A balanced media diet

Internet Addiction Disorder i hre tawh ngai em? He ṭawngkam hi hre lo kan tam zawk maithei. Internet ngawl veina emaw internet tel lova khawsak theih loh hi internet addiction disorder a ni. Engtiklai pawha computer ṭhut chilha internet khawih ṭhin te, mahni smart phone bih reng maite hi Internet Addict Victimte an ni.

IAD (Internet Addiction Disorder) ṭawng­kam rawn chher chhuaktu chu Ivan Goldberg a ni a, kum 1995 khan he hming hi a lo vawrh lar daih tawh. Ivan Goldberg hian lehkhabu Diagnostic and Statistical Manual of Mental Disorders-ah a ziak a, heta ṭang hian miin an hre ṭan ta a ni.

Internet addict hi thil buaithlak tak mai a ni a, a manganthlak a, a bawiha tan lah a hreawm a, tal chhuah mai a harsa em em bawk a ni. Zu ngawlvei leh drugs ngawlvei nen hian danglamna a nei tlem hle awm e. Ngawlveina a nih miau avangin nunphung a thlak danglam thei a, mihring leh mihring inkara in laichinna pawh a sawi chhe ve kthei a ni.

Social media, online shopping leh online games te hian nunphung a khawih buai nasa a. Heng bakah hian internet kaih­hnawih addict theih tam tak an awm a, kan sawi vek seng lovang. Heng zinga buai­puiawm leh langsar zual han tarlang ila.

Tunlai ṭhangtharte buaipui pakhat chu sexting hi a ni. Sexting chu engnge? Sexting chu saruak thlalak emaw zahmawh thlalak emaw hmanga inbiakna a ni. Sexting hi thil thar a ni lova, smart phone ken tel a ni i han ti teh ang. Thil holam a ni hauh lo a, pornography aia a nepna a awm chuang miah lo.

Nu leh pate, pi leh pute, u leh naute hian hetiang thil hi kan inchhungah ngei a thleng ve reng a ni tih kan hria em le? Bible chuan, sex chu nupa inkarah chauh hmang turin leh tisa chakna laka inveng turin leh kan taksa tithianghlim turin min chah a ni. (Thuf. 5:18; Eph. 5:3,4; Kol. 3:5). Mimal tinte kan inen fiah a, kan inen nawn a va ngai tak em! California University-in a tarlan danin internet bawiha tang mekte hian nunphung hran an nei a; dawhtheihna an tlachham - insum heihna an nei tlem a, an thin a chhiain, online deuh reng mai an duh a ni.

Rilru leh taksaah - Internet addict-te hian rilru leh taksaah harsatna nasa tak an tawk a. An nun dan chu online leh offline hian a hril em em a ni. Mahnia tlat hran - Mahniin a hlim zawk emaw tih mai turin mahni chuaha awm nuam an ti zawk. Zanriah kan han eikham a, mahni pindan ṭheuhah kan han lut diat diat a, mahni phone emaw computer emaw ṭheuh kan han khawih a, chhungkaw maicham theihnghilh ṭhakin hun kan hmang ṭhin ta a nih ber hi.

Internet addiction chhuahna kawnga min ṭanpui theitu pakhat chu Digital Diet hi a ni. He thil hi tunlai ṭhangtharte leh

ṭhalaite mamawh tak a ni awm e. Hunbi nei emaw awmze nei a, internet khawih emaw hman dan emaw a ni. Digital khawvelah kan cheng tawh a, keini ringtute hian kan computer te leh kan smart phone hman dan chin tawk neih a, kan inhrêk a ngai fo reng a ni. Internet Addiction Disorder hi rilru lam natna nen a inkaihhnawih tlat avangin ram changkang zawkah te chuan Psychiatrist an pan nasa hle nia hriat a ni. He article chhiartute zingah emaw kan chhungkua ngeiah emaw internet addict kan awm a nih chuan mithiamte rawn vat a finthlak hle in a rinawm.

Digital Diet kawng thum tarlang ila:-

1. Establish no-device time. Smart phone emaw computer internet emaw khawih loh hun felfai takin insiam rawh. Chhungkaw chawkil ho laia khawih loh emaw hnathawhnaa khawih loh emaw mut hmuna smart phone khawih dan hunbi thlengin insiam la, chu chuan internet addiction lakah a veng ang che.

2. Avoid notification insanity. Smart phone hian ṭangkaina tam tak a neih rualin mihring nunphung a tibuai ve hle ṭhin. A bikin smart phone notification hian mi a tibuai hneh hle. I phone a notification naran emaw ṭangkai lo emaw kha ‘off’ vek la, a ṭangkai chauh ‘on’ ṭhin ang che. Chuti lo zawng notification a rawn lang ang a, hnathawh ṭhulh ṭhakin social media sites zawng zawngah luh i tum leh mai ang.

3. Give social media a break. Mi zawng zawng a tihlawm theih loh tih kan hria. Social media a thil thleng zawng zawng kan hre vek thei lo bawk. Facebook-a kan

ṭhiante thil post kan like vek thei lo a, an thu ziah emaw thlalak emaw kan comment seng hek lo. Hawh u, i in ngaihtuah chiang ang u. Facebook chu facebook lo nimai se, Instagram chu Instagram lo ni mai rawh se.

A tawp berah chuan keimahni leh kan thlarau nun a pawimawh ber tih hria ila. Hetiang a ṭhalaite kan kal zel chuan milem kan pathian chhunzawm zel mai dawn a lo ni. He thuziak kham khawp lo emaw duh tawk lo emaw kan awm chuan internet addiction disorder te, sexting te, digital diet te hi internet-ah han google mai la chhanna chhiar sen loh i hmu ngei ang. He thuziak pawh hi internet kaltlanga ziak thei chauh kan ni si a. I internet kha han hmang ṭangkai ve teh le!

Wikipedia - Internet Addiction Disorder

Why should I know about Sexting Ṭ Young people ask. jw.org

https://www.jw.org/en/bible-te...

Dangerous Effects of Internet Addiction

https://www.addictions.com › Internet Addiction

Three Ways to go on a digital diet – Entrepreneur

https://www.entrepreneur.com/a...

- H. Lalmuanpuia