1. Hmasawnna ruhrel pawimawh chu kawngpui ṭha neih a ni. 
2. Kawngpui ṭha kan nei dawn a nih pawhin environment tichhe lo thei ang bera ruahmanna siam tur a ni. 
3. Kan harsatna tawh mek erawh chu tlangram, hilly terrain kan nih miau avangin kawrtê tam tak aṭanga tuihawk kal hian luipui a fin seng sung a. A tawpah luipuiah a luang lut lo thei lo ve tho. A man pek ve a ngai. (Kan lui lianten an tawrh ve a ngai tihna)
4. Fur laiin lei laih (earth cutting) tihtir loh hi a ṭha ber. Lei min a siam tam a, tuihawk leh sabereka khuangkaih a siam hnem. Ṭhal lai, wor­king season-ah chhun leh zan hna thawk se a ṭha ber. 
5. Chu pawh chu kan ram angah chuan hna thawh theih hun a tlem a, ruahtui a tam si a. Kawngpui ṭha kan duh ve tho si a - Inhnialna a lian thei khawp ang. 
6. Highway ṭha pangngai chhim leh hmar, chhak leh thlang tan tlang zawnga kan neih thluah mai hi a ngai bawk a ni. Mahse, PMGSY kawng tam tak erawh hi chuan kan ramngaw ṭha a ṭhiat nasa viau mai - a thinrim thlak tlat.
7. Kan ram hi kawng pengṭhuam (crossroad) ah kan ding a. Hmasawnna duhin kan tuihal a, mi state CM ṭha te kan awt a. Hmasawnna nei tur chuan a man kan pek ve a ngai si a. Kan environment kan ui bawk si a. Duhtlanna hi pahnih chiah a awm thei - kan nih ang ang hian awm mai ila, hma­sawnna pawh awm chuang lo se. Environment te hi humhalh ang u, tiin kan rilru kan siam mai dawn em ni ang? 
8. Kan ram kawng­pui ṭha siam hna kal muah muah mai hi Act East Policy tihpuitlinna compo­nent pakhat a ni si a. Central sorkar hi a hmanhmawhin a che rum rum mai a. Mizote min hmangaih vang leh MNF sorkarin a nawr chhuah lam pawh a ni bawk si lo. 
9. Keini lam lah chuan kan ram rawn paltlang se, a theihna apiangah compen­sation uchuak takin lo sawk thla ila tih hi kan intihsiakna a ni bawk si.
10. Ram hma­ngaih­na leh neitu nihna nen kan ram hi enkawl a hun a ta viau a ni. Sustainable development kan tih hian environ­ment tichhe lova hma­sawnna ngelnghet siam hi a tum bulpui ber a ni si a. 
- Joseph L Ralte