INDIA KAN AWP!

Mumangte pawh a ang rum rum mai ka ti! Mizo mipuite hian mumang kan inṭawm chu a ni si lo maw? India rama football inelna sang ber I League-a champion nih hi a namai lo; mumang em maw tih mai pawh awl tak a ni alawm.

Ni e, kum hnih lek liam taah khan he inelnaah hian kan ram club ‘Aizawl FC’ chuan min kaipui a, ha hipin kan sawi a nih kha. I Leagu-a tel phak chu sawi loh, tel phak tumte inelna zinga tel ringawt pawh thil harsa tak a ni. A harsatzia chu Aizawla veng lian ber pawl Chanmari FC dinhmun aṭang hian a hriat mai.

Mi ram club-te chu sum hmangin an inlei tling thei, remchang a awm phawt chuan. Keini ram club erawh chu a nih dan tur ang thlapin a petin kan inpet tling ngat a. Season hnih chhung lekin champion team kan han ni thei mai a nia. A ropui ti lo lo chuan ropui ropuina an hre lo a ni hial ang!

Hman kum lawkah India rama state hrang hrangte foot­ball hmanga inelna sang ber Santos Trophy-ah kan champion tawh a. Tunah, club inelna sang ber I League-a kan champion leh thei mai hi a mak a, ‘India kan aAwp’ tih loh rual a ni lo!

India rama club ṭha sawm zinga tel phak ringawt pawh hi inchhuanna tham a nih tawh teh lul nen, club lian leh hlun, inrelbawlna ṭha tak nei, sum ngah tak tak, players ṭha tak tak chaw lut thei kara keini kan han champion hlawl mai hi vanneihna nasa tak pawh a ni awm e.

Kan khelmuala phul lem phah a nih tak hnua kan ṭhan chakzia hi haider theih rual a ni lo. Chutih rualin Mizoram Football Associasion (MFA)-te tuh rah kan seng a ni tih a chiang khawp mai. Anniho ṭhahnem ngaihna leh beih hram hram peihna zar kan zo a ni; a bik takin Lalnghinglova Hmar (Tetea) hian fak a phu zual.

Aizawl Football Club (AFC) neitu, Pu Robert Ro­mawia te chhungkua chu sawi lohva lum a ni. Sum tam tak sen thlawn huama Aizawl FC an enkawl ṭang ṭang duhna hi fakawm tak a ni. Kan ramah ngei mi tam takin hna an neih phahte hi a lawmawm a ni. Hei hi ram hmangaih zia a ni tih loh rual a ni awm lo e.

Chutih rualin Mizo mipuite kan inpumkhat ṭhatna avang a ni ve bawk. Aizawl FC ṭawi­awm tur khan mahni sum leh tha sengin khati khawpa ṭha­hnem kha pungkhawm ziah lo ila chu tun dinhmun hi kan thleng thei kher lo ang. Kan khelmualah chauh ni lo, ram dangah pawh kan inṭawiawm ṭha em em zel a, Mizo mipuite hian fak kan phu. A kila lung ṭangkai tak kan ni.

Match hnuhnung bera Shillong khawpuia Mizo khati zozai kan fuan khawm theite kha a va hlu em. Mahni tha leh sum sengin, champion team kan neih ngei theih nan kan hun hlu tak kan seng phal a nia!

Player-te au phur tura kan sên tuar mai te, kan au rual ṭhup ṭhup a, kan zai rual dual dual maite kha a van changkang tak; tin, a ṭangkai em em bawk. Mexican wave kan han siamte phei kha chu pui ve tak kan ni, pui ve tak!

‘Ro min relsak ang che’ tih hla kan han sa rual dual dual mai te, ‘Lalpa’n thil ropui min tihsak e...’ tih hla sak rual ṭhup ṭhupte kha a ropuiin a nuam ngawt mai. UEFA Champion League meuh pawh an Live-na ṭhin channel-a, “A goal dawn e... a goal dawn e...” han tihrual ṭhup ṭhup te, “Aizawl FC i nih chuan kut beng rawh...” tiha kut kan beng rual ṭhup ṭhupte kha nuam ve deuh mai a ni. Mahse, kan khelmuala kan leng lo ṭhin erawh kha chu a lungchhiat thlak ngawt mai.

Season hmasa aia tun season-a entu mipui ṭhut theihna, stadium chhungah a awm belh tlem lutuk hi a thinrim thlak a, a zahthlak bawk. Mahse, kan Sport Minis­ter meuhin, “Season thar ṭan hmain kan sa zo vek ang,” tiin min tiam kha maw - thu chu tisaa chantir a nih ngei beisei leh phawt ang.

Kan ram hruaitute hian tlak hlauh vang ni lovin an tih tur dik tak a nih vang zawkin dik takin ti se; a nih tur anga hna an thawk ṭha thei lo a nih chuan bang mai ngam se kan ram hian a ṭhatpui zawk awm asin. Chu chu ram hmangaih zia pawh a ni zawk.

Pu Robert Romawia te fak­awmna han sawi leh ta lawk ila - entu mipui min ngai­pawimawh thawkhat hlein a lang a. Season hmasaa ticket man a to kan tih pawh tun season-ah chuan an siam ṭha nghal vat a. Tin, pianphunga rualbanlote thlengin an ngai­pawimawh thiam em em mai a, a lawmawm tak tak a ni.

He hlawhtlinna kan chan theih nana mi tam tak ṭawngṭaina te, Red Army-ho ṭawngṭai rualna zawng zawng kha Pathianin min tihhlawhtlinsak a ni - A hming chu fakin awm rawh se.

He kan hlawhtlinna chhun­zawm zel tur hian Mizo mipuiten ṭan i la zel ang u.

- Rindika Mizo Chawlhhmun, Ropaiabawk