MIZO EL DIVINO MANCO (MIZO THE MAIMED GOD)
Mizoram football history-a hming dai tawh ngai lo tur chu, Phuldungsei tlangval Kum 23 mi Timothy Lalremsanga hi a ni. Ani pawh hi hming lemah “MIZO EL DIVINO MANCO” a nih loh pawn “MIZO ONE ARM GOD” ti ila a dik viau awm e. Vanduaithlak takin kum 3 leh a chanve a nihin electric transformer 11kv size connection wire ah vanduaina tawkin, a ban veilam tan ngai hial khawpin accident a tawk palh ta hlauh mai a.
Football hi a talent dawn niin an khua “Phuldungsei local team Nul Bial” pawh a lo champion-pui tawh a ni. An khaw ṭhenawm West Phaileng local team-ah pawh inkhel tur pawhin an hire ṭhin a, hei hian football a thiamzia a entir a ni. Football-ah chuan a ke dinglam leh veilam hmang thiam hlein left winger anga khelh chu nuam a tih ber ni mah se, attacking midfielder-a khel turin an chhawr hnem ber a, tlar hmaa striker role pawh a khel thei bawk a ni.
Tun tournament “LBS SUZUKI ALL MIZORAM INTER-VILLAGE FOOTBALL TOURNAMENT” ah mipui en hlawh ber niin an khua Phuldungsei tan rawn khelin, an match hmasa berah Ṭawizo 6-1 in an hnehna kawngah Goal hnih thunin, midang goal khung tur (assist) vawi hnih a rawn siamsak thei bawk a ni. An match hnihnaah Thiltlang tumin 2-1 a chak lovin an vanduai ta a, Thiltlang an tum hian goal hi ama freekick pet ṭha tak hmangin goal khat an khung a ni.
Khawvel football history-ah pawh hming dai tawh ngai lo tur, Uruguay footballer Hector Castro “EL DIVINO MANCO” (THE MAIMED GOD) an tih hial, a thenin “THE ONE ARM GOD” titea an sawi kha min tihrechhuak a, ani pawh kha a naupan lai kum 13 a nihin, vanduaithlak tak maiin electric saw (Electric ara) vangin a ban dinglam chu a lo chan palh ve tawh a, mahse beidawng duh lovin an ram tan World Cup (1930), Olypmpic Gold medal (1928 Men’s Football) leh Copa America (1926 leh 1935) a chawi thei a, chu mai bakah an club Nacional Club chu an ram Uruguayan Championship title 1924,1933 leh 1934 khan a chawipui bawk a ni.
Football history sawi chuan Hector Castro hi a hming chu a dai tawh ngai lo ang, chutiang bawkin Mizoram football history-ah chuan Timothy Lalremsanga hming pawh hi a dai tawh kher lo ang. “LBS SUZUKI ALL MIZORAM INTER-VILLAGE FOOTBALL TOURNAMENT” ah an khaw tan rawn fehchhuakin, a talent ropui tak a rawn phochhuak a, Hector Castro leh Timothy Lalremsanga hi khaikhin lam ni lovin, accident avanga an ban pakhat chan ve ve hi an tumruhna leh an beidawn duh lohna hian entawntlak zir tur tam tak min kawhhmuh a ni.
Ziaktu : MICHAEL RINZUALA PACHUAU