MIZORAM HI A LA CHHE VEK LO

Tun hnai mai hian inzirtirna dik lo tak mai 'Mizoram chu a chhe vek tawh' tih lam hawia thuziak chhiar tur a tam hle a. A hman hman leh a peih nazawngin social media lamah an ziak hmuh tur a tam mai. Mihringah pawh mahni chauh dik, ṭha leh fel inti; midangte felna leh ṭhatna lai reng reng hmu duh ngai hauh lo an awm ang hian, party politics-ah pawh mahni telna party ni lo tawh phawt chu, sorkar hmalakna reng rengah an hmingṭhat bik hlauvin a ṭhatna lai hmuh tum reng reng lo, do nghala sawisel ringawta ram ṭang hi an awm tlat a ni. Hetiang hi rorelna la chelh ve ngai hauh lo lamṭangte hian an hrat zual hle bawk.

Sorkar hmasa Congress kaihruaina hnuaiah thil ṭha tih pawh a awm mai thei. Mahse, zu an zuar a, zu avangin mi tam takin nunna an chan ruih ruih a, hmeithai leh fahrah an pun phah a, kan kawngpui chhiatziate kha mi tinin kan la theihnghilh hman awm love. Driver rual leh NGO-te kha kawng chhe lai siamin an hnatlang sup sup a nih kha. Khatih lai khan Mizoram chu engkima chhe ta vek anga sawi leh ziah hmuh tur a tam lo hle thung.

Kum 2018 November-ah MNF a sorkar ve leh a, krismas leh kumthar hunpuiin a nang zui a. Sorkar anga hnathawh theih chu January 2019 aṭang chauh khan a ni. MP (LS) leh inthlan dang neuh neuh a awm chho nghal zut a, sorkar anga hmalakna tur kha election conduct rules-in a phuar chho zel a. Kum khat âwrh an sorkar a, khawvel, India leh Mizoram chu covid-in kum hnih leh a chanve chuang min han nuai leh a. Khawvel sorkar ropui ber berte pawh namen lovin an buai a. Tu sorkar mahin hripui lo leng tur kha hre lawk hek lo, Mizoram sorkar pawhin budget-a a dah lawk miah loh covid do nan sum tam tak a hmang a, development a kal tur angin a kal hleithei lo a, tunah covid ziaawm ṭanin an term tawp dawn lamah hma an la ve dawn chauh a ni. Covid kara hna an thawh nasatzia pawh a hre duh tan chuan haider rual a ni lo.

William Shakesprare-a'n 'Vanduaina hi a mal malin a lo thleng lo va, a huhovin a lo thleng zut zut a ni' a tih ang maiin, mihring pulh hri mai bakah vawk pulh hri a lo leng a, an thi ruih ruih a. Khawchhak lamah lir a lo nghing chhen a, chhim lamah namen lovin ram a kang a, ramri a buai a, khawchhak lam unau raltlan buaipui an ngai bawk a. Mizoram sorkar hian a inrinlawk miah lohna lamah sum tam tak a seng a ni.

Hetiang buaina hrang hrang karah Mizoram chu kan vannei a, Gas, ei leh barah harsatna lutuk tawk lovin kan awm zel a. Kawngpui chhe zualpui siamṭhat a ni a, tuna a chhe lai kan tihte pawh hi siamṭhat tura hmalak mek a nih vang a ni. Chief Minister, Minister leh MLA-te hi an ṭhuthluang mai mai lo tih a lang a ni.

Tichuan, Mizoram chu chhe ta veka chhuah rengtute hian a eng lai tak hi nge chhe ta veka an sawi chu ni ta ang. Khawi 'maw lai karah duhthusam ang thlap thlap chuan thil a kal vek lo pawh a ni ang. A thawka phita MNF sorkar hnuaiah Mizoram chu chhan tlak awm tawh lo khawpa sawi ṭhintute hian eng hmuhin nge kan ram hi an hmuh tih hi ngaihtuah tham a awm a ni.

Sawi leh sawi hnu, covid karah Pu Zoramthanga kaihhruai sorkar hian hna tam tak a thawk a. Hripui hi leng lo ni ta se, tuna kan hmuh loh leh beisei loh ram tana chhenfakawm tam tak an phawchhuak ngei ang. Mizoram hi a la chhe vek lo e.

- R.Lalhmangaiha, Bethlehem