Tunlai hian Mizoramah ruihhlo a tam leh tawh lutuk an tia, Mizo mipuite kan mangang deuh ruai ni hian ka hria a. He thil hi thil hlauhawm tak a nih avangin ram leh hnam tana chhiatna pawi thui tak thlen thei a ni a, Mizo mipuiten kan do dawn nge ruihhlo leh thil ṭha lo dotu tur sorkar mi leh sate hian an do dawn le? 
Kei ka lo ngaih ve dan chuan kan sorkar chak takin hlawh neiin police tam tak a ruai a, Excise te pawhin ruihhlo chu an do ve ngei mai. Amaherawhchu tuna ruihhlo kan tih deuh bik hi chu, zu leh heroin, AP kan tih mai te hi an ni hlawm a, hetiang ruihhlo dotu tur hi chu police kan ngah ve thawkhat a ni. 
Tunah hian sorkar hian ruihhlo do tur hian SRS/ YMA a ngen leh deuh ni ang dawna ngaih theihin chanchinbu lamah te pawh kan lo hmu leh tlat mai a. Hetianga sorkar berin ruihhlo do tum lo ni awm taka tlawmngai pawl a pur leh nia ngaih theiha thu a sawi ta mai hian min ti beidawng hle a ni. 
Tun thla tir khan kan Home minister Lalchamliana chuan, Central YMA-te'n Supply Reduction Service (SRS) dina ruihhlo do beihpui an thlâk kha a hlâwk hle thu leh, CYMA leh SRS-in ruihhlo an do dan ang kha tunah hian Mizoramin a mamawh hlea a hriat thu a sawi tih chanchinbuah kan lo hmu a. Khatiang kha a hlawk lo chu a ni hauh lo ang, mahse hlawh pawh nei loa tlawmngai pawl pawhin a tih theih chu hlawh tam tak nei zawk kan police force te hian eng vangin nge an tih theih loh tih hi ka zawhna lian ber chu a ni e. 
Kohhhran te YMA te tel lo pawh hian sorkar hian ram chu ṭha takin a kaihruai thei tur a ni a, chu­tianga a tih theih loh chuan sorkar chu a hlawhchham chiang viau a ni mai. 
Home minister khan, CYMA-te'n SRS dinin, ruihhlo do beihpui an thlak khan ruihhlo donaah Police, Excise leh Assam Rifles-te a pui tih a sawi a, a dik ang. 
Miin ram hma­ngaiha hma a lak chuan rah ṭha a chhuah dawn tih a chiang viau. Chutiang chiah chuan kan sorkar chak tak pawh hian ram hmangaihna nen ruihhlo hi do ve se zawng, khawiah nge rah ṭha a chhuah loh bik ang ni? 
Hmana kan ruih­hlo do anga do leh kha tunah hian kan mamawh. Koh­hran leh páwl hrang hrang hian ruih­hlo hi do ila. Sorkar mi leh sa te hi a kula taia ruihhlo dotu tur dik tak chu an ni a, kan dah awl thiang lo e. 
- Pekhlua, Durtlang