THLASIK MAUPUAH

Awle, kan thlasik mauphuah ve phawng mai teh ang. Kan nula tlangval flim chan thiam tak takten kan Mizo zia mual liam tawh hnu leh Sailo lalin an khua leh tuia ro an rel lai hun tunlai ṭhangthar tena kan hmuh ve phak loh leh kan hriat ve phak loh kan ṭhalai lem chan thiam tak takten rawn changin min rawn hmuhtir a, a duhawmin a ngai­natawm hle mai.

Awle, hetiang Mizo flim duhawm tak takte hi kan la siam lehzel turah ngai ila. Kan silh leh fen kan thuamhnaw in bel te erawh hi chu a hun leh hmun a zira inthuam hi chu a ṭha lo maw!

Lal leh an khawn­bawlte rorela an han ṭhukhawm han hmuh hian kawr ha lo a, saruaka an vai awm vek te hi a lutuk deuh lo maw? Kawr tuihnai vak lo, a ban tan hmawk, ṭet deuh hrip hrep te kawr hma chilh awm lo, la hruala suih mai maite pawh a ṭhen te hi chuan ha ta mai mai se. Vaibel te pawh hi vai pehkhawh fur lutuk lo deuh ṭhin bawk sela a va duhawm ve.

Lal nute pawh hi tapchhak zawlah hi chuan kut ni vang­thla te a nih loh hi chuan, Kawrchei leh puan chei mawi taka inthuam leh vakiria han khim vel te pawh hi a inhmeh lo deuh lo aw?

Tin, a changtu nula leh tlangvalte pawh a hun leh a hmuna zirin inthuam se, a changtupa mi kawlh sakawlh lakah ram pilrila an ram mutna leh an chhuahnaah te Ngotekherh thiang­hlim tak mai an han vengte hi a inmil lo deuh lo maw?

Chutiang bawkin a changtunute pawh hian tui an chawi emaw thing an phur emaw eng pawh ni sela, hna thawk an nih chuan kawr leh puan thianghlim leh fai em em mai a an han in belte pawh hi a inmil lo deuh lo maw?

Kan lemchan a zirin nulate hi chuan pawnfen phel fengin, Kawkpuiziakzial emaw lenbuang­thuam emaw te han feng sela, a inhmeh viau lawng maw?

Awle, thu dangin tlang in kawm daih teh ang. Puan bih leh veng tih hi chanchinbuah a rawn lang tam hle mai a. Chhim leh hmar, chhak leh thlang thil hriat dan leh hmuh dante pawh hi a inang lo ve thei a ni. Dik zawk leh hre zawk nih inchuh reng renga awm hi zawng a buaithlak ṭhin em mai!

Kan hriat dan tlang­pui mipain puan an veng a, hmei­chhiain puan an bih a. An inbual dawn emaw an insil dawn emaw a hnute khuha puan an han bih hi chu a tlangpuiin hnute khuha bih a nih avangin hnubih an ti deuh bik ṭhin.

Chuvangin, hmei­chhia in puan an bih a, mipain puan an veng a, hmei­chhiain an hnute khuha puan an bih hi chu hnubih a ni tih hi i pawm mai ang u.

- R. Sawithanga, Kulikawn