Health Care sum hi an chiah puam leh em ni?
Mizoram sorkarin Mizo mipui health care titute hnena an damloh changa an inenkawlna bill a peksak tur pawisa chu tunah hian nuai tam tak a tangkhang a, mipui damlote inenkawlna pawisa pe lettu tur sorkarin a pek theih loh avanga mangang tak tak an tam hle a ni.
Mizoram State Health Care Scheme chungchangah hian, Mizoram Pradesh Congress Committee chuan Mizoram Chief Minister Pu Zoramthanga chu dâwt sawiah an puh a, June 2022 chhung ngeia thupha cháwi turin an phût hial a ni. Damlote inenkawlna Bill pek theih loh hi cheng nuai 600 chuang zet nia sawi a ni a, heti zat pawisa hi chu bank ah pawh dah pung dawn ila, hun reilote chhungin hmannia sorkarin a man sak tak grape wine zawng zawng leina daih te kha chu kan hlep awlsam ngawt ang le.
Heti a nih chuan Mizoram State Health Care Scheme sum, mipui damlote inenkawlna bill sorkarin a bat sak pawisa hi tlanbo pui kher pawh a ngai lo a. Car thar tuak nan emaw insakna atan pawh ni se awlsam tea sum tuak nan khawiah emaw dah pung ta ila a va hlawk thlak dawn em.
Hman deuh, MNF sorkar lai tho khan health care pawisa hi sorkara thiltithei fal deuh fate khan an lo dah pung tawh bawk nia sawi a awm a. Kei phei chuan ka lo hre ve hauh lo a, mi sawi ka hriat chhawn mai a ni a, mahse dawt thuthang erawh chu a ni tlat lo.
Mizoram Health Care Scheme pawisa chingpen hmasa zawk kha cheng vaibelchhe 10 lai mai nia sawi a ni a, kha pawisa kha Bajaj Allianz ah te dah a ni a, a ṭhen Fortune Plus etc ah te an dah a ni awm a. Minister hlui chhung leh khat, vua leh vangte hminga dah leh official te hminga dah a awm a ni awm a, kei chu ram dangah ka awm vangin ka ui lem lo a; mahse Mizo mipui damlo mangangte tawrhna kha pawi ka ti a ni. Tin, keini Kristiante hian sum tihchingpen te hi kan hlau ta miah lo mai a, a pawi ṭhin mai.
Damlote inenkawlna senso pek letna tur sum hi mipuiin an thawh tawh bakah sorkarin eng emaw zat a dah ve bawk a, chumi pung aṭang leh thil dang aṭangin sorkarin damlo inenkawna bill a pe chhuak ve tur tih a ni. Tunah hian MHSCS-a sum dahtu nih inchuhin kan political party lam lah chu an inhnial a. Chutihlaiin mipui chu health care aṭanga sum hmu thei loin an buai mek a, a manganthlak luih luih viau a ni. Ram dangte hian an hre tam ang tih hlauhawm khawpin a zahthlak bawk.
Health care sumah hian Congress party chuan CM hi dawt sawiah an puh a, RTI Act hmanga zawhna chhannaa a lan danin Congress hian an sorkar hunlaiin pawisa an dah ngei niin a lang a, kan CM hian an dah loh thu a sawi thung a, thudik lo sawi zawk chu an awm ngei tih a lang - inhnial hi kan thlen chin chu a ni hrih phawt.
Kan political party lamin sum thawhtu nih an inchuh laiin mipuiin sum dawn tur an nei lo a, cheng nuai 6,000 chuang damlo inenkawlna man sorkar hian a ba mêk a, a tuartu chu mipui an ni si a, pawisa pek chhuah vat dan zawn hi sorkarin a tih hmasa ber tur chu a ni. Chumi zawhah pawisa hi tu dah nge tih te, thil ti dik lotu pawh hrem ni se.
- Vohbika Pa