Fimkhur thar leh ang u

Hripui laka inven dan, a fimkhur dan, tih tur leh tih loh tur chin chu kan hre vek tawhin a rinawm. Covid-19 do nan chuan mimaltin kan pawimawh ber a, chuvangin hri leng kan hneh theih nan chuan nang leh kei kan pawimawh.

Tha kan thlah chuan hripui leh a darh leh hluai thei tih a chiang. Nitin hian Information & Public Relation Depart­ment chuan Covid-19 chungchang, zing leh tlaiah thu thar an nei ṭhin, tun hnai kan thlir kir zeuh a nih chuan kan pung thar leh tih a chiang.

Mipui kan fimkhur a, theihtawp kan chhuah takmeuh kha chuan hri hi a tawmim a, kil sir pakhatah kan nawr bet thei. Mizoram dristrict 11 zinga panga te chuan hripui kai neih miah loh lai pawh an nei hman hial, kan duh chuan kan invengin kan him thei tih a hriat.

Hripui thawm a zawi hret a, mipui pawh kan thla a muangin kan inthlahdul deuh niin a lang. Aizawl khawpui thlir ila, khawlai chhuak zingah hmai tuamna (mask) vuah loa chhuak hmuh tur an tam leh ta.

Khawlai chauh a ni lo, kohhran leh ṭhalai punkhawmna hmun thlir leh ila - mask vuak ngai ti lem lo kan tam leh ta. Mask chauh a ni hleinem kan ti a ni mai thei, hei erawh hriat a ngai - mask hi a invenna ber ni kher lo mah se, kan fimkhur a ni tih lan chhuahna pakhat chu a ni chiang.

Tun hnai chan­chinbu kan chhiar chuan, Aizawl District Task Force on Covid-19 chu July 5, Thawhlehni khan an ṭhu khawm a, Covid-19 dinhmun leh Covid vaccine pek dan an sawiho a; hripui laka fimkhur thar turin mipui an chah.

Ṭhutkhawmah hian mahni ina swab test an awm ṭhin thu leh chutianga ti zingah positive si, sorkara inhriattir lo an awma hriat a nih thu sawi a ni a, “Medical facility ngeia inendika inhriattir thlap duhthusam a ni a, hei hian nasa takin hri dona leh invennaah min pui a ni,” an ti.

Mahni ina mahnia sample endikte chu an positive a nih chuan task force-ah inhriattir tur leh fimkhur taka awm turin an chah a; mi tam zawkin Covid vaccine la tawh mah se, tar chak lo leh natna benvawn neite tan a hlauhawm zual bik bakah, thihna a la thlen reng avangin invenpui tawn a pawimawh thu an sawi.

Thutkhawma tarlan danin, Aizawl district-ah Covid-19 vaccine dose khatna la mi 3,58,312 an awm a, chu’ng zinga mi 3,10,230 chuan dose hnihna la tawhin, pre­caution dose la tawh mi 25,583 an awm. Sikulah naupangte pan chilha vaccine pek an rel a ni.

Hei hi tunlai kan dinhmun a ni leh mek. Inkharkhip leh inthunun hrehawm zia leh mipuiin kan tawrh nasatzia kan hre vek, theih­nghilhna hun a la awm lo. Chuvangin inkharkhip a ngaih tawh loh nan mipui tin fimkhur ila, kan theih tawk ṭheuha kan fim­khur chuan hri hi kan nawr tawm leh ngei ang.

A harsa lo, kut sil fai ṭhat, hmai tuam leh midang hnaiha awm tam loh kha kan thiam belsa vek a ni. Pawi­mawh bik thil ni lem loah chuan mipui i fim­khur nawn leh ang a, kan fimkhur tlan chuan a rah tlantu leh chhawr­tu chu keimahni mipui bawk kan ni leh dawn.

Covid-19 hi natna na lo tak, awlsam taka inven leh tihdam theih a ni. Chutih rualin mi tam tak nunna laksaktu a ni tih i hre thar nawn leh ang u.

- Sanga, Saitual