POLITICIAN-TEN PATHIAN AN SAWI DAN

“Ani hi chuan Pathian a ṭih a, a awmna party aiin Kristian sakhua leh Kohhran hi a dah chungnung zawk alawm,” tia kan lo ngaihsan em em ṭhin khan, kum li lai kalta khan, “NLUP hi mi retheite chhanchhuahna atana Pathian min duansak a ni e,” tia ngaihthlak theih hian a sawi ve teh tlat a, bengah a cham rei riau chhan chu a sawitu leh a thu sawi hi inhmeh lo tlata hriat vang a ni. A bawplawkah han laksak ila, Pathian duansak NLUP chu vui liamin, NEDP kan buaipui leh mek a, Pathian duansakah kan puh leh mai dawn em aw?

Politcian zinga ṭhenkhat hian Pathian hran an nei ta mai emaw ni tih tur khawpin, Pathian hming hi an lam naran teh chhen a, kum sawm lai chief minister lo ni tawh Pu Zoramthanga pawh khan, Kohhran aiin missionary tirh chhuah tam lamah ṭha­hnem a ngai a, a uar leh ta lutuk a, mi pangngai tan chuan awih ngaihna awm hauh lo, missionary nuai khat Mizoram aṭanga tirh chhuah a tum thute kha, khap hleih theih loh khawpin a sawi zing a, missionary tirtu zawk Kohhran lam pawh an nuih a za a, an sawipui chhin eih lo a nih kha. Chu mai a ni lo a, a party MNF chu hun hnuhnunga Mizo mipuite chatuan nunna kawnga hruai chhuaktu Berampu atana Pathian ruat... ‘kan niin ka hria’ pawh ti satliah mai loin, "... kan ni" a ti lawl lawl mai a, Pathian a rin vanga khatia sawi ṭhin kha ni pawhin a lang lo a, Pathian ruat anga lan kha 'vote' hmuh tamna nia a rin vanga sawi mai mai ni zawkin a ngaih theih a, a sorkar hnuaia a khua leh tui nihte kha a nuam lo lek lek. Tun thleng hian a la sim chuang lo a, a duh duh ni turin Pathian a inruattir a, a duh duh Pathian a tihtir vel mai mai ni berin kei chuan ka hria. Kum sawm a chief minister chhung khan a sorkar khan missionary nuai khat chu sawi loh, pakhat chauh tal an tir chhuak em aw?

Tuna kan chief minister Pu Lal Thanhawla pawh hi, term hnih aia rei hret sorkar a enkawl hmasak zawk chhung khan, Pathian hming kha a lam naran nasa viau bawk a, 'Pathian nung' tih ṭawngkam phei hi chu a sawi zing khawp a, amah zuitu official-te meuh pawh khan fiamthu thawhna atan an hmang ṭhin a. "Chu Pathian nung a sawi ri leh ta, a thusawi a tawp dawn hnai tihna a nih chu etc." an ti vel mai mai ṭhin. Ama ka aṭanga ri chhuakah khan, Pathian ruat an nih chianzia a mah a insawifiahna kha ngaihthlak tur a tam khawp mai, mi dangin an sawisak hman meuh lo a ni.

Pu Hawla hian sorkar a chelh chhungin Bible chang mawi tak tak la chhuakin ram thuvawn hi a thlang ṭhin a, office bang remchang lai apiangah an tar sup sup a, chhiar a nuam viau mai a, zawm a hlawh leh hlawh loh lam erawh chu thu dang a ni.

He Congress ministry hi a din tirh phat aṭang khan, "Congress sorkar hi Koh­hrante ṭawngṭai Pathianin a chhanna kan ni," tih kha chief minister ber khan a sawi zing em em mai a, vantlang hmaa a thusawina apiangah a sawi a ni hrim a, tun thleng pawh hian a la sawi ri zauh zauh a, khaptu leh khaktu an awm apiang hian a sawi uar zual sauh ni awmin amah hnaih deuhtuten an sawi lehnghal a.

Pu Zoramthanga ang tho khan Pu Hawla pawh hian, ni se a duh apiang leh, a thil tih apiang hi Pathian nihtir leh tihtirah chiang fe fe hian a puh ve leh bawrh bawrh tawh a. Ani pawh hian vanneihna petu Pathian a zah vang leh a ṭih vang ni em em pawh hian a lang lem lo. Mizote hi Kristian nih thuhlaah hi chuan kan chiang a, kan sakhua hi kan ngaisang a, kan buaipui takzet a, sakhaw ngaihsak mite hi kan ngai ropui hle tih hi kan ram hruaitu pahnihte hian an hre chiang em em a, chuvangin Pathian zah ber leh ṭih ber ang leh, Pathian mi ruat ngei nia an inhriat thu uar taka an puanzar hian, mipuite laka vote khawnna atan ṭangkai riau dawna an hriat vangin, Pathian hming hi rem leh rem lo chung pawhin an lam ta bawrh bawrh mai nite hian a ngaih theih rum rum.

Mizorama Pathian in­puanna chiang ber berte hi Congress party kaltlangin emaw, MNF party kaltlangin emaw a ni ta mai awm mang e tih tur hian kan ram hruaitute pahnih hian thu sawi an ching a, Pathian an sawi duh dan aṭanga ka lo thlirna ve mai maiah chuan, heng kan hruaitu pahnihte hi chuan Pathian hi a awm tak tak an ring miah lo a ni mai awm mang e te ka ti ve mai mai.

- Lalchhandama