Kross nge Kraws - Mizo ṭawng ziak

Tunlaiin zaithiam­ten music video an siamah 'Kross' an rawn ti fo mai a, hming ziak danahte 'Kross' an rawn ti ta. Mizo ṭawng ziak hi kan zir a ṭul ta hle mai. Sap ṭawng ziak dik lo chu kan inhmuhsak thuai ṭhin a, Mizo ṭawng ziak erawh kan en liam mai mai bakah kan hre lo hle.

'Kross' tih hi ziak dan dik lo a ni a, 'Kraws' tia ziak zawk tur a ni. Mihring hminga kan pu a nih pawhin 'Kraws' tia hman hi ziak dan dik zawk a ni a, Bible pawhin 'Kraws' tih hi a ziak dan a ni. Mi tam tak chuan Mizo ṭawng ziak danah Bible pawh hi a dik vek bik lo an ti a, a dik e. Amaherawhchu, Bible aia rintlak, Mizo ṭawng ziak chungchangah a awm lo. Dik lo lai deuh pawh lo awm mah se, a tam ber zawk hi a dik a, a dik lo chu tlêm tê chauh a ni.

Bible-a Mizo ṭawng ziak a dik vek bik lo ti ṭhin zinga tam tak hi chuan Bible-a Mizo ṭawng ziak dan dik lo la hmu miah lote pawh kan ni ang.

Chanchinbu hrang hrang hi ka chhiar kual viau a, Mizo ṭawng ziak danah chanchinbu lam hi an fakawm hle. A dik vek lo nachungin an hmang dik tlangpui. TV lamah hian Mizo ṭawng kan hmang dik lo nasa thung hle. Thubawkvâk (scroll) hi han en ila ziak zawm tur leh tur loh an hre hrang lo tih a chiang hle. Chanchinbu lamin an hman dik theih chuan Cable TV lam pawh hian an hmang dik thei, ṭan deuh leh tlema inzir belh hret a ngai, an peih leh peih loh a ni mai.

Cable TV lam mai bakah music video siam ṭhinte pawh hian Mizo ṭawng ziak kan thiam deuh chu a ngai, hla thu hmingah Mizo ṭawng ziak dan dik lo ngial ngial ka hmu fo mai. Kan ṭawng ziak lamah hian kan inzir belh chu a ngai hle. Lehkha kan zir ve lai khan high school-ah Mizo grammar kan zir a, mi tam ber hian khang kha kan hre zui ta lo niin alang. Ho tê tê a ni a, graduate tan chuan thiam loh tur a awm lo.

Poster, banner, billboard leh a dangah te Mizo ṭawng ziak dik loa ziak a tam hle. Damdawi ina ka kalin banga an thil tarte ka chhiar ṭhin a, Mizo ṭawng ziak a dik lo hle. CYMA hian emaw, heng, thil print ṭhin te, ziak ṭhinte hi Mizo ṭawng ziak dan zirtir ṭhin se a ṭha hlein ka ring.

Ziak zawm leh zawm loh turah hian ka inzirin ṭan ka la ve fe naa conjunction 'te' leh plural 'te' hi ka ngaih pawlh fo mai, chutiang bawkin 'ho' tih hi. A zawng zawng hi thiam a harsa mai thei a, a tlangpui hi a awm. Tunhnaiah Sap ṭawng kan uar ta deuh a, Sap ṭawng 1st person 'I' hi hawrawppuia an hman ṭhin avanga Mizo ṭawnga 2nd per­son 'I' (you tlukpui) hawrawppuia ziak kan awm ta fo mai.

Ziak lamah hian ṭan kan lak zual deuh a ngai a ni.

- Rochungnunga