State pawna awm Mizo Ṭhalaite

Tun hnai kum hnih kum thum chhung hi ngun taka in lo chik ve chuan, Mizoram pawna Mizo pawlte hian thuchhuah an siam ṭhin chu chi hnih angin a thliar theih a. Pakhat zawk chu school, college leh university admission chungchang a ni a, a dang leh chu hnathawka kalte fimkhur tura tihna lam hawi a ni.

Mizo zingah mahni state pawna hnathawk ngam ṭhalai an pung zel hi an chhuan­awmin an fakawm a, heng mite hian hna ṭha tak takte an thawk a, ṭhenkhat erawh chu hna zahawm ber ber pawh a ni lo. Hna zahawm lo ka han tih chhan chu hnam dangin Mizo nula an zuam theihna tur hmuna thawkte hi an ni a, hei hi a lehlama sawi duh chuan a hna a zahawm lo ni lovin a thawktute an zahawm lo pawh a ni ve thei a, eng hna pawh hi zahawm taka thawh theih a nih ka ring.

Mizo ṭhalai hnathawka kal chhuak turte chuan an hnathawh tur an hre chiang phawt tur a ni a, vai rama hnathawh hi a hlawk tih vanga risk ve tawp chi a ni lo. Belh tur hre mumal lo, an hnathawhna chinchang hre chiang bawk si lo Mizo ṭhalai tam tak an buai tawh a, a ṭhen chu mualpho takin an awm phah tawh a ni.

State pawna hnathawka kal turte chuan a tirtu leh hna kawhhmuhtu lam aiin an kalna tur chu hriat chian tum se, mahni hmelhriat pawh bum hreh lo an tam tawh si a, chuvangin human trafficking kan tihte hi a thlen lohna turin kan hnathawhna i fimkhur ang u.

- Zosanga