Sem sem, tling tling

Hmanah chuan “Sem sem dam dam” kan ti ṭhin a, tunlai Mizoramah chuan, “Sem sem tling tling” kan ti dawn a ang khawp mai. Zep nak emaw New Land Use Policy (NLUP) hi Congress tlin chhan a ni chiang mai a, Chief Minister hi tun hma MNF hun hmaa kan lo hrawn tawh leh kan hriat chian kha a ni a, kan paih tawh hnu kha a ni a, tuna hneh em em maia an tlin nawn chhan chu NLUP an ‘sem’ tak tak vang a ni mai.

MNF hian a tirah NLUP hi an dova, an sawisel nasa teh kha a nia, a tirah phei chuan, “An sem tak tak lo vang” tih kha an tlangau hla a ni a, Congress-in an han sem tak tak tâkah chuan an au hla an thlak a, NLUP tak hi chu an sawisel ngam tawh lo. Tichuan, MNF pawhin NLUP ang chi chu an duh ve ta a, chu chu Socio-Economic Development Policy (SEDP) an ti.

Thil hi awih tur chin hriat a harsa a, Congress-in nuai 1 sem an tih khan kan awih lo deuh vek a, nuai 1 chu an sem ta chiah lova, nuai 1 tlukpui deuhthaw chu an sem ta a. Hei hian kan ram economy a chawi kang sawt nge chawi kang sawt lo, retheihna a um bo nge um bo lo, tlang ram lo neih thlakna a ni nge ni lo, Mizoram hmelhmang a thlak nge thlak lo tihte chu mahni ṭheuhin kan teh a, thutlukna chu mi pangngai chin chuan kan nei fel vek tawh.

Tuna SEDP chung­changa MNF thu­sawi tam tak hi chu an tihlawhtling leh thei maiin ka ring. Congress pawhin NLUP-ah hian an thusawi hi an bawhzui thei deuh roh tlat a, MNF lam thusawi nuih tiza thung erawh chu lehkhathiam lote hnena pawisa pek tum­na lam hawi kha a ni.

MNF president thusawi nia Vanglaini ngeia in chhuah kha han chhiar nawn ve mah ula, mumang a sawi nge duhthusam a sawi nge tih pawh ka hrethiam phak lo.

MNF President chuan, SEDP hnuaiah sing bi den dena sum sem a ni dawn lo tih sawiin, "Chhung tinte’n bul ṭan tirh aṭanga eizawnna nghet an neih thleng chhawmdawlna leh ṭanpuina pek an ni dawn. Chhung tinte’n eizawnna nghet an neih theihna tur chuan a tlem berah cheng nuai thum tal an ma­mawh tih kan hria. GSDP tihsan dâwrh kan tum dawn.

Mizo contractor tan a tam thei ang ber hna siam a nih theih nan Mizoram construction corpora­tion din a ni ang a, hei mai bakah hian, lekhathiam hna hmu lote tan unemployment allowance thla tin pek a ni ang," a ti a; lo neitute chu crop insurance leh price support siamsak an nih tur thu a sawi.

SEDP hnuaia ‘unemployment allo­wance’ te hi a pui dawn hian ka hre khawp a, nuih loh erawh a harsa viau thung. A tu zawk pawh hi tling se kan la sem zel dawn a, tlin tum luatah sem hi an thupui ber a ni.

- Lalthansanga (ST-a)