HRINGNUN BALANCE

Biak ina lam dârh dârh chin hi ba ṭhîn an har an ti; nula rîmnaa Pathian thu sawia titi tui thei tak chin chu hlauh hle tûr an ti. An ti tih ringawt a ni a, dâwt a nih ka ring kei chu.

Mi ina vak kual dê dê, Pathian thu sawi paha mi pawisa pûk tur zawng kual ṭhin an awm, hêngho hian bâ rulh aiin dâwt sawi an thei zawk an ti. A tak taka hriat ka nei nachungin ka hre sual a nih ka ring, dâwt bawk a ni ang.

Vanglaini Feb 07, 2017 editorial-ah "Bank leh financial institution lamin Mizoramah loan an pe chhuak ṭha lo tih kan sawi rual hian, loan latu lamin kan rulh ṭhat loh thu pawh hi sawi uar a ngai a; loan hi a pûka pûk a ni a, rulh leh tur a ni tih hre chiang ila, rulh leh tur loan a ni tihah hian i chiang thar ang u," tih a awm. Hei hi thu dik a ni.

Sawrkar hnathawk pakhat, mi lian ve tak, loan tam tak laa rulhna tur nei thei reng reng lo, phaia a fanute lehkha zirtir reng thei a awm; a fanute chu an changkang lutuk, Sap ṭawng te an thiam si, kan kâwm phâk lo. Mi dang daih, nuai sâwm chuang loan laa rûlh tum miah lo, khawvar hlima an ina kal pawha “A chuak chiah”, tlâi thim hlima kala “A lo la haw lo” tia a chhungte'n chhuanlam an siamsak ziah pawh an awm; a fanu phâiah a dah ve tho, a fanu chu changkang lutuk, a hmel ṭha si, ralkhat aṭangin kan melh no ngam ṭâwk - a hmuh loh lâiin. Hêng mite laka loan rulhna ṭhîng chhuak tur hian a puktirtute lam hian telephone call manah leh an in panna sensoah sum tam tak an khawhral tawh.

Loan tlêm tham deuh lâa rulh tum miah lo phei chu sawi sên loh an awm, a ṭhîngtute Pathian thu lo hrilh hliam hliam chi pawh an awm nual. Sawrkar lam hian puitlin loh tura chêt lâk an chîng niin a lang a, an zâr hnuaia ram leh hnam damna zawngte kan baihvâi zêl dâwn. Kan hotute hian an hna leh Pathian thu an chawm pawlh a, an sum ni lo an châwm a, an hâwp bawk a, an bâr baw bawk.

An enkawl mipui lahin chawma hâwp tur kan duh ve avangin a thlâwna dawn theih sum kan inchuh bâkah rulh tum loa sum pûk kan chîng, chûng zingah chuan harhna leh a rau lam chi chang sâng thei deuh deuh an awm, an zâr nuama chhandamna zawngte tan kawng a thim ṭhin. Hêng mite hi han tih tak tak arâlah chuan khawtlâng leh kohhrana mi nazawng âia ṭangkai leh ṭha­hnem an ni, ram leh hnam tan keini aiin an ṭangkai fê, keini âiin an fel daih. A va in-balance lo em!

Thil hi a in-balance loh chuan a buai ṭhin, sumdawnna pawh balance sheet-a a in balance loh chuan buaina palâi chiau-au tura inpeih a ngâi; chutiang bawk chuan hringnun hi a in-balance loh chuan harsatna welcome kan hmabâk.

Kan ṭawngkam leh kan nun a in-balance lo; kan sakhua leh kan rinna pawh a in-balance lo; kan hlawh leh kan lei a in-balance lo; kan thawh leh kan ei a in-balance hek lo. Hringnun hi balance chungchang ngawr ngawr a ni a, kan nun a in-balance si lo a. In-balance hi zir a ngai, kan zâin zir rual ang aw; i zangphar rual ang aw, phar rual ang.

- Rempuia R. Lûtmâng