MLP Act hnuaiah zu

MNF-in sorkarna an chan hnuah inthlan dawna an intiam ang ngeiin dan hmanga zu zawrh ti tawp turin chak takin hma an la nghal a, Mizoram Liquor Prohibition (MLP) Act duangin zu an khap nghal a ni.

MNF kaihhruai sorkar hi an fakawm ka ti khawp mai, inthlan dawna an intiamna chak taka an bawhzui nghal avangin, hetiang hian an intiamna dangte pawh bawhzui se an fakawm lehzual ang. Dan anga zu zawrh tihtawp kawng an fakawm rual hian, dan loa zu zawrh titawp tura an hmalakna erawh a fakawm lo. A chhan chu zu in duh chuan rakzu emaw a senchi in tur an hmu reng a ni.

Dan hmanga zu zawrh tihtawp hi a ṭhat em em rualin, dan loa zu zawrh tihtawp kawnga hma­lakna a chak si loh chuan ram tan a pawi theiin ka hria. MNF hi kum 3 chuang an sorkar tawh a, dan anga zu zawrh chu khap a la ni char char a, dan loa zu zawrh erawh an veng hneh lo tih a lang.

Congress kaih­hruaiin dan hmang zu an zawrh tirh khan kan chhiatpui deuh hlek chuan ka hria a, mahse kum a vei meuh kha chuan khawlaia zurui hmuh tur pawh an tlem chho hle a nih kha. Zu in thiam tak tak a awm loh rualin, zu zawrhtirh leh a hnu kum 2 vel thlirkir kha chuan a inthlau hle a ni.

Zonet leh LPS zing news hi han thlir ila, pumna avanga hospital pan an tam ṭhi hle. Pumna hi a tam ber chu zu vang a ni ngeiin a rinawm. Chuvangin, dan anga zu kan khap rualin, dan loa zu zawrh kan khap hneh si loh chuan zu khap hi kan chhiatpui ang tih a hlauhawm takzet.

Heti khawpa demand a sang chung pawhin zu zawrhna hmunah chuan lei tur a awm reng. Heti khawpa demand sang, a ruk a rala siam sia an chawm hneh a nih chuan zu ṭha tak an siam chhuah a rinawm hauh loh. Zu khap avangin zu in miten zu an nghei phah si loh, zu chhe zawk an in a ṭul.

Tunhnaia mitthi hi han ngaihtuahlet ve teh, zu kaihhnawih an tam viau a nih hi. Zirchian ni ngat se, dan anga zu zawrh tirha zu kaihhnawih avanga mitthi aiin, tunhnaia zu kaihhnawih avanga mitthi an tam zawk hialin ka ring.

Kan ram hruai­tute'n ngaihtuahna thar an siam a ṭul hlein ka hria. Kan Home Minister ber lahin, force tih chak lam sawi loin, SRS a au ta mai si. Heti ringawta kan kal dawn a nih chuan, zu zawrh leh law law mai kha kan ram tan a ṭha zawk mai a ngem tih a awl ta rum rum.

- Dawngtea