SORKAR HNATHAWK LUNGAWI LOHNA

Mizoram sorkar hnathawkte'n dearness allowance (DA) an lak mek 28% chu 34%-ah tihpun phûtin tunlai hian badge dum an bel mek a; hlawhting mai lo ta se, na zawkin an la nawr zel mai thei. An phût hi a phûttute tan chuan thil àwm tak a ni thei ang a, sorkar tan leh sorkar hnathawk ni ve lo tan chuan a àwm lo viau ve thei bawk.

DA hi thla ruk kár danah an tipung ṭhina sawi a awm a. Mizoram sorkar hnathawkte'n hun rei tak DA 17% (basic pay aṭanga chhûtin) an lâk hnuah leh lungawi lohna lantira sorkar kar an tum ut ut hnuah Mizoram sorkar chuan March 2022 aṭang khan 11%-a tipungin, 28% a pe ta a. DA chu 28%-a tihpun a nih chhungin sorkar laipui lama mite chuan 34% an lo la leh hman tawh a, July 2022 aṭangin 38% an la dawn nia sawi a ni bawk.

Badge dum bela lungawi lohna lantir huaihawttu ber Federation of Mizoram Government Employees and Workers (FMGEW)-in an tarlan ṭhin chu, Pay Rules ang chuan, state sorkara thawkte chu sorkar laipui hnuaia thawkte hnena DA pek ang zat (percentage) pek tur a ni àwm a; Pay Rules chu hmu ve lo mah ila, a dik turah ngai ila. Rules ang taka kal tur a nih chuan, Mizoram sorkar hnathawkte'n DA 34% pek an phût hi a àwm viau angin a lang.

MAHSE MAW...

Mizoram sorkar hnathawk pawlte'n sorkar laipuia thawkte DA lâk zat an hmuh len a, anni aia DA la sang zawkte an awh a, an lak zat a sàn zawkna 6% an hmuh len viau lai hian, sorkar laipui hnuai leh Mizoram páwna thawkte'n Mizoram sorkar hnathawkte hamṭhatna neih ang an neih ve loh 'Income Tax' àwl (exempt) a awm. Anni'n income tax an pêk ṭawk ṭawk laia Mizoram sorkar hnathawkte'n (sorkar hnathawk lote pawhin) an pe ve tlat si lo hi hmuh len a awl viau mai.

INCOME TAX CHU

DA hi sorkar laipui rate angin 34% pek ni ta se, tuna an lak mek 28% aia a tamna chu 6% a ni dawn a. Chu 6% chu a sum (amount) záwngin engzat nge ni dawn ka hre lo a, mi pakhatin a DA 6%-a a pun chuan cheng engzat nge thla/kum khatah a lâk belh dawn ka hre hauh lo.

An inkhaikhin ber leh an ṭan chhan ber - sorkar laipui hnathawkte lak ang zat lak an duh lai hian, sorkar laipui hnathawkte leh non-tribal state-a thawkte hlawh zinga tam tak a kalna, Mizoram leh Mizoram sorkara thawkte'n hamṭhatna an neih bik Income Tax chungchang hi i'n chhût zui teh ang.

IRS (Income Tax) officer pakhat sawi danin, kum 2022-23 chhunga income tax pek zat tur chu - kum khata Rs 2,50,001 leh 5,00,000 inkar la lutte'n 5%, Rs 5,00,001 leh 10,00,000 inkar la lutte'n 20% leh, Rs 10,00,000 aia tam la lutte'n 30% pek tur a ni a; Rs 2,50,000 aia hniam la lute'n an pek a ngai lo.

Mizoram sorkara a ngheta thawkte zinga hlawh hniam ber Group-D employee-te'n hlawh an lak zat chiah ka hre lo a, Mizoram páwn, non-tribal state-a thawk ni ta se, an zinga ṭhenkhatin income tax an pek a ngai lo mai thei a, ṭhenkhat erawh chuan an pek a ngai ang. Group-A officer chin phei chuan 30% an pek a ngai hlawm àwm e.

Entirna han sawi ta ila. Thla khata Rs 1,00,000 hlawh chuan kum khatah Rs 12,00,000 a hlawh tihna a ni a, kum khata income tax a pek tur chu Rs 3,60,000 (30%) tihna a ni. Thla khata Rs 50,000 hlawh chuan income tax kum khatah Rs 1,20,000 (20%) a pe ang a, thla khata Rs 30,000 hlawh chuan income tax Rs 18,000 (5%) a pek a ngai dawn tihna a ni. A sang far far hle. (Heng hi income tax assessment a ni a, rebate leh thil dang neuh neuh chhût tel tur a awm avangin a zat hi a taka an pek nen inang kher lo). State danga awm mek Mizo IAS officer pakhat chuan, income tax an pek zat chu thla hnih chhunga an hlawh zat ang velte a nih theih thu a sawi!

Sorkar laipui hnuaia thawkte leh Mizoram páwn lama thawkte'n income tax an pe tam hle tih a chiang a, a uiawm tham hle ang. Mahse, income tax-a sum an pek ṭawk ṭawk ang chu Mizoram sorkar hnathawk, Mizoram chhunga thawkte chuan an pek ve a ngai hauh lo – income tax ai chu an fanghma no ei miah miah mai a ni. Hei tak hi a ni, sorkar laipui hnathawkte nena intehkhin zel a remchan lohna leh DA an inpek zat ang ang Mizorama lo inpek ve zel mai a àwm lohna lai chu.

