Ruling party inlungrual lo

Mizorama ruling party ni mek MNF hi nasa takin an inlungrual lova, kum 10 zet opposition nih hnua rorel laia chhuah hreh si Secretary level chin leh a chung lam hian a hlawm lianin kum 2022 tawp lam a nih loh chuan 2023 tir lamah hi chuan an chhuahsan huk dawn" tiin WhatsApp group lian ve pangngai takah hian mi pakhatin a post a. Party hrang hrang mi an awm khawm ve nual a, ka rin aiin an rawn chhâng lova, MNF pa ruhkawl ve tak chuan, "Chhuah huk leh chhuah huk loh chu kan hotuten min enkawl danin a zir ka ring," tiin a chhang thung a ni.

Congress sorkar kha nghing thei lo, tla thei lo angah mi tam tak chuan kan ngai a, chhang kham takin kan kham vak lo. Kha Congress sorkar tla ta khan thil tihsual lian tham (scam) pawh a neih kan hre lova, a thawh pawh an thawk pangngai ve fu a, an tih dik loh chu zu an zuar tlat kha a ni.

Mimal chuan zu zawrh hi ka haw ve hauh lova, mahse langin kohhran mi tam tak hian an lo ngai thei lova, Congress thlakna tur an zawng ta a ni.

Congress party tlak chhan dang chu an Vice President Pu Lalzirliana ber khan Department lian chang kawp ṭun leh contract pawh a duh ang thala sem chung khan zawm pui dang kha a lo nei tlat a. Pu Lal Thanhawla te khan Pu Zira kha lungawi lo thei dinhmunah dingah an lo ngai lo vei rawk a, a inpu chhuak ta lu lu mai kha chu Congress Bhawan kha a nghing lawih asin le.

Pu Lalrinliana Sailo chhuak kha chu a awm ve hliah hliah a ni. Cabinet Minister (Health Department chang phak) ngat kha MLA fangah an paih dawp a, a hmaa, "Health Minister hi bâng rawh se," titute MNF kha a va zawm a ni.

Tunah hian ruling party zingah hian lungawi lo thawm a ri ve ta ret ret. Tuikuk Bial hian MNF bial ni rei tawh chunga 'Pawisa nei bialtu' pawh an nei lo hi an MLA lam thiam loh ni lovin party hruaitute mawhah ngaiin an lungawi lo hle niin an sawi a, Cabinet Minister Bial ṭhenkhat hian an bial chhungah pawisa/ hmasawnna an hnuk lut thei si lova inthikna a lian ṭan hle.

Sorkar sum neih loh sawi laia sum lo nei thei bîk riau MLA leh Minister te, central sum puk tia insawi a, state matching share Mizoram sorkarin a pek sak bîk te an awm hi chu dan pang­ngaiah a la dah theih.

Dan pangngai lo erawh chu, MNF zingah registered contractor ṭhahnem tak an awm chunga Class I contractor atana hman nia an hlankai tak, Kamrul Laskar a kutah cheng vaibelchhe tel contract a lut te, 2018 a MNF sorkar theihna tura mahni sum senga thawktuten hna an hmù thei lawi si lote hian MNF party aṭanga chhuah huk a hrin chuan kum 5 bâk hmang zui thei lovin an tawp der thei a ni.

- Vannunmawia