VISHAL vs MIMA

Tunlai ti ti tam leh thu inchuh anga langthei Vishal leh MIMA chungchang hi FB leh whatsapp group-ah chhiar tur a tam hle a, tute pawhin kan ngaihdan kan sawi a, article ṭha tak tak mithiam leh chik mite aṭangin ngaihdan a lo chhuak bawk a, hrethiam lo tan pawh bengvarna tham a ni. Ram leh hnam himna tur nia kan hriatah ngaihdan kan seng a, kan rilru putdan pawh a hriatthiam theih viau mai.

Vishal hian a tirah chuan anmahnia dawr inhawng (company own company operate) tum an nih hmel a, MIMA ten an dodal tak avangin Franchisee angin an kal ta niawm tak a ni. Hei hi fake document nge a tak tak erawh hriat a ni lo.

Mizoramah mi nuai 12 vel kan cheng a, vai rama veng pakhat ang vel chauh kan nih lai a hnam rilru kan pu lo leh hnam a chiang lo kan awm hi a vanduai thlak hle mai. Vaiin sumdawnna kum sangkhat chuang an kal pui tawh laiin Mizote chu kum 100 awrh kan sumdawng ve a ni a, tehkhin rual kan ni lo. Kum 2000 hma lama dawr nghaktute leh kum 2000 hnu lama dawr nghaktute chu danglam tawh tak an ni, chutiang deuh bawk chuan office hnathawkte pawh kan danglam tawh hle a, polite tak tak kan ni deuh vek tawh. Kan hnathawh chhan kan hre tawh. Vai dawr tih hriat chian em em Mizovin ‘ka dawr’ kan ti tlat mai ṭhin te hian pawisa engzat nge an hlawh ang aw ka ti ṭhin. Eng vangin nge dawr an siam ve mai loh va vai dawr chu an ta anga an sawi kher ni. Heta

ṭang ringawt pawh hian hnamah kan chiang loin hnam kan hmangaih lo hle tih a lang. Hlawkna chhete ka lo neih chuan ram leh hnam humhalh lam chu kan ngaihtuah thleng phak lo hle.

Vishal mega mart lo awm hi sawrkar hnathawk hlawh tam takte hian an duh zawk emaw a tih theih. Kan tu leh fa tuchhuan lo la awm zel tur te hi sawrkar hnain a daih dawn loh avangin sumdawnna leh kuthnathawh chiah duhthlan tur kan nei a, tun aṭanga hnam kan humhalh loh chuan a tuartu tur chu kan tu leh fate (next generation) an ni. Hemi lo hmu lawk leh hrethiama MIMA-in Vishal duh lohna an lantir hi an ti ṭha hle. Hetianga hma an la a nih rau rau chuan hnam dang sumdawng, vai mix zuar leh thirchhe zawngte thleng hian hma la in do zel se la a duhawm hle. MIMA hruaitute hi hausa ve tak tak, nuai 100 tel nei an awm fur awm e. Anmahni chauh inngaihtuah nise he thilah hian an buai lo mai thei. Mahse ram leh hnam an hmangaih vanga hetianga economic assimilation bulṭanna tur anga ngaih theih Vishal an do hi an fakawm thlawt a ni. MIMA hian Vishal hi a do ngawr ngawr lovin ka hria a, hetianga Vai hausa tawntaw an lo awm tawh chuan company dang tana kawng hawngtu an nih theih avangin an dodal mai niin ka hria. Tuna kan dinhmun leh rilru put dan en hi chuan Vishal anga super market hi kan ram leh hnam tan a la him lo hle a ni.

Mizo ṭhalai tam tak hian changkanna emaw kan tih hi cell phone leh incheina man to tak hi em mi? Sum leh pai kan lakluhte pawh a tlem emaw a tam emaw bank-ah khawl nachang i hria ang u. Kan hahdam ta lutuk leh fate kan duat dan te hian taimak leh tihtakzeta ei hmuh aiin nuamsa taka ei hmuh tumnaah min hruai lut zawk a ang. Mipa fa chuan a chhungkua nupui fanau chawm leh enkawl chu a mawhphurhna a ni tih hriat a ṭha hle. Chawhmeh zuar, hawker, dawr nghak, office hnaah te hian mipa aiin hmeichhia hmuh tur an tam zawk mah te hi a zahthlak. Vai pakhat chuan khawlaiah hmeichhia eizawng hmuh tur an tam zawk si a, Mizo mipate hian eng nge an tih ve ṭhin tih tih min zawt a, chhan thiam a har khawp mai.

