Tu tunge smuggling ah inrawlh?

Mizoram mipui titi siamtu ni phak, tun thlenga mi pakhat pawh an la man lohna multi crore smuggling deal chungchangah hian tute nge inrawlh tiin Kuhva tawlhrukna hi han inzawt ila engtin nge kan chhân tak ang le?

He kuhva tawlh rukah hian mi hrang hrang hming thawi tak takin social media lamah a lang a, chuti chung chuan kan la hawi hu hu a ni mipui lam hi chu.

Mi ṭhenkhat chuan Mizorama thiltithei ber ber zinga mi hi he kuhva tawlhruknaah hian an inrawlh thuk hle tiin an sawi a. Hming sawi te pawh neiin a ṭhen phei chu an insawifiah hial a, mahse insawifiaha fiah chi a ni lo ang bawkin inpuhna naran hmanga in man chi pawh a ni chuang lova, a tawpa tawpah chuan Mizoramah hian dikna hi a lal tawh dawn lo em ni le tiin kan inzawt lo thei lo.

Smuggling motor-in check gate hrang hrang an rawn pal tlang par par mai kha thil mak a ni phawt. Smuggling motor kuhva phur khan Champhai kawngpui kha an rap chhe kawi pur a, kum nga kal ta vel kha chuan lirthei te chi kal hleihtheih loh turin kuhva phurin an rap chik dep dup a ni. Chumi hnu chuan kuhva phur tam takin Mizoram paltlangin he smuggling hi an kalpui tih kan hmuh lai hian tute nge man tawk tih kan inzawt a, an awm si loh chuan sorkar thuneitu zingah a humtu an awm tihna em ni?

Kum 2018 inthlan dawn khan heng smuggler pawisa hmanga campaign hi an lo awm reng em ni? Kuhva phur motor dan a nih chiah khan smuggler te hian huaisar takin sorkar thuneitute an chhuahchhal ngam an ti em ni? Kum 2018 hma lam pawh khan sorkar hmasa hnuaiah pawh khan smuggling hi ualau takin khaw en laiin an kapui hmiah hmiah em ni?

Kan ramah hian smuggling hi a kal zel a. A zir chiangtu Central YMA te meuh pawhin state sorkar tih theih loh a ni tih hre reng chungin (a zir chiangtu meuh chuan an hre dawn si) chhiah tih tlem te an sawi mawi ta mai mai em ni kha?

Smuggler-te hmaah kan zavaiin kan bawkphup ta em ni? tih zawhna inzawt chung hian tu tute hi nge smuggling-ah inrawlh? tih hi ka la hre chak a ni.

- Zonunsanga