TLAWMNA CHAPO (Vol-1)
Tlawm ngawih ngawiha inhriatna hi mahni indah sang vang mai a lo ni.
Tlawm kan intih viau lai hian; midangte tlawmna nun nei ve se kan tih em emna thinlung hi kan hmangaiha kan vei vang ni lovin phut let nun a ni zawk. Tlawmna hian phut let a nei ngai lova a tlawm ngawih ngawih zawk.
Mahni dik intih riauna raute hi rilru chhiat leh suahsual vang a ni. Tlawmna hian a dik lohna lai a hmu lian ber ṭhin. Committee-naah leh puipun nikhuaa kut kawngkuah hmuka hmun lailum ber ber chuha lansarh loh hlau niawm taka zai rut rut ṭhin, an thu leh hla ngaihsak loh hlauva ring tak taka hallelui amen tuar tuar ṭhinte hian Pathian an fak lova, anmahni an in fak a ni. Tlawmna nun chu a inthukru ṭhin.
Fak loh hlau ni awm taka mahni thiltih ṭhat sawi ṭhinte hian midang fak ve tur zuah lovin anmahni an in fak zo ṭhin. Tlawmna hian mahni a infak ngai lova, midang a faka miin an chawimawi zawk ṭhin. A hre ber nih tuma midang ṭawng ve hmaa lo pawt zuah zuah, inti Pathianthu awi em emte hian tlawmna nun hi midang ṭawng ngaithla nun a ni tih reng an hre lo.
Midang aia taksa chetna dawng nasa, inti zawlnei riaute hian tlawmna nun an tlachham ṭhin. Tlawmna nun chuan phuba a la ngai lo, a tlawm ṭhin. Doctrince tih vela lo inhniala mahni duh lai lai Pathian thu nena ṭan lo khawh a, inti Kristian em em ho hian Kelkang nun an hre lo. Pathian thu hi inhnial nan chauh an hmang - nunpui an tum thak lo. Tlawmna chuan eng ang mi pawh a pawm.
Mahni venga zu zawr duh miah si lo, zu heh ru zekho hian fel ber nih an tumna lamah anmahni mawng an hlim a ni. Mahni hlawha lungawi lo, Sunday sermon thupui thlang ṭha thei fu, pulpit tlanga Kraws ṭahpui ṭhinte hi Moday-ah kraws an pu peih lo. Tlawmna erawh chuan eng dinhmunah pawh lungawi zel a ching ṭhin.
- Pate Lyno