Kan rama mi hausate hi Vishal boruak aṭang hian harh chhuak thei ila a duhawm hle. Kan sum leh pai bank-ah daha a pung um ringawt lovin investment leh partnership a company din te hi tih nachang hria ila. Direct-in factory/ manufacture-ah bungrua lain phai lam rate-in dawr lian tak tak te din ve ila, Mizo mipuite thil tlawm lei theih turin chhawp chhuak ila, kan ṭhalaite tan hna tam tak kan siamsak bawk dawn a ni. Ṭhalai lehkhathiam tak tak an tam tawh a, an tan hna i siamsak ve tawh ang u.

A nghawng theihte

Vishal mega mart an awm tawh chuan Big bazar te, Bazar India, Pantaloon, Elec­tronics te, Hardware, Courier & Logis­ticste te thlengin Mizoramah sumdawn a harsa lo a ni tih an hriat tawh chuan an lo lut zel tawh mai dawn a ni. Thla khatah nuai 100-500 kan ram sum chu vai ramah a luang thla ang a, helai a cham bang tur chu dawr luah man leh thawktute hlawh chauh a ni ang. Pathian ram thil pek sumdawngten sawma pakhat kan pek ve ṭhin te pawh a tlahniam dawn a, Pathian ram zauhna tura missionary chawmna kan thawh khawm thlenga a nghawng hun a la thleng ang. Tin, bank-in sumdawngte loan (cash credit) an pek te transaction a chhiat phah ang a, loan rulh theih loh vangin bank-in a tuar thei bawk. Dawr te nau hmanga chhungkua chawm ve ṭawk ṭawkten an tuar bawk ang; heng zawng zawng ngaihtuah tel hi a ngai tak zet a ni.

Kan pi leh puten lu chhum ban chhum huama ram leh hnam an lo venna hi keini ṭhangtharte hian kan humhalhin kan chhawmnung tlat tur a ni. Kan ṭhenawm state-ah chuan a ram mi (native/ aborigin) te sumdawng hmuh tur an awm ta lo. Hei hi hriain MIMA hian nasa takin an do a, CYMA te pawh an ngawi mai mai thei lo - kan do tlan a ngai hle mai. Kan vela hnam dangte hian min chimral an tum reng a, kan ram hi an it em em a ni tih hi i hrethiam ang u. Kan chak lohna/ panna lai hriain thiam takin min thlem ang a, min la thlem zel ang; kan do tlat chuan tuman min hneh ngai lovang. Mizote behchhan lo chuan an rawn awm thei ngawt bik lo tih hria ila kan in leh dawrte Mizote chauh luah tir ila, thil lei tur pawhin Mizo zawrh ngei i lei hram hram ang u. An thil zawrh kan lei loh ngam chuan an awm rei ka ring lo, a chhan chu vai leh vai in hlawkna tham leitu an awm dawn loh avangin. Kan inlungrual lohna lai leh kan sihhnipna lai te hi keini ai hian an hre zawk si hi a buaithlak lam chu a ni. India ramah hian Maruari hnam hi sumdawnnaah a fawng chelhtu an ni a, an inzirtir a, an inchhawmdawl tlat a, dawr nghak atana an hman ṭhin kha anmahni pualin dawr an hawng ve leh mai ṭhin.

Mipui rilru lam kan thlir chuan thil to uchuak tih hi sumdawngte sawiselna ber niin a lang. Dawr ṭhenkhatah chuan dik mah se dawr zawng zawngah chuan a dik loin ka hria. Dawr kaite pawh kan thil zawrh to uchuak loa kan zawrh a ṭhat ka ring. Christmas dawn leh off season-ah te hian SALE runpui te nei ṭhin ila, midangte tan malsawmna ni ve ang u. Ringlo mite pawhin an sakhua hunpuiah an tih theih chuan keini ringtute tan chuan Christmas hi midangte kan ṭanpuina hun ṭha ni ṭhin tawh se a duhawm khawp mai.

Entirnan, Millennium Centre, Solo­mons Cave leh New Market-ah te hian bulṭanin fb leh whatsapp group-ah in seng so lovin information thawn chhuak sela mi tam takin awlsam te in kan hre mai dawn a ni.

- Lalruatfeli