Mizoramah sakhaw sawrkar

Vawiina Mizoram Politics lian ber inphum chu “Congress Sorkar hian zu hi a zawrh luih zel ngat chuan Pastor leh Kohhran Upate ngaihdan ngaih pawimawh lohna a nih avangin kum 2018 inthlanah chuan Congress Party chu a tla chiang khawp ang a, duh lo chung pawhin MNF hi kan hrawn leh dawn chu a ni mai,” tih hi a ni. He boruak hi a lian bawk a, Pu Zoramthanga, tuna a Party ‘under six’-a awm mek pawhin, “Congress chu under ten’-ah kan dah dawn e” a ti a nih hi.

Kohhrante pawh hian sual hneh leh sual awm hnai reng chung pawha Kohhrante fihlim tura zirtir ai chuan sual awm miah lohna ram, ringtute’n nakina Isua hova Vanrama kan chan tur hi Mizoramah hian siam an tum niin a lang a.

Kum 1984 tawp dawna zu zawrh ṭan a nih pawh khan kum 1987 chuan zu lei tur intlar leh tuala zurui buai an tlem hman viau a nih kha.

Pu Hawla hian, “Kan belh ve ber Koh­hranin ram rawng­bawl kan tum vena ber Politics-a kan dinhmun min phehsak phet tuma heti taka min beih takah chuan min iai lo tur Kohhran te pawh hi kan ngaih­tuah a ngai dawn em ni aw? Kristian sakhua chu sakhaw dang zawng aia mahni mimal pawha Pathian be pawp thei ber kan ni a, Isua ngei pawhin langsar taka ṭawngṭai aiin mahni pindan chhunga Pathian chauh hmuha ṭawngṭai chungchang te pawh a sawi kha.

Ram dangah ‘Re­formed Church’ a tam viau chhan ang deuh hian kan Kohhranhote pawh hi siam ṭhat a hun dawn hnai em ni dawn le?” ti ta roh se, thil chu a buaithlak ve thei viau mai awm mang e; sang tel fe chuan an zui duh ngei dawn si a.

Kohhran hian India ram, secular ramah hian, Mizoramah hian Iran rama Khomeini rorelna (Theocracy) ang neih hi an beisei chu a ni em lo vang chu! Tin, Kohhranho te pawh hian Mizoramah MNF sawrkar ta se la chuan a lawmber tur chu central BJP an ni ang tih hi an hria em le?

Kan ram en hian zu ai maha ngaimawh tur hi Kohhran tan hian a tam viau lo maw? Ringlo mite’n an buaipui ve loh - petrol pawlh dal leh gas thal chhuaha tui thun, thir duh vanga kan lei (bridge) kilhna ruk, Sunday School-a hming dah hnua ṭawngṭai laia chhuah tih angreng mai mai te hi sawi tur a tam.

Kohhran hian an beramte hi Isua ke bula min hruai thlen an tum tak zet chuan heng sual leh rinawm lohna langsar lutuk hi thuneihtu sorkar hi sawi puiin Kohhranin ṭangkaina a neihnaah tha thawh pawh inhuam se a ṭha ngawt ang.

Rev Zairema chuan zu in hrim hrim hi thilsual a ni lo, a in leh a ruih kan thiam lo mai a ni. Mizo nun pawh hian zu hi thil pawimawh tak a ni ṭhin a, hei hi kan revive leh dawn em ni a lo ti zawk a ni. (Chapchar Kut Souvenir 1984)

- K.Hrangluaia, Mission Vengthlang