Zoram Mamawh Ber Chu

Kan thupui, Zoram mamawh ber chu, han tih ngawt mai chu hriatthiam a har deuh mai thei. Ni e, ramte chuan mamawh a nei ṭeuh ang a, a ber ang zawng kha chuan sawi a har mai thei. Mihringte pawh hian mamawh kan nei ]hin a, chu'ng zinga pawimawhzual deuhte chu – chenna tur in, chaw ei tur, thawmhnaw hak turte a ni. Ram changkangah chuan mamawh a sang deuh ang a, keini angah hi chuan kan mamawhte a la basic deuh mai thei. Mynmar ramte eng ngati nge a retheih reng, a nih loh leh thlaler vaivut ram Israel angte an changkan em em si le? In nuam tak pawh hi a luahtuin a zir loh chuan rei lo teah hrehawm takah a chang mai ṭhin. Aw le, keini Mizoramte eng ngati nge state rethei ber pawl kan nih reng le. Kan hruaitute mawhphurhna nge, mipui lamte zir loh vang.Kan ram hi a chhengchhe deuh tih loh chu ram ṭha tak a ni ve a, mahse, kan chhawr ṭangkai miah lo. Hengte han chhui chhuak tur hian vawiinah kan ngaihtuahna i'n seng tlang dawn teh ang.

Mizoram Chanchin – Kan pipute hun lai chuan ram intodelh tak, mahse, kristian kan lo nih hnu hian kan khamkhawp kan thar ta meuh lo. India ram hnuaiah U.T.,te state-te, kan lo ni chho ve zel a, lang thei lam aṭang chuan changkang awm hmel tak kan pu, mahse, kan changkang tak tak miah lo. Kristian ṭha tak vek kan ni hlawm a, tlema mi pangngai deuh chin chu kan lawina kohhran tinah rawngbawltu kan ni hlawm.Mahse, zu, ruihhlo, mipat hmeichhiatna, corruption, thamna, etc. kan ramah a hluar hle. 2011 chhiarpuiah khan mi 11 lacs, vel ami cheng kan ni a, kan tlem hle mai. Mahse, kan inlungrual miah lo, kohhran pawl hrang hrang hi 80 chuang lai kan awm. Tunah hian lehkhathiamte pawh kan tam tawh hle a, mahse, hnathawh tur a vang hle. Kan ramah hian company, etc., tih tlak deuh han thawhna tur ṭhalaite tan a vang hle. Sawrkar tan pawh sum han hmuhna tur a awm lo hle bawk. Kan neihho hi chu chhe te te, han tih tlak tak tak tur an awm lo. Hetih lai hian hnathawh tur hrim hrim hi chu a tam a ni ang, vaichhia kan tihho hi chu an lo lut chur chur reng, hna a tam an ti hle a ni ang.

Eng nge Ni – Eng nge kan ram mamawh ber chu ni ang le. Sum tam tak em ni ni ang le. Sum tam tak chu lo ni ta se, a nih leh U.T., kan nih lai aṭang tawh khan central aṭangin sum tam tak chu kan dawng ziah ṭhin a, kan sawtpui nge sawt pui lo chu kan inhre ṭheuh awm e. Sawtpui chu sawi loh,min ei chhetu, hremhmun lama min hnuk liamtu mai mai a lo ni zawk a ni. A nih leh kan mamawh ber chu leilung hausakna haichhuah lo ni ta se. Hei pawh hi min eichhetu tur tho a nih hmel, dik lo taka thil tih a pun phah sawt ka ring, mahni sum insiam nante kan hmang leh mai mai emaw kha a ni leh ang a. A nih kan mamawh ber chu lehkhathiam rual tam tak lo ni ta se. Hei pawh hi kan ngah viau a ni lawm ni, kum tin graduate thar eng emaw zat an awm a, hei bakah hian training-na neuh neuh kan nei nual hlawm bawk si a. A nih leh motor nalh tak tak, in ropui tak tak han ti leh ta ila. Hengte pawh hi a tam zawk chu a ba (Loan) a sak leh eiruk suma sak leh leite an ni hlawm. Mizoram hian eng nge a mamawh ber ang aw, sawi thiam a har hle mai.

Mamawh Ber Chu – Tunah chuan Zoram mamawh ber chu kan sawi tawh tak tak ang. Zoram hian eng dang a mamawh lo, a mamawh ber chu nangmah kha a ni. I awmna hmun apiangah khan a mamawh che a ni. I hnathawhnaah khan thamna/tlawnna la lo turin a mamawh che, eiru lo turin a mamawh che, hun vawng dik turin a mamawh che. Ram hruaitu I nihna aṭangin ram hmangaih tak tak turin a mamawh che.Dik tak leh fel taka rorel turin a mamawh che. Mahni inhaivur lo turin a mamawh che. Ram i hruainaah huaisen turin a mamawh che, a ṭul phawt chuan tlak rap pawh I inhuam tur a ni. Contract hna, supply hna i thawhnaah khan dik taka thil ti ṭhin turin a mamawh che. Kohhrana rawngbawl, I bawlnaah pawh khan rinawm tak tak turin a mamawh che.Sumdawng, dawr kaite pawh kan ni tin hna ṭheuhah rinawm leh taima turin min mamawh.Hnathawh tur nei mumal lo zawng zawngte pawh fel leh ]ha turin min mamawh. A tawp ber atan chuan nang leh kei hi a ni, Zoramin a mamawh ber chu.

Mi tinte kan ram tana kan ṭangkai theihna ber chu kan ni tin hna leh awmna hmun apianga rinawm leh fel hi a ni. A hranpain va ti thei lo mah ila khatia kan lo rinawm ve a, fel khan ram tan pawh hna ṭha tak thawk kan lo ni ve reng a ni. Kan ram hruaitute an lo ṭha lo a nih chuan inthlan leh hunah vote tawh loh mai tur a ni. Kan hlawk ve theihna tur, hna hmuh theihna tur tinzawna vote-te kan thlak hian ram tan a pawi thei a ni, miṭha, dik, huaisen tur I melh tel ang u. Vawiinah nang leh kei hi kan pawimawh hle a, kan ram tungding leh tur hian Zoram mamawh ber chu kan ni.

- Lalchhandama Colney Ph-9862982321