VIP light a bo dawn ta!

Sap hoin India ram min awp laiin sorkar hnathawk ṭhenkhat, an hnathawhna in a mamawh avanga chhit ngai bikte chu an motor chungah eng sen chhit tir ṭhin an ni. An chhit tir nachhan pawh thildang a ni lo a, dan leh thupek kenkawhnaah eng sen chhit hian an tan hnathawh a tih awlsam dawn avang chauh a ni a, kawng lakah tibuaitu awm lo a buaina chhuahna hmun an thlen zung zung theihna tur leh rikrum thila an duty na tur hmun an tlan thlen vat theihna tura thil ṭangkai a ni a. Eng sen chhi ṭhinte hi District Bawrhsap (DC) te leh police hotu Superintendent of Police (SP) te an ni ber. Kawtthlera mihring vah huai huai ṭhinna hmun, India ram te angah phei chuan he eng sen hi thil ṭangkai tak a ni.

Sap hoin min ṭinsan a, India ram pumah VIP light chhit hi nasa taka hman sual a nih hnuah Mizoramah pawh sorkar hmasa ber aṭangin motor chunga eng sen chhit hi a tira a ching chhuaktuten ṭangkaina bik a neih avanga awmze nei taka an lo hman ṭhin ang ni lem loin mumal nei lo takin hman chhoh a ni a, tun hi kan thleng ta. Tunah chuan kan hotuten eng sen an chhit nachhan ber chu mi naran aia chungnung zawk an nihzia mipui hmuha tarlan an duh vang a ni ta ber a, chu chu sapṭawng chuan ‘status symbol’ an ti. Ṭul bik avanga hnathawhna hmanrua tih lam a hawi tawh lo a, an motor chunga eng sen an hman duh dan hi mipuite hnuaichhiahna hmanrua a ni ta mah mah a. Inthlan campaign lai leh sorkarna siam ṭan tirh lama mipuite hi kan VIP te in ni titu sorkar nen phei chuan VIP light chhit culture hi thil inhmeh tak a ni lo.

Mizote zingah hian ropuina anga lang, engemaw mai mai uma intihhmuh vak chi hi kan tam ve hle a, hengho hi a tlangpuiin chhungril lama belhchian dawl vak lo, a ruka mi kawrawng kan ni duh hle. Mi kawrawng kan tam ve hle tih lan chian em emna chu VIP light kan ngainat dan te, designation plate kan ngainat dan te, kawngka lu chunga degree zawng zawng tar chhuah ching kan awm tlat te, hming bul leh tawpa nihna zawng zawng tarlan kher duhna rilru pu kan pun tawlh tawlh danah te, sum pai senga doctorate degree belhchian dawl lo lei duh kan pun tak zel dan aṭangte hian a lang chhuak chiang viau a ni.

Nikum lamah em ni, Mizo­ram sorkar pawhin eng sen chhi pha list a siam thar a, la chhit chak ngawih ngawih, chhi pha ve ta si lo te kha an awm ta nual mai a niawm a, chung ho chuan tlawm leh zah pawh dawn zo lo in hotute hnenah ngenna an siam a, an vir buai hle mai niin miin an sawi. Hmun ṭhenkhatah chuan sorkar hnathawk zingah tute emaw, eng sen chhi pha hauh lo, mahse an pute zarah lo chhit sen tum ve em em te pawh an awm ṭhin a. Directorate office pakhata ka thawh ve laiin hetiang ang chi hi kan hrawn ve hlauh mai a, kan minister zin a zui apianga a chhit ve tur kan lei sak ve ringawt mai a ni, khang hunlaia mi phei kha chu lawk bur chi kha a la ni a, ‘A lu nge lian zawk a VIP light’ ti mai maiin a rukin kan nuih kan nuih ṭhin a, a pension pawhin ‘A VIP light kha inhawn tir theihnghilh ang e, a ngainat ṭhin em kha’ te kha kan ti mai mai a ni - kan ngaisang lo hle.

