Mizoram mipui tam zawk kum khat sum lakluh Rs. 3000 a tling lo

Mizoram sorkar hnuaia Planning & Programme Imple­mentation Dept.-in Economic Survey 2016-17 a tihchhuah aṭanga a landanin, mi pakhat sum lakluh tam lam chhutin, Mizo­ram mipui zaa 55.64 ten, mi pakhat su lakluh tam lam chhutin, kum khata an sum lakluhin Rs. 3000 a tling lo. Heng mite hi loneih leh a beh­bawma in­nghat an ni.

Economic Survey 2016-17-a a landan chuan Mizorama mihring awm zaa 60 te hi loneih leh a kaihhnawih, Agri­culture and Allied activities-a innghat an ni. Kum 2014-a Statistical Handbook chhuakah khan Mi­zo­ramah mihring 10,97,206 kan awm a, loneih leh a kaih­hnawiha innghat hi mi 6,58,323 an ni. Heng mi, loneih leh hemi kaihhnawiha innghat mi pakhat zelin kum khata a sum lakluh chawhrual chu Rs. 2,938 a ni a, mi pakhatin thla khatah Rs. 244.83 thawk chhuak ang a ni. Heng miten Mizoram State Domestic Product-a an thawh zat percent chu 18.75 a ni a, chu chu Rs. 1,93,42,06,875 (tluk­lehdingawn 1.9) a ni. (Report-a lang hi kum 2014-15 chhunga Mizoram sum thawh chhuah a ni).

Sector dang pahnih - secondary leh ter­tiary sector ten kum 2014-15 chhunga an sum thawh chhuah belhkhawm chu 8,38,15,63,125 (tluk­lehdingawn 8.38) a ni a, heng sector pahniha innghat hi mi 4,38,883 an ni a, Mizoram SGDP-a an contribution percent hi 81.25% a ni. Heng sector pahniha innghat, mi pakhatin kum khata a sum thawh chhuah chu Rs. 19,097.48 zet a ni a, thla khatah Rs. 1,591.45 thawk chhuak ang a ni.

Loneih leh a kaih­hnawiha innghat­te leh secondary & tertiary-a innghatte sum lakluh a inthlau hle a, hei hian Mizoram hmasawnna a kairual lo hle tih a tilang a, Mizo mipuite kan inthlau hle tih a tilang hle. Loneih lama inhmangin kum khatah Rs. 2,938 chauh a thawk chhuak a, chutih lai­in secondary & ter­tiary-a miin kum khatah Rs. 19,097.48 a thawk chhuak.

Agri­culture & allied acti­vities-a innghatte hi thingtlang lam mi an ni ber a, heng mite hi an rethei hle tih a lang a, khawpui nena sum lakluh a inthlau hle.

Thingtlang lamin hma an sawn chuan Mizoram pum hma kan sawn dawn tih a chunga tarlan aṭang khian a lang chiang hle. Thingtlang hma­sawnna tur chu ei­zawnna ṭha leh rin­tlak an neih a ngai a, kawngpui ṭha leh kawlphetha mumal tak an neihte a ngai. Miin eizawnna ṭha leh tlo a neih phawt chuan a awmna leh a chhehvelin hma a sawn ngei ngei dawn.

Mizoram pum hma­sawnna tak tak kan duh chuan thing­tlang lam ngaih­thah a thiang lo ang.

- Rochungnunga