'SITTING DEMONSTRATION' MAW?
Tunhnaiah ‘sitting demonstration’ tih hi a lar viau mai. Pawl changkang awm tak tak leh mi pangngai awm tak taka ngaihte pawh hian 'sitting demonstration' te hi an han huaihawt leh tlat mai ṭhin si a! Aizawla Vishal dawr kawtah te khan an han 'sitting demonstration' ta kha a ni a!
Engemaw lai aṭanga kan uar tak em em, lungawilohna lantirna chikhat ‘bandh’ pawh 'band' tia ziaka 'beeen' tia lam ṭhin kha a tam zawk kan ni ṭhin tlat a. Chuvanginm ‘sit-in demonstration’ kan ti ‘sitting’ pawh hi a mak lem lo e, mah se a dik zawk awm reng, harsa chuang bawk si lo, a dik lo zawk kan hmang lar tlat zawk ṭhin erawh hi chu a pawiin a zahthlak tlat ṭhin a ni.
Tun aṭang chuan hetiang thil huaihawt a lo ṭul leh a nih pawhin ‘sit-in demonstration' hi huaihawt tawh zawk se a ṭha khawp mai.
Kan sawi pawp ta sa sa, sapṭawng ngaisang tak Mizote hian sapṭawng thumal lam fuh loh, a dik lo zawk hman lar kan ngah mai. A ṭhen chauh han sawi ila: motor brake aia break tlat te, beer can aia beer cane lei ṭhin te, fund raise aia fund ris ṭhin pawl te, electric tih mai tur electrict tia ziak - a tawpa t belh hram te, hunger strike aia hanger strike lo huaihawt ta tlat ṭhin te pawh kan awm nawk mahna.
Sapṭawng ni lo theithur chikhat nimbu pawh hi limbu kan ti deuh fur mai. Hman deuh khan thei leh pangpar lam enkawltu bik Department meuh pawh khan an thu chhuahah limbu an rawn ti tawh bawk. Limbu hi Nepali hnam hming a ni awm e, ser thur hming chu a ni lo, mah se he ser thur nimbu hi Mizo ṭawngin limbu kan ti an tih tlat erawh chuan thudang le! Sawi tur neuh neuh a la awm nual mai, mah se sawi vek a ṭul kher lovang.
Tun hnaia thil thleng lian thawkhat takah khan Mizo ṭawnga ‘ṭhut hmuk’ sap hoin demonstration/ protest an tih ṭhin sit-in demonstration kha kan tih ‘sitting demonstration’ tak tlat hlawm avang khan a dik zawk awm renga dik lo zawk kan hmang lar ta zawk kha ka vei ve deuh a, ka han ziak mai a ni. Sapṭawng chu kan thiaam lo, mah se kan hman chhun erawh chu dik se tih hi ka duh dan a ni.
Chuti lo chu kan global tawh si a, kan state pawn lam leh foreign thlengin min lo thlir ve tawh ṭhin si a, Mizo hnam hian nuihzat kan hlawh lutuk palh ang e! Hei hi ṭhahnem ngaihna a ni e.
- Ramhluna Hnamte