlauhawm tak zet zet a ni. Heng city bus pawh hi uluk zawkin enfiah a ṭha hle ang. Chhiatna rapthlak dang a thlen hma hian.
- Lal Rinmawia