Ar ang kan vai tawh lawng

Sawi ho awm si loin chanchinbu-ah mahni ngaihdan danin mi thinlung hliam thei zawngin chhiar tur a awm fo a, ‘Ar ang kan vai tawh lawng’ tih Kristiante tana hla ṭha lo a ni ang tih mai theihin sawiselna thu chhiar tur a awm leh zauh ṭhin a. Thu leh hla thiam zawkten an sawi fiah atan a hla thu ka han ziak chhuak a, a hla ka lak chhawnna hi tun hma ṭhalaite Hlabu 4th edition November 1989 ami a ni a, a dik turah ka ngai. Tihsual palh a awm chuan amah Pu Rokunga tu leh fate min ngaidam a, a dik zawk min hrilh turin ka ngen nghal a ni.

Ṭhangtharte hian hla bua a thluk ang loa sak an ching a, Biak inah ngei pawh ṭhenkhat chuan an duh dan danin an sa ngam a, sawisel dawn chuan ninawm khawpa tam a ni. Kristian Hlabu No. 52-na ‘Lal Isua hming i fak ang u’ tih thluk thum lai nei, mah se lengkhawm thluk kan tih mai ‘Ar ang kan vai tawh lawng’ tih thluka kan sak hian a thluk nge kan duh loha ‘Ar ang kan vai tawh lawng’ tih hla thu hi tih sawi chiang ila. He hla thu hi han chhiar ngun ila Kristiante tan hla ṭha lo a nihna a awm hran lo a ni lawm ni? Hla thluk te hi chu a siamtuten an phal phawt chuan a hman theih zel a ni lawm ni?

He hla awmna

ṭhalaite hlabu hi ram ngaih hla te, Isua pianna hla leh hla dang ṭha tak tak awmna a ni a, chumi hlabu-ah chuan ‘Ar ang kan vai tawh lawng’ tih hi no. 218-ah dah a ni. He hlabu buatsaihtute hian an hla rem danah pawh hian Kristian hlaa ngaiin chutiang zingah chuan an dah a, a hla thu hrim hrim hian he leiah chuan sualna avangin vanram kawng kan vai (kan bo) a, mah se nakinah van kan thlen hun chuan ar ang kan vai mai mai tawh bik lo ang tih a sawi chiang hle.

Chuvangin, a thluk mila sak theih Lal Isua hming i fak ang u’ tih a lo awm hi hlaah kan hausa a ni mai lawm ni?

A hla thu chu:-
1. Aw, chhimhlei tual kan lenna tlang,
Lungduh ṭhenna hmun hi;
Aw, engtik nge ka chhuahsan ang
Ar ang vaihna ram hi

2. Thlangtlai liam hnu si-ar mah khian,
Van zawl kawlkung a bel;
Kei erawh chhimhlei tualah hian,
Ar ang ka lo vai e

3. An hrilh hmangaih êng zamna chu,
Riangvai chawlhhmun an ti;
Ka rauthla hi lawi ve ang maw,
Ar ang vai tawh lovin

4. Chhimhlei tualah riakmaw angin,
Riangten leng mah ila;
Chhawrpial run nuam kan thlen hunin,
Ar ang kan vai tawh lawng.

A thluk (solfa) erawh chhut a har a, tilang lo mai ila. Tunlai hla thar hi chu kan ti ti ang ang deuha phuah hi a ni ta ber a, heng hmanlaia kan hla phuah thiamte hla hi chuan hla thu pangngai takin thu an siam a ni.

- H. Vanlalvena