Hruaitu chak nge in duh hruaitu dik?
India rama hruaitu chak an tih ṭhin chu Bihar Chief Minister hlui Laloo Prashad Yadav kha a ni. Kha pa khan a nupui, lehkha pawh thiam mang lo pawh Chief Minister a nih tir thei a, India ram Railways Minister a nih pawh khan a chakzia an sawi ṭhin kha a ni, mahse mi dik lo, eiruk ching mi a lo ni si a, a tawpah chuan mualpho takin a awm tih kan hmu. Hemi avang hian Mizoram hian politician chak kan tihte hi kan teh nawn leh a hun tawhin mi eiru leh dan lova kal pawisa miah lo te hi kan lo hmu ropui palh ang a, kum 10 hnu velah hian jail bang zut turte kan nei ve nawk lo maw? tih zawh na in zawt hian bul i han ṭan phawt ang.
Tun hma Congress Lal hmasak 1980's tawp lam leh 1990's tir lam te khan Minister chak hi kan lo nei zauh zauh tawh a, mahse anni kha fet taka teh tling an lo ni reng reng lo chu a lo nih hi.
MNF an Lal leha Minister chak kan han nei ve leh bawk a, mahse chuti teh chiamin mipui mit hmuhah an chakna kha diknaah an chan tir loh avangin ngaih hlut an hlawh zui leh chuang lova ni. Congress an rawn Lal leh a, an Minister chak kan tih te pawh Minister dik ber ber tia kan sawi zingah kan sawi hmaih leh tlat avangin an hun a liam chuan kan kawk kan kawk leh ta a ni.
Tunah hian kan ram politician ruling leh ruling lo pawh hi thlir ila thil ham bawrh bawrh mai chi, sorkar chakna leh mipui thlan tlin (MLA nihna) avanga an nihna nen ṭan kawp chuan mipui leh kohhran duhzawng chiah lo pawha awm chunga mipui chunga lêng ang maia thaw vei ham ham, thil eng kim mai suma teh theih emaw ti leh insawifiah hmanga mipui hmin tuma ka theih tak emaw ti an awm a nih chuan kum 10 pawh a vei hma hian kan kawk letin kan la nuih lo ang tih a sawi theih loh.
Bihar Chief Minister hlui kan sawi tâk hi a hun lai chuan mi zawng zawng in an fak turin a chak a, a thawm a nâ a, thil a tithei a, dik leh dik lo pawh thlu lovin a pal bawrh bawrh a, a nek buan buana a hun a liam chuan jail ah khung a nih mai bâk ah ṭhang leh thar lo awm leh zel te pawhin an nuih a nih zui tâk avang hian kan Politician te pawh hi fimkhur hle rawh u.
Zak lo lutuk lo teh u, zak ve deuh teh u. Zah tawrh chak avang hian mi hian an nuihin an ten lo che u emaw ti lo ula, a rukin an lo nuih sawh em em che u a ni thei a, kum 10 hnu ah chuan in chhungte nih pawn zahthlak an tih tur khawp hian in lo tal na lutuk palh ang tih a hlauhawm.
Mipui hian chak kan läwm lai hian nakin lawkah chuan dik an läwm leh dâwn a, a hunlaia a chak kha hre tawh lovin a diklohnaah kan kawk leh dâwn tih hi political history thlir hian kan hmù thei a ni.
- Lallungmuana