SORKAR HNATHAWK TANA SUM SÊN
A hriate sawi danin, tunah hian Mizoram sorkar chuan a hnathawkte hlawh atan thla khatah cheng vbc. 264 vel leh pensioner-te hlawh atan vbc. 70 vel a sêng ṭhin a, a vaiin vbc. 335 vel a ni. Kum khatah chuan cheng vbc. 4,020 (335X12) tihna a nih chu. Thla 13 hlawh late an awm avangin hei ai hian a tam ngei bawk ang.

Thla khata cheng vbc. 335 vel (kum khatah vbc. 4,020 vel) chu sorkar hnathawkte leh pensioner-te hlawh atana Mizoram sorkarin sorkar laipui aṭanga sum a hmuh (untied grant) zawng zawng aṭangin 89% vel a tling zu nia! Mizoram sorkar hnathawkte DA chu 6%-a tipungin, 34% pek ni ta se, Mizoram sorkarin thla khatah cheng vbc. 13 vel, kum khatah vbc. 156 vel a sen belh a ngai dawn a; chu chu state sorkarin Untied Grants a hmuih zawng zawng aṭangin 92% vel a ni dawn tihna a ni.

HARSATNA AWM BELH THEI
Mizoram sorkar sum dinhmun ṭhat lohzia an sawi ṭhin a, sorkar hnathawk hlawh leh inrêlbâwlnaah sum a kal tamzia an sawi ṭhin a. FMGEW-in an phût ang leh Pay Rules behchhanin Mizoram sorkar hnathawkte hi sorkar laipuiin a hnathawkte a pek ang zat DA pek ve zel ni ta se, Mizoram sorkar phurrit a nasa tial tial dawn tihna a ni a. Chu chu Mizoram sorkar mai bakah, Mizoram leh a chhunga cheng mipui te, sorkar hnathawkte tan ngei pawh harsatna khur thûk taka min hnûk luttu a ni ang tih a hlauhawm. Sorkar sum harsatna avangin tunah pawh sorkarin pension-te'n an chhuahpui tur sum a pe mai thei lo reng a, chuvang chuan, tuna thawk lai ngeite pawh pension-in an la chhuak zel dawn a, anmahni ngei pawh an inhrêk tel ve zel tihna a ni thei.

AN PHÛ RÊNG EM?
Thua inziak (dan/rules)-ah chuan, Mizoram sorkar hnathawkte'n phût neia lungawi lohna an lantir mek hi a àwm em em a, an phú em em. Mahse, sorkar hnathawk náwlpuite hna thawh dan leh hna an thawh hun chhung ngaihtuahin, an phú rêng em? Mizoram sorkar pachhiatzia lah kan hria a, sorkar hnathawkte hi a hre chiang hlei hlei an ni ang.

Tunah hian sorkar pisa ṭan hun zing dar 9:00 a ni a, dar 9:00-ah chuan mahni awmna/ṭhutna thlen tawh tur tihna a ni. Chuti a nih chuan, a hun taka pisa thlenga hna thawk ṭan tur chuan in aṭangin dar 9:00 hmain chhuah a ngai. Mahse, Mizoram sorkar hmunpui ber, Secretariat panna kawngpuiah hian zing dar 8:30 aṭanga dar 10:00 thleng han ṭhu ve mah teh u. Zing dar 9:30 hma lamah chuan office kal tur lirthei tlân in hmu tam lo hle ang, dar 9:30–10:00 inkarah an tlân lut zut zut thung ang. Tlai an tam hle tihna a ni. Chu chu Secretariat chauh ni lo, hmun danga sorkar office-te dinhmun pawh a ni tho.

Sorkar hnathawk zingah dar 9:00-a thleng hman an awm nual ang a, mahse, a náwlpui chu an thleng hman lo a, dar 9:30–10:00 inkarah leh dar 10:00 hnuah an thleng ṭhin. Mi tam tak chuan dar 9:30 leh a hnu lam hi pisa kai tura in aṭanga chhuah hunah an ngai tawh niin a lang thei hial. Pisa bàn hun tlai dar 5:00 a ni a, pisa/hnaa dar 5:00 awm thleng hi eng zat (%) tak awm ang maw? Hetih lai hian, sorkar hnathawk zawng zawngin office hun an bawhchhe vek kan tihna a ni lo a, a hun taka thleng zat zat eng emaw zat an awm ve bawk tih erawh hriat a ṭha.

Heng bakah hian Mizote chuan chhiatni ṭhatna kan ngah a, sorkar hnathawkte pawhin chawlh (leave) la si loa hna aṭanga chhuahna neuh neuh an ngah hle. Inrinni leh Pathianni zawng zawngah an chàwl tia sawi theih a ni bawk. Ṭul bik thilah tute emaw an kal a ngaih zauh cháng erawh a awm.

Heng zawng zawng hi mipuite'n an hre ve khiau a; mahni hamṭhatna tur ûma sorkar hnathawkte'n lungawi lohna an lantir ngút mai ṭhin hi mipuiin an hriatthiam loh zual phah ta ṭhin a ni. Chuvangin, sorkar hnathawk pawlte pawhin an awm dan leh an dinhmun te, Mizoram sorkar dinhmun te, mipui sûkthlêkte thlír chungin ngaihtuahna an hman a ṭul niin a lang e.

MI SAWI ṬHENKHAT
* Sorkar hnathawkte hi an huangtau mah mah a ni.
* Dil hi chu thiangah ngai ta ila. A baka han nawr erawh thil àwm lêm lo tak a ni.
* Income tax pek hi châk chang ka nei (sorkar hnathawk sawi)
* Kan sawrkar dinhmun chhûtin tute emaw thîk ngawt zel tur hi chu kan ni lo maw le.

- K Zothanpara