Zoram thar leh thim thuah hnih

Thim thuah hnih leh Zoram Thar hian sawi a hlawh hle naa chiang fek fawka han sawifiahna erawh a awm lem lo - mahni ngaihdana lo ngaihruat mai loh chu. Thim thuah hnih chu a enga pawh chu lo nise a ‘ṭha lo’ lam a nih kan hai lo a; ‘Zoram thar’ chu thil duhawm lamah kan ngai.

Heti hian ngaih­tuahna thui tak ka nei ve a; tuipui ral lam aṭanga Zorama lo lut missionary-te hmangin Pathianin Mizote min ‘ko chhuak’ a; annin min chen chilh a, Pathian thu lamah min kaihruai mai ni loin anmahni kal tlangin Pathianin Zoramah ro a rel a. Ramhuai te um bo an lo ni a, sualna tinreng hnawl a lo ni a, Pathian ram a lo thleng a ni ber - “Zoram thar” a lo ding ta a ni. Zoram chu ram nuam leh muanawm a lo ni ta. Hla siamtu ropui tak takte pawhin ‘hei ang renga ram nuam hi awm theiin ka ring lo’ an lo ti hial a ni. Tun laia kan hla siamtute chuan kan ram hrehawmzia, sualna leh harsatnain a tuam nasatzia lo chu an hla thuah hmuh tur a awm ta lo. Zoram thar kan ngai leh ta!

Tuipui ral aṭanga lo kal Pathian mi tirhten, kum engemaw chen ‘Pathian thu thlung’ hmangin min chen chilh a, anmanhi in theihnghilh ṭhak­in Mizoram leh a chengate thlarau lam leh tisa lama tihchangkan an tum a. Nasa takin reilo te chhungin Mizote chu kawng tam takah kan lo changkang ta a. Setana thik khawpin kan lo sang chho ta. Zawi zawiin kan ramah Pathian hre lo miten thu an rawn nei ṭan a, thiam takin Mizote chu min lo hruai kawi ta. Mahse Pathian chuan kan bo hlen a phal lo, min hruaikir leh a duh avangin Mizo mipui rilruah ‘Zoram thar’ kha din leh turin a rawn dah leh ta, ‘Zoram thar’ din leh chu Mizo mipuite rilrua khat lian ber a lo ni leh ta, a va ropui em.

Pathian pawhin kha ‘Zoram thar,’ hmana a din tawh kha tung ding leh turin Mizo mipuite hi min la duh a ni. Mizoram hi ringlo leh beram vun sin hruaituten an hrual rei ta. Kan ram hi ‘party’ duh dan emaw ‘party’ hruaina hnuaia khalh kalin a awm rei ta, a tawk tawh e. ‘Pathian Thuthlung’(Bible thuthlung) nghet taka vawngtu leh zawmtute kaihhruaina hnuaiah Pathian duh dan anga Zoram thar hi a hun ta viau mai.

Tute nge ‘Zoram thar’ hi din dawn le? E, Pathian mi thlan ten le. Zoramah hian Pathian mi thlan chhiar sen loh kan awm a ni lawm ni? “Baal hmana la thingthi ngailo’ a sang a sing tel Zoramah hian an awm. Chung ho chu tunah hian Pathianin a ko chhuak mek. Mahni kohhran pawl leh thurin te sawi lovin, Krista neitu, Kristian tak, Pathian ṭih mi, hlemhletnaa la inhnamhnawih ngai lo, hming hliauna nei lo, ṭhenawm khawvengte rin kai, Zoram thar ngai­tute, rinawm taka Pathian rawng­bawltute insuih­khawma ‘Zo­ram thar’ (Pathian ram) he kan Mizoram ngeia din thar leh tur hian Pathianin min duh a ni.

Kum 100 chuang Kristian intiten ‘Zoram thar’ din tura kan insuihkhawm theih loh chuan Pathian leh khawvel mit hmuhah thil zahthlak leh tenawm ber a ni hial ang. Harh a hun e. Chuti lo zawng thim thuah hnih kan hmachhawn dah ang e.

- JM Vanlalhriata, Mission Vengthlang