PTR Leh elementary school amalgamation

RTE Act, 2009 recommen­dation ang chuan pupil teacher ratio (PTR) hi primary school tân 40:1 a ni a, middle school tân 35:1 a ni. A awmzia chu primary school pakhatah zirtirtu pakhatin zirlai 40 zel a enkawl ang a, middle school-ah zirtirtu pakhatin zirlai 35 zel a enkawl tur tihna a ni. School hrang hrangah zirtirtu indaih lo kan ti fo ṭhin tak naa RTE Act, 2009 recommendation ang chuan zirtirtu indaih lohna school hi a tam viau lo mai thei.

Amaherawhchu, hei hi a taka kalpui tur chuan ngaih­tuah chian ngai tak niin a lang. CCE system kan hman tâk avangin subject tin maiah hian tih tur a tam êm êm vek a, zirtirtu pakhat tân subject 13 vel thiam vek hi a har khawp ang. Thiam vek pawh lo ni teh rêng se zirtirtu pakhat tâna zirlai 35 zirtir hi a awlai lo tawp ang. Chuvangin, zirlai hi tlêmin 35 chauh pawh ni mah se subject hrang hrang la thei zirtirtu an awm kim vek a ngai tlat. A nih loh chuan RTE Act duh ang vêka zirna ṭha (quality education) pêk hi a har ang. Chutih laiin, Mizorama quality education duh vanga zirtirtu indaih lo tia kan buaina erawh hi chu heti zawng hian a chinfel theihin a rinawm.

Thingtlâng khua tam takah hian elementary school a awm kawp nual mai. Zirlai tlêm tê tê an awm a, zirtirtu pawh an tlêm. Nimahsela, CCE sytem kan hman tâk avângin zirlai tlêm mah se zirtirtu an indaih tho a ngai kan tih tawh kha. Tunah hian school a kawp a thuaha kan din si avangin zirtirtu tlem tê leh zirlai tlem tê an inho kum tin mai a, hei hian zirna quality pawh a tihchhiat phah niin a lang. Chuvangin, RTE Act duh anga zirlaiten quality education an dawn theih nan school sawi khawm hi thil ṭha tak mai leh awlsam taka kan tih nghâl theih thil niin a lang.

Entirn nan, thingtlang khaw lian vak lo pakhatah middle school pahnih a awm ta a, school pakhat zawkah zirlai 60 leh zirtirtu 6 vel an awm a, pakhat dangah chuan zirtirtu 7 leh zirlai 70 vel tho an awm ta a. Heng school pahnihte hi sawi khawm ta ila, zirlai 130 an ni dawn a, zirtirtu pawh 13 vel an ni dawn a ni. Subject hnehsawh takin an zirtir thei ang a, quality education a hring ngei ngei ang. Zirtirtute tân pawh a nuam ang a, zirlaite tân hlei hlei a nuam lehzual dawn a ni. Inelna pawh a awm ang a, thil ṭha pawh a piang ang.

School pahnih pathum awmna hmunah hian quality education lamah intlansiakna a awm phah tak tak chuang lo. Zirlai an inchuh a, enrolment neih ṭhat lamah chiah an inel tlangpui. Zirlai nu leh pate an lo harsat tlangpui bawk avangin a thlawna thil tihsak thei school apiangah an luh kualtir a ni ber mai. Entir nan, Venghnuaia awm mah ni se Vengchung school-ah a thlawna engkim an dawn vek dawn avang leh scholarship an hmuh ngei ngei dawn avangin Venghnuai school hnai tê-ah lut loin Vengchung school kilometre khat dawna hlaah an lut mai ang. Zirlaite’n school kal an harsat vak lo. Tin, zirlai fel vak lote’n tlân tauh an ching bawk. Hei hian discipline a tichhia.

Khawtlang hruaitute leh nu leh pate’n school a hla lutuk an tih fo hi chhuanlam a tling lo. Thingtlâng khuaa inte hi kawng âna intlar phei a ni tlangpui a, hetiang khua (linear village) hi a sei duh tlangpui. Khaw thlêng rem loh avanga darh nuaih (dispersed village) ang chi pawh a awm bawk. Nimahsela, a tlangpui thuin thingtlâng khaw tin mai hian laili (centre) a nei vek a, chuta ṭang chuan eng veng pawh a hla lutuk ngai lo. School-te hi khaw laili takah hian sawn ni se. Duhthusam phei chuan primary, middle leh high school-te hian concrete building a chhawnga sak pakhat inṭawm thei hial se a duhawm hle. Zirna boruak a ṭha ang a, zirlai leh zirtirtute pawh an inpawh bawk ang a, zirlaite’n zirtirtu zawng zawng an zah vek ang a, school pawn lam thlenga thunun a tiawlsamin khawtlang nun pawh a ṭhat phah ngei ang.

Khawpui veng ṭhenkhat leh thingtlang khua ṭhenkhatten school sawi khawm hi an duh lo viau mai zel a, hei hi ngaihtuah chian a ṭha. Zirna ṭha nge kan duh school hnâi ringawt? Hruaitu ṭha nei leh nu leh pa fing tamna khuate chuan school sawi khawm hi an duh zâwk a, tunah hian sawi khawm an awm nual tawh a ni. Hei hi zirna ṭha zawk kan inpêk theihna tur a ni. Sorkar paw’n a ṭhatzia a hria a, a sawikhawm mek zel bawk. En chiang zel sela, sawi khawm ṭha a tih school-te chu huaisen takin sawikhawm zêl se. Dodalna avangin ṭhulh phah lo se a duhawm hle. School laili zâwkah hian sawi khawm zel sela, a laili bik a awm lohna khuaah chuan kil tin aṭanga pan nuam ber tur hmunah hian school building hi sa ṭha mai se a va ṭha dawn êm!

School sawi khawm hi thil ṭha tak, ngaihtuah mai pawha kan indaih zâwk na tur leh zirna ṭha zawk kan pek theihna tur a nih bâkah sum leh pai kan sên tlêm zawkna tur a nih avangin chak zawka hmalak zel nise a duhawm hle. Zirlai an tlêm hian inelna a awm lo a, inkhualtelem rilru ang lek an pu duh. Zirtirtute pawh an tlêm hian an ho duh a, an hnaah an tui tak tak thei lo. Zirlai leh zirtirtu tamna hi chu thingtlâng âia khawpui a changkâng zawk ang deuhin a nuamin a changkâng zâwk si a.

- Miltona, Vaivakawn