SAKHUA LEH POLITICS A INSU TA EM NI?

Tunlai kan ram boruak thlir hian Pathian thu leh ram rorelna a insu ta mai emaw tih tur a ni a. Hetiang boruakah hian mi tam tak kan chi-ai a, chu chuan a ṭha lam aiin a chhe zawngin min nghawng mêk a, siam dik thuai a nih loh chuan kan hmabâk chu a thim khawp ang.

Mizo nih a nawmna leh kan inchhuan fona chu sakhaw khat vuan ‘Kristian’ kan nih vang a ni. Mizote hi Chanchin Ṭha hmanga Pathian zawnchhuah kan ni a, kum 2011 chhiarpuiah za zela 87 kan ni. Chu chuan inunauna ṭha a siam. Dik takin Kristianna hian min phuarkhawm tlat a. Inhre ngai reng reng lote pawh ‘Krista-ah’ kan inthlung khawm tlat a. Taksa, rilru leh thlarau lam ṭhanlenna leh hmasawnna turin Bible zirtirna thuhmun kan dawng a. Kan inrem loh chângin Krista hmingin kan inngaidam a, a hlu em em a ni. Kan tlawmngai pawlte pawh Kristian nundân ṭha chawikâng tura dinte an ni hlawm. Rorelna pawh Pathian hnenah kan hlân hmasa zel ṭhin. Kan ram hruaitu turin Kristian mi ṭha te kan thlang chhuak bawk a. Annin Pathian râwn chungin ram an kaihruai ṭhin. Hetiang taka mizote min phuarkhawmtu Pathian leh a thu hi kan bosal hun hunah kan darh ang.

Tam tak chuan sakhua leh ram rorelna chu thil hrang a ni a, kal hrang ve ve rawh se kan ti mai thei. Ngaihtuah chian chuan thil hlauhawm tak a ni. Kan chhiatna tur hriltu ber a ni ang. Ram rorel nâna zui tlâk, belhchiandawl awm chhun chu Pathian thu chauh a ni. Bible zirtirna mil ram dân kan neih zêl a ?ul. Zêp tur a awm lo; zu zawrh leh zu in hi Bible duh loh a ni. A nghawng pawh chhe tak a ni a, Kristian state loah pawh an buaipui mêk a ni vek mai. Kan buaipui dân a inang lo mai a ni zâwk. Kan ramah chuan zu zawrh leh zu in zalentir loh hi Pathian thu kan zui dân tur a ni ang.

Kan ram hruaitute hi ṭha tak vek an ni a, duh taka kan thlan chhuahte pawh an ni. Amaherawhchu, mihring hian lalna leh thuneihna a chan hian amah siamtu leh malsawmtu chu a theihnghilh thei a, Pathian duh dan aiin ama ngaihdan a dah lal zawk thei. Dik takin, malsawmtu theihnghilh a, a malsawmna lam ûm chiam mi hi kan tam khawp a, chu chu tum ṭhelh a ni a, sual a ni. Hnam tam tak ram nei loa raltlân leh vakvai an awm laia ‘ka ram’ tih tur kan nei te hi lawmna châng kan hria em aw? Ram chu Lalpa ta a ni a, min pêk a nih hi. Ram kan hmangaih a nih takzet chuan malsawmtu Pathian duhdan hnâwlin sum leh pai, hausakna te hi i ûm lo teh ang u.

India sawrkar policy pawh Bible kalh a awm leh zauh ṭhin. Fa reh bun (birth control) hi Mizo Kristiante tân chuan a fuh lo. India rama Muslim-te pawhin an zawm chuang lo. Dik takin ram te tak te kan neih pawh kan luah lum zo lo a ni a, ram kan chân ṭhen palh ang tih a hlauhawm khawp mai. Kan chheh vêla mite hian ram awl an en liam hleithei tawh lo a. Ramri an sawn lo thei lo ve bawk a ni. Ramri buai a pung deuh deuh ang tih a hlauhawm. Dik takin mihring tam vanga rambuai sawi tur an la awm lo a, mihring tam apiang an dingchang tih tur a ni zawk. Pathian thu lamah chuan ‘fa reh bun’ hi hmuh tur a awm lo a, ‘pian pun’ hi malsawmna a ni zawk. Pathian duh dana chhungkua, ram leh hnam kaihruaiten ram an luah zel ang.

