Grape wine kalpui dan hi!

Kum 2000 chho vel MNF sorkar hmasa hunlai khan Champhai leh Hnahlan velah khian grape huan siam ṭan a ni a, chu pawh chu sorkar puihna nena grape hi ching an ni. Kan sorkar hian kuthnathawktute a lo pui fo tawh a, mahse a tawpah chhiatna thlentu a ni ta fo mai.

Mizoram khaw­chhak lama grape ching tura kawh­hmuhtu chu tuna MNF sawrkar tho hi a ni a, tuna grape chingtute'n hlawh­tlinna an hmuh tak hnu hian sorkar hian a ngai thei lo thar ta deuh ni maiin ka hria. A bak thil awm thei awm hi ka chhut neuh neuh pawhin ka hrethiam ve mai tlat lo. Hmanni deuh khan Vanglaini ah tho hian ka lo chhiat fuh a, ka duh lai lai kan la chhawng lawk ang e.

Central sawrkar (Food Safety and Standards Authority of India) chuan kum 3/4 liam ta khan wine hi chaw (food item) ah a lo ngai tawh. Chuvangin Mizorama wine siam leh hralh khap hian FSSAI dan han ngaihtuah mai chuan wine hi Central sawrkar berin, "Zu a ni love, chaw a ni e" a tih tawh chuan State sawrkarin, "Zu a ni," a lo tih tlat hi thil dik a ni lo. Grape chingtute leh wine-a siamtute hi inthurualin hemi chungchangah hian Court-ah zualko ta se sorkar dinhmun hi a chhe zawk viau maithei a ni, tih lam hawi a ni.

Tichuan, MNF an tla a, Congress an rawn sorkar ve thung a. Congress sorkarin zu khapburna dan hlipin Dan hnuaia zu zawrh phalna a kalpui a, buaina kan la nei lo. Champhai leh Hnahlan vela grape chingtute pawhin eizawnna an nei ṭha chho e kan ti a, kawng eng an hmu ve ṭan kha kan thik lo a, kuthnathawktute ding chhuak tur anga an rawn awm kha kan lawmpui em em zawk vekin ka hria.

Zu erawh chu kan do tlang a, grape wine chu kan do lem lo; Kohhran hrang hrangin Sacrament atan Mizoram thar chhuah grape wine hi kan hmang hlawm a. Tual chhung thar kan lei sak a, a market lama kan pui liam liam thei kha kohhrante pawh kan thil tih ṭhat tam tak zinga thil pakhat niah kan ngai mai a ni.

Kum 2018 elec­tion-ah MNF in zu an khap tur thu an au pui ta a, an tlin phah te pawh kan ti thei hial awm e. Dry day te an puang nghal char char a, an pawt sei zel mai si a, a tawpah phei chuan zu khap kha an kalpui ta hial a nih kha.

Kum 2019 a sor­karin MLP Rules a tihchhuahah chuan, phalna nei chuan wine leh beer hi an siamin an zuar thei tih a ni. Hetiang hi thil awm dan a nih laiin enga tinge tunah MNF sorkar hian grape wine a man leh tak vak mai le, tih hi mipui zawhna chu a ni e.

Kohhran serh leh sangah wine hralh phal a ni lo tih te pawh Exise department chuan an sawi ri leh ta hial mai a, sorkar kal dan hi hriatthiam a har ta khawp mai.

Sorkar hian enge tih a tum ber, mipuite hi duha a duh ang anga a bum kual mai mai turah a ngai a nih hmel ta ber e.

- Vohbika Pu