Politics a vir vel mek

Kum 2018 kum tawp lamah Mizo­ramah MLA kan thlang dawn a, tunlai chu MLA nih tum, MLA ni sa ning, Congress hrim hrim hne tawh, MNF la duh bawk si lo, NEDP aupui, SEDP vanga tlin tum, midang aia ṭha zawka inngai, Mizoram hmangaihtu thar, tih tak zeta ram leh hnam veitu, inthlan tur phurpui ve hrim hrim leh he lam ngaihven ve hrim hrim hi an kat nuk mai le.

Keini ang tana thlirna lam ve thung chu “Tute nge thawk­ho dawn?” tih lam daih hi a ni. MNF hian an mal din tur thu an puang chiang tawh a, anni hi chu mal din tura inpuang ngam an ni. NLUP sawiseltu party hian NLUP aia pawisa tamna SEDP sem an tum a ni awm a, a policy zawng chuan thil thar tun thlengin an la nei lo.

Congress sawi hmain BJP lam han luhchilh lawk ila, anni hi ZNP nen khan an thawk dun mai dawn emaw tih turin an awm a, tunah hian BJP kal dan hi a tawpa tawpa MNF nena thawk dun tur an ang hle mai. BJP hi chuan an mal din chuan MLA an la nei phak dawn lova, chhim lama bial pakhat saw an va thlithlai deuh a ni awm a, an mal din chuan an la tling lo ang. MNF nen inzawm se a fuh ka ring.

ZNP hian rei tak chhung chu Congress aiin MNF kha an bei na zawk a, a chhan chu Congress nen inzawm an beisei vang a nih hmel a. Seat insem lamah an buai nghal deuh pawh a ni thei a, tunah chuan ZNP chuan Congress chu an bei leh tawh a, “MNF leh Congress tel lohna sorkar” tiin an sawi leh tawh. ZNP kal dan hi chu ka hrethiam chiah lo.

Congress hi MLA an ngahzia en chuan ngaihṭha tur an nihlaiin an tla thei tih inhriain an ngaih hi a ṭha bik der lova, India ram hmun dangah a Congress zawnga paih thlak an nih avangin an zam ru deuh ngei ang. Hetihlai hian Punjab-ah hneh takin an tling a, Goa leh Manipur-ah MLA ngah ber an la nih theih avangin rin aiin an fei ang. Mahse Congress leh a leadership hrim hrim hi mipui hian an ngaizawng tawh lo.

Pawl thar ding tura thawm nei hi an ṭhat hmel viau ṭhin a, mah se an ṭha tluantling ang em? PRISM chuan inthlan an chuh tur thu an puang tawh a, pilitical party-ah inlet lo mah se an nihna chu political party a ni ta - hengte hi inthlan ti ngaihnawmtu tur chu a ni.

MNF hian BJP hi tunah duh lovin lang mahse an kawp ka ring a, Congress hian thiam takin third front din tir ngei an tum ka ring a, a pathumna pawl intel khawm tan chuan an kawp pui tur chu MPC leh ZNP a ni mai dawn a, inthlan ngaihnawm tak a nih ka ring.

- Laltlanmawia