Kan duh dana ram kan hruaiin Bible thu a lo kalh a nih pawhin rem leh rem loin Pathian thu angin chhuah ṭalh tum lo mai ila, kan tifuh zawkin a rinawm. "Dawt sawi thup nân dawt dang sawi belh a ngai ṭhin" tih a nih kha maw, fimkhur a ṭul. Pathian thu chuan, "In thu sawi chu ‘A ni, a ni,’ ‘Ni lo, ni lo’ ni ngawt rawh se; chûng aia chuang aliam chu sual laka chhuak a ni" (Matt 5:37) a ti hmiah mai. "Mi tupawhin thu a sawi chuan Pathian thute angin sawi rawh se; mi tupawhin rawng a bawl chuan Pathianin chakna a pek ang zelin bâwl rawh se; chutichuan Isua Krista avangin Pathian chu thil engkimah chawimawiin a awm thei ang..." (I Pet 4:11) tih ziak a ni bawk. Heng thu te hi eng thilah pawh hman tur a ni.

Pathian thu hrilhfiah kawngah Pastor leh Pathian rawngbawltuten fak an phû. Ram hruaitute leh mipuite Pathian thu dik min hrilh hreh lo a, an rawngbawlna kawngah an chiang a, an inthlahdah lo tih a lang. Hetianga an tih hian ‘huat thu chhia,’ leh ‘sawisel ngai thei lo’ an ni ngawt lo. Dik takin Krista avangin Pastor-te biang hi beng ila, lehlam dawh tur ṭhah khawpa Pathian rawngbawl an ni vekin a rinawm. Isua ngei pawh a chungchang thuah chuan ‘ngawi rengin dawh’ mahse Temple then thianghlim kawngah chuan duh rum ve tak a nia. Mimal thil ni lo; Pathian ram thil leh ram kal sual tur vên kawngah an huaisen tih hriat hian mipui tân a thlamuanthlâk. Ram rorelna te hi ‘politics thil a ni a, en liam mai mai ang’ ti mai sela chuan a sawp chu a nasa khawp ang.

Mizoram Kohhran Hruaitute Committee (MKHC) te, Mizoram People's Forum (MPF) ten theihtawp chhuaha ram politics an khalh ngil hram hramte hi a man a tam ngawt ang. Pathian lalna politics hi kan mamawh chu a ni reng dawn. Zep tur a awm lo, Bible chuan hmêlmate chunga ṭhat chhuah leh ṭawngṭaipui zâwk turin min ti a, chutih laiin ringtu pui kan unau thil tisual chu hriattir a, fuih leh zirtir turin min ti zawk. Ram hruaitute hi rawngbawltute hmelma an ni lo a, an unaute vek an ni. Pathian thu angin hmelma ang ni lo, unau anga an awm dan dik lo an hriattir hi Pathian thu a ni.

Dik takin Pathian thu leh politics hi thil inang lo ni mahse, kal hrang tur a ni lo. Ram rorelnate hi Pathian ram thil vek a ni zawk a. Kohhran leh rawngbawltuten an enliam thiang lo a. Khalh ngil turin theihtâwp an chhuah tur a ni zawk. Ram hruaitute pawhin chu chu an hrethiam tur a ni a, an hriatthiam loh chuan politics tarmitin an lo thlîr ang a, an party dodal emaw sawrkar dodal hrim hrim emaw an lo ti thei a, politics khel ve angin an ngai thei. Chutiang chu a ni si lo. Dik takin ram rorelna chu ram khat inrêlbawlna leh hmasawnna thil a ni a, mipuite taksa leh rilru lama chawikan hi a tum a ni mai. Kohhran leh rawngbawltute erawh chuan ram thiltum piah lamah ‘Vân citizenship’ ni turin mipuite hruai an tum a, ‘thlarau lam’ thlengin an khawih. Taksa, rilru leh thlarau hi mihring min timihringtu a ni a, heng thilte hi a inkungkaih vek avangin engmah thlîr liam chi a ni lo. Chuvangin, politics hi Pathian ram thil a ni a; ‘suamhmang pûkah’ ni loin ‘vânram tlafual’ ah kan siam tur a ni ang.

Pathianin Chanchin ṭha hmanga a zawn chhuah, chumi malsawmna dawng mêk Mizo Kristian mipuite hian kan chênna tura min pêk ‘Mizoram’ hi Pathian tân i hlân zêl ang u. Ram hruaituten Pathian râwn chung zelin ram kai hruai sela, Pathian thu kalh chu hnâwl zel ila. Mipuite pawhin Pathian duhdân zui zêl ila. Kohhran leh rawngbawltute pawh ṭang sauh sauh sela. Kan ram leh hnam hi Pathian thu ang zelin châwikâng ila, Vanram thlengin insêp chho ang u hmiang.

- Lalbiakhlira