Chhiatna laka inrin lawk a ngai

Kum a lo vei ve zel a, nipui kan hmang mek a, chutihlai chuan fur kan lo hnaih leh ta hle mai. Fur pui lo thleng tur hi chhiatna rapthlak a thlen loh nan lo inrin lawk a ngai khawp mai.

Aizawl khawpui hi a mi cheng kan tamin a ni telin bawhtu an pung zel a, hmun rem leh rem lo pawh sawi loin, kham bengberekah te in kan sa a, a chhakah eng in nge awm a, tui luankawr a ṭha em tih pawh kan ngaihtuah meuh lo. In kan sa mawp a, kan luah leh tawp mai a nih ber hi.

Building rit pui pui sate lah hian a thlan lam tana hlauhawm leh hlauhawm loh pawh kan ngaihtuah lo a ni ber a, in ṭha tak an sak a, an luah theih chuan an duh­tawk hle ni tur a ni. A him leh him loh te, a chhehvela awmte tan a him leh him loh ngaihtuah lek loa insa kan pung zel zawng a nih hi.

Aizawl khawpui hi plan mumal a awm lo tih hai rual a ni lo a, tuihawk luankawr mumal taka siam a tam lo em em bawk si. Motor kawng lah in kan sak hnuah a remchang lai laiah kan rek mai mai bawk si. Luikawr kamah rem leh rem loa insak a tam a, leimin mai thei dinhmunah hmun tam tak chu a ding a ni.

Khawi ramah pawh khawpui kan bawh vek a, Aizawl pawh bawhtu an tam a, hmun awl awm hauh loin building kan sa khat ṭhup mai si a. Lir hi chhete pawh nghing se kan mang lo ang tih a sawi theih loh. Hetianga khawpui plan mumal lo takah hian kan la chapo ve em em a, nei ber thawkin kan thaw a, kan hma lam hun thim si zia hi hai rual a ni lo.

Lirnghing lo thleng thut se lo inven dan turte zirtirna pek a awm fo a, mahse hei hi a tak tak thleng ta se a keini ang tlangram chhengchhiaah hian a awmzia a awm vak hmel loh. Kan chenna hmun hi a awih ropui mai si a, building rit pui pui kan sa ngir khup mai bawk si.

Lir na deuh nghing se a muala mualin kan chim rum rum mai dawn tih a chiang reng. Lirnghing kalkawng kan la ni leh nghal vei nen.

Mi neinung leh remhre deuh chuan khawpui daifem remchangah chenna insak an intihhmuh mek a, hei hi a fin­thlak ngawt mai. Khawpui chep leh kham kara chen ai chuan chhiatrupna, lirnghing na tak lo thleng ta se eng­emawchen chu an him ngei ang.

Chuvangin, fur pui lo thlen hma hian tuihawk luankawr ṭha neih te, insakna hmun a him leh him lohte ngaihtuah chunga kan khawsak a ngai ta hle mai.

- Lalkhirhvela