Mi taima leh entawntlak Upa Varlawmsang

Upa Varlawmsang hi a nupui leh an fapa pangate nen 2007 khan Senvon, Manipur aṭangin Khawruhlian khuaah an rawn pem a, kuthnathawk (tlang lo nei) a eizawng an ni. A fapa 5 te han indan vek hnuah a nupui nen chauha awmin an taima dun em em a, kum 2013 khan hnathawktu zat hisapa Mizorama buh thlo chhuak hnem (tam) ber lawman Rs. 10000/- leh certi­ficate Agriculture Department, Govt. of Mizoramin an pe.

Upa VLS hi kum 1952 a piangin tunah kum 65 a upa a ni a, a nupui hi amah aia kum khata upa a ni. Kum 2005 aṭang khan sciatica natna a neih bakah pumpui na (ulcer) nei a ni. A natna te avang hian ṭhu tung chunga hlo thlo ṭhin a ni. Lawmman a dawn ṭum hian midangin an puih loh bakah hlawhfa an ruai miah lo. Buh thiarnaah chuan a nupui bakah sakawr an ruai.

Lawmman a dawn ṭum hian Mizo­ram pumpuiah, hnathawk­tu zat hisap ni lovin buh thlo chhuak hrim hrimah pathumna a ni. A aia buh ngahte chu leilet (tarrace) aṭang an ni a, leileh nan tractor te an hmang. Hemi awmzia chu tlang lo neiah chuan pakhatna a ni; a thawktu zat leh zat lovah pawh.

Tunah hian huan hlun a nei a, ser­thlum kung 400, nim­bu kung 180 leh la­khuihthei kung 1000 vel an nupain an enkawl. Upa VLS hi tunah Evangilical Free Church of India (EFCI), Khawruh­lian khuaah Upa niin Pathianram (sawma­pakhat) dik taka pe ṭhin a ni.

- Lala Khobung, Luangmual Vengthlang