Kawng laih leh leivung

Fur ruahtui a tla a, Mizoram hmun hrang hrangah chhiatna a thleng mek. Chhiatna thleng kara thil lian tak pakhat lo lang chu kawng laihna vung (leivung) in ram a tih chhiat leh, kan ram lui dung a nghawng dan hi a ni.

Tun hnai khan Mizo­ram leilung humhalh duhtu pawl hrang hrangte chuan, Chief Minister hnenah National Highway and Infrastructure Deve­lopment Corporation Limited (NHIDCL) hnuaia kawngpui laihin envi­ronment a tihchhiat nasat lutuk tihtawp a nih theih nan hma la tura ngenna an thehlut tih kan lo hria.

Lehkha thehluttu pawlte hi - Youth for Envi­ronment Justice Mizoram, Lunglei Ṭhalai Pawl, Serchhip Ṭhalai Pawl, Hnahthial Ṭhalai Pawl leh Saikhawpui Ṭhalai Pawlte an ni. A thehluttute aṭanga chhut chuan, ṭhalai zingah kan ram dinhmun veitu an tam tih chiang takin a lang.

Hmasawnna hna thawh a nih avangin a tuartu chu an awm a ngai, chuvangin kawng laih i ramngaw leh lui ten an tuar a ni mai, tia sawi theih a ni. Hmalakna a len zawh poh loh a nghawng pawh a na mai tur a ni ang, hei hi mi ṭhenkhat ngaihdan a ni.

Chutih rualin, a dawta thil thleng leh thil awm hi kan ngaihtuah tel a ngai. A bik takin sorkar laipui lamin hmasawnna hna thawhna tur a ruahman hian, awlsam leh nuamsa taka thawh liam mai turin a ruahman ngai lem loh tih chu kan hre ṭheuh awm e.

A hre zawkten an sawi dan hmang chuan, kawngpui siamṭhat a nih dawn hian - a laih man bakah leivung senghawi leh buaipuina tur pawisa hi dah tel a ni ṭhin. Hetiang a nih chuan, tuna hnathawktu company tam tak hian an sum hman tur ang hmang lo in, a awlsam zawngin hna an thawk tihna a ni ang.

Mizoram University kawng laih zau hna thawh a nih khan, leivung chu kawr sira nawr liam mai loin Truck hmanga phurh khawm vek a ni a, paihna tur hmun bik siam a ni. Ruam chhe takah an paih khawm a, a hnuah MZU Park siam nan an hmang hial.

Hetiang chiah hian leivung nawr liam satliah mai loin a sawngbawl theih. Saitual leh Seling inkarah pawh leivung dahna ṭhenkhat chu a awm niin hmuh tur a awm, mahse hetiang hmun hi an siam tam tawk lo, a tuartu chu a chhehvela chengte leh lui tui a ni.

Ka hmuh ve phak chinah chuan, Saitual leh Aizawl inkara kawng laih pawhin lui tui a nghawng nasa. Kaihzawl lui chu leivungin a hnawh a, hei hian lui a tih chhiat bakah sabereka khuangkaih hlauhawm tak siam thei dinhmunah a ding.

Tuivawl lui chu leivung avang hian nasa takin a nu ṭhin a, hei hian Saitual leh a chhehvela chengte tui tlan chu nasa takin a tibuai. Leivung hi a paihna hmun tur bik siam a, sawngbawl ni se la chuan hetiang thil hi a pumpelh theih - hetiang tur atana pawisa a awm a nih tho si chuan, thuneitu lamin hma an lak ngei a ngai.

NHIDCL hian tun hnai khan Saitual Damdawi In tan ambulance an pe. Thil lawmawm tak a ni, chutih rualin hei erawh ngaihtuah tel a ngai. A lan dan chuan an khua leh a chhehvel hmasawnna tur pawisa tam tak chu a nihna turah an hmang lo a, sum tlem zawkin an hmai an phih a ni mai em? tih chu chhut ngun a ngai hle. Lawm tur nge lawm loh tur chu chhut peih chuan chhut rawh se!

- Sanga, Saitual