Party tichhetu sum hmachhuanna
Khawvel politics history-ah hian political party lo tlu chhe ta an awm ṭhin a. India ramah ngei pawh party lina leh state khat aia tama rorel thei khawpa liante pawh an lo tlachhe tawh ṭhin a ni.
Mizoramah pawh hian party tlachhe ta te, party intuaitharte leh party thar liau liaute pawh a lo ding ve tawh ṭhin a, heng party-te hi thlir vang vang ila, sum hmachhuana an kal chuan tlachhe thei lo hi an awm lo a ni.
Tun hnaia Mizoram enkawltute ka aṭanga kan hriat ngun em em chu pawisa tam thu a hi ni. Pawisa tam thu an sawi tuk lawkah thil dangah pawisa tlem thu an sawi leh si ṭhin. Hnathawhna tura pawisa awm loh thu sawitute thovin pawisa sema sem tur a tam thu an han sawi leh tho mai zel a, hetiang reng renga inkhualtelem politics hi chu kan bansan a va han hun tawh tak em ve le.
Congress party khan sum an hmachhuan kan ti thei ang a, cheng nuai 1 zel an sem avang khan tla thei tawh lo leh rorel leh tura indin nghat takah inngaiin an NEDP pawisa pawh hman lovin an dah khawm a ni.
Kum 2028 ah inthlan a awm ang a, chumi zawh chuan an sorkar leh anga an pawisa khawl te chu an hmang ang tia an ngaihtuah laiin MNF an rawn lang a, an sum khawl sate hmangin MNF in bul an ṭan ta ham ham a ni.
MNF chuan SEDP hmangin cheng nuai 3 sem an intiam a, Pu Zoramthanga thusawi video pawh mobile phone tinah a la awm a, he pawisa sem tumna boruak bawk hi tlak chhiat pui leh theih a ni.
MNF ah hian pawisa ringawt sawi ṭhin hruaitu hi an awm a, sawi ve ngai lo te pawh an awm a, pawisa sawi sawi ṭhintute avanga mipuiin pawisa hmachhuan hi an paih hun a thlen chuan pawisa tamzia sawi ve ngai lote pawh an tla tel vek dawn a ni.
Kan Bible-in tangka sum ngainat hi sual tinreng bul a ni a tih hi mihringah a dik ang bawkin pawl leh party tan pawh a dik tho vang a. Sum hmachhuan lova hnathawh hmachhuan te, mipuia an inpekna hmachhuante hi a ṭha zawk a ni.
Sum ringawt sawitute hi chu mipui hian ngaih khatah an neih chin kan thleng ṭan a, sum hi chu innghahna tlak a ni si lo.
- John Remruata Chhangte