Sakhaw ni pawimawh humhalh
April 16 & 17 chhuaka Vanglaini editorial kha kan lo chhiar hlawm em aw, India ramah BJP-in ro an rel hnua Kristian ni pawimawh palzut thil awm ta fo mai chungchang a rawn ziak kha mi tam tak chuan kan chhiar liam ringawtin ka ring. Chhiar liam ringawt loa India danpuiin sakhaw zalenna min pek ang hi a taka a awm theih nana hma kan lak a ngai.
Good Friday ni takin sorkar laipui chuan Digi Dhan Mela buatsaih turin thu a tichhuak a, Mizoram sorkar chuan Kristiante ni pawimawh a nih avanga kan hman theih loh tur thu a hriattir a nih kha. Krismas ni tak lah Good Governance Day-ah min puansak tawh a, hengte hi Kristiante ngaih pawimawh lohna lian tak a tling. Ngai pawimawh se chuan Kristiante ni pawimawh awm dan pawh an en tel ve ngei tur a ni.
Hetiang thil hi a la thleng zeuh zeuh reng dawn a, Mizo mipuite hi Kristiana kan inchhal chuan kan duh lohna hi langsar taka kan lantir ngam a hun. Mizoram state sorkar nena
ṭangkawpin, sakhaw pakhat palzutna anga lang thei hi langsar tak leh huaisen taka kan dodal ngam loh chuan min palzut nasa tial tial ang. Kan sakhua leh kan hnam a himna tur a nih a, Central lamin min ngaih pawimawhna tur a nih dawn phawt chuan China lam âwn anga kan lan ngam pawh a ngai.
Mizoram hi engtiklai mahin Hindu ram a ni ngai lo a, India ram lalten an awp ngai lo tih hi kan rilruah lian se. Mainstream rilru pu, inti rilru zau taka awm a, kan hnam leh sakhua a ralna tur ngaihtuah lo hi awm theih a ni. Mizo kan nihna hi chiang tlang ila, chutiang bawkin Kristian kan ni tih hi chiang tlang ang u.
Mizorama kohhrante hian member tam leh biak in neih ṭhat lama hma kan lak nasat ang hian kan sakhua leh kohhran humhalh hian ṭang tlang ila chuan Central sorkar pawh hian kan hnam leh sakhaw thil pawimawh hi min ngaih pawimawhsak ngei ang. BJP sorkarin Kristiante nekchep zawnga hma a lak mek laiin keimahni leh keimahni inseh lo ila, ṭang tlang ila. Langsar zawkin kan Kristianna nekchep zawnga hmalakna kan duh lohzia hi i lantir ang u.
Social media velah kan sawi luai luai a, kan duh lohna hretu tur berten an hre pha lo. An hriat phak ngei tura kan ṭanho a, kan dikna leh chanvo hi kan humhalh a ngai.
- Ramropuia