Mi ṭhenkhat, a bikin junior officer zingah mi zawng aia invaivung chak zual, VIP light awmzia hre lo, puten an chhit sen avang a chhi ve mai thei nia lo inngaite pawh an awm niin an sawi bawk a. Kan nau pakhat SAD a awm ṭhin sawi danin Minister pakhat personal secretary (PS) motor-ah pawh rei tak chhung chu VIP light hi a fu ve vang ringawt mai a niawm e. An hotute mit a kham deuh niin a sawi a, ‘MCS officer junior tak a ni a, a hna chelh pawhin a pha lo hrim hrim a ni’ an ti a niawm e.

Kan ṭhenawmah hian zirlai pawla inhmang ve tak a awm a, a ni sawi dan chuan college lecturer nu pakhat chu sorkar motor VIP light invuah ngatin college a kai ṭhin a niawm e. Hengho hi Aesopa thawnthu bua choak arawn chang tawn ang deuh kha an ni a, mahni leh mahni an inbum a, mi nuih an ti za ṭhin a, an khawngaihthlak khawp mai.

Thakthing Bazar hi kan veng aṭanga kan bazar phakna hnaivai a ni a, MNF sorkar lai khan ṭum khat chu Inrinni chawhnuah ka makpa leh ka tupa nen bazar turin kan han kal a. Thakthing Veng lam aṭangin Chief Minister leh minister ṭhenkhat leh Assembly Speaker leh an hnungzuitu khawte run tham zet tur kha hmanhmawh hmel em em hian kawngsir lehlam lehlama chawhmeh zuar nuho inpho karah khan an rawn inzui duah duah mai a. An motor-ah chuan a chung sen an chhi fur mai a, national flag an khai phe vawn vawn bawk a, an hmanhmawh hmelin an tihtur a pawimawh hmel si a, bazar chep em em maiah khan kawng kan lo kian rawk rawk mai a. Mahse, Kulikawna badminton an khel zo lo haw lam kha an lo ni lek si a.

Kawng a chep em avangin helai kawngah hian bazar ni chuan lirthei ke pali nei a tlan lut ngai lo hrim hrim a ni awm e, mah se, kan pute ho kha chu a chung sen chhi pha an ni a, an duh duhnaah an tlan thei ni maw kan ti mai a. Chuti chung chuan kawng a chep ngang a, a hnuhnung lama tlan motor pakhat khan chawhmeh zuartunu thil zawrh kha a chil sak ta nge nge a, chu nu chu thinrim takin a au tuar tuar a, mahse motor-a chuangte chuan an tlan liam san daih mai a ni. Cheng tlem te te hlep pawha lawm ṭhin chawhmeh zuartunu tan chuan tomato khati zat inchil pherh sak chu na tak tur a ni ve reng a ni.

Ṭhianten fiamthua an sawi ṭhin chu hman deuha kan hotu pakhat chuan VIP light chhi pha tura a beih nasatzia leh an chhit theih hun rei si lohzia, chuvangin kuhva leia chhuah chang pawhin chhit zel tur, nuthlawi rimnaah pawh chhit zel tur a ti e an ti a, a huana a fehnaah pawh a chhi zel mai ṭhin niawm tak a ni. Minister leh sorkar hotu lian nupuite zingah pasalte VIP light lo ṭawmpui chi an la awm zauh zauh niin sawi a awm bawk a, heng ho hi chu an hmanlai tawh a ni ber mai.

Sorkar laipuiin VIP culture tibo turin hma a la a, VIP light pawh India ram pumah a bo telh telh dawn niin sawi a ni a, state tam takin eng sen chhit hi tihtawp an tum a. Kan Chief Minister pawhin a motor chunga eng sen chu hlip thla ve ta a niawm a, kan Chief Secretary phei chuan a hlihna a rei tawh niawm tak a ni. Kan hotu lian ber pahnihin hma an hruai chuan ro rel pawh a awlsam sawt ang a, heng hi hmasawnna lawmawm tak a ni e.

- H. Lalthanliana, Republic Veng