ZORAM KHAWVEL TAK HI CHU AW

Tunah chuan kan sorkar hrawn mek pawhin a term kum 4-na a hmang ṭan dawn mek chu a ni ta der mai a, nakkum lamah chuan MLA kan thlang leh mai dawn niin a lang. UT kan nih aṭanga Chief Minister neia inthlan kan nei hnem ta viau a, kan ram pawhin hmasawnna engemaw chen chu a nei ve tawh chuan a lang thei awm e.

Kan inthlan apiang lah hian sorkar thar lo piang tur chuan hmasawnna eng emaw tak han thlen ngei turah kan beisei a, mahse hmasawnna em em han hmuh tur awm lovin kum 5 chu kan hmang liam leh mai ṭhin a! Inthlan dawn apiang lah hian sorkar thar hnathawh tur hi a ṭha theihtawpa duan kan tlangau pui a, chutiang tlangau pui vak vaktute ngei chuan sorkarna fung an han vuan a, an tlangau pui vak vak zinga tlemte, a saṭah chhuak pek te chauh chu an tihlawhtling leh het si ṭhin zawng a nih hi. Chuvangin mipuite pawh hian heng thilahte hian i in enlet ve ṭhin teh ang u.

Duhthusam thil ringawta in hampuar ṭhin lakah hian fihlim turin mipuite pawh hian ngaihtuahna i hmang ve tawh ang u. Tam tak hi chuan, "Kan rethei em a, eng dang han ngaihtuah thei kan ni lo. Kan hotute hi han phatsan thei kan ni lo,” te kan ti a. Kan retheih avang tak hian kut kuangkuaha ṭhu mai mai thei kan ni lo tih hria ang u. Kan retheihna aṭanga kan chhuah theihna tur hian midang ṭanpuina kan mamawh lo, kei mahni ngei zawk hi a hmahruai tur kan ni tih i ngaihtuah thleng thiam ang u.

Kan politician tam tak hi chuan kan retheihna hma­theha hmang hian min bum reng a, retheite hmangaih ber ni awm takin an tlangauva, chu chu kei ni, rethei te te hian min hmangaih ta ber emaw tiin, a ṭhial pawh ṭhial hman lo lekin kan lo lem ta duak duak mai ṭhin a nih hi!

Kan supply ration chung changah lah kan hotuten AAY a min dahte kan lawm hlum dawn a, BPL a min dahte kan chapo pui a, kan hotute kan fakin, min hmangaihtu ber emaw kan ti tlat a. Heti zawnga kan kal chhung hi chuan retheihna khurah kan lut thuk tulh tulh dawn. A lehlam kawng, kawng hriam leh kawng bumboh lam zawh i tum zawk tawh teh ang u.

BPL leh AAY a awmte hi vanneihna leh malsawmna lamah ngaih tum lo ila, heng hi retheihna khura luh thuk zelna a ni tih i hre thar leh teh ang u. Hman deuh khan Zoram thingtlang khaw engemaw zah chu BPL awm lohna khua a ni tiin chanchintharah te khan an han puang a. Khang han hriatte khan ava lawmawm tak em! Kei ni, thingtlang khaw te hian khati lamah khan inelin, intlansiak tum ta ila. Kan politician-ten chhanchhuahna tur policy an han duante hian a chhanchhuahna ngei lam zawngin kalpui i tum thin teh ang u. Inthlan dawn ṭepa thingtlang mite min han hmangaih thut a, inthlan zawha min hre zui tawh lo tur ang chite hi i thliar thiam teh ang u. Pawisa sum siam nana min hmang tur ang chi hi chu i hnar ngam ang u.

Kan naupangte zirna lamte pawh hi ngaihtuah ngun a va ngai tak em. Kan sorkar sikulte a ṭha thei der hlawm si lo. Man lova kal tir theihna ni si, kan fate kal nan kan iaiin private sikul man to tak takah puk chawpin kan kal tir a. An sikul fee tur hlawh chhuah ngai bawk, ei tur ngai bawk, mawngah ek a chhuak lovang tih hlauh­awm khawpin kan ei a chhe ta zawng a nih hi!

Electric bill lah a sang ta tulh tulh a, khua ava var lo tak em! Delhi te Punjab-te chuan an electric bill pawh unit 300 chin chu chawi a ngai dawn lo an ti tih te kan lo hria. An ni state hausa pawhin hetianga an khua leh tuite hmakhaw ngaia an tih theih chuan engah nge kei ni, mirethei tamna state hian kan tih theih loh bik lem ang le? Kan inthlang leh dawn a, hetiang lama hma min lak sak thei tur, a tak rama min hnuk lut ngei tur, a sawia sawi duah lo, rinngam awm ngei tur i thlang thiam teh ang u.

Heng ang chi a taka a thlenna tur hian kei ni, miretheiho hi kan huaisen ve a, aw rawl kan chhuah a, hma kan lak ve a ngai. Huaisen takin miretheite hian kan hmakhua hi i su tlang ve ang u. Hetia kan tih chauh hian retheite tan kawl a eng ang tih i hre reng ang u.

- Patrick Z, Chhingchhip