TUTE NGE NEKCHEPA AWM?

Vanglaini chanchinbuah Mizoram sikul naupang zirlaibua hnam ziarang pho lang thei zawng telh a nih thu ka lo chhiar ve a. Tu tan pawh mahni hnama chian chu mi zahawm, mipuitling leh khua leh tui ṭha nihna a ni reng a ni. Eng zirlaibu (subject) berah nge zeh a nih tih erawh chu an tar lang lem lova, Mizo leh History subject bikah a nih phei chuan thil tih ngei awm leh ṭul pawh a ni thei e. Amaherawhchu, zirlaibu dang, zirlai tu tan pawha subject lak ngei ngai (compulsory subject) ang chiah te hetiang hnam bik leh chi bing lam hawi hi telh a nih hlauh chuan ngaihtuah chian ṭhat leh a ṭha khawp ang.

India ram chhung khawimawlai hmun ṭhenkhatah chuan mi nawlpui tana ṭulna avangin English medium-a zirtirna (lecture) pek tur a nih laiin, Mizo zirlai tam takin harsatna an tawh fo chu, an zirtirtute’n Hindi emaw, anmahni tualchhung (local) ṭawng, entir nan, West Bengal-ah chuan Bangla (Bengali ṭawng kan tih mai)-te an hmang lui tlat ṭhin a, zirlai khual tam takte’n harsatna an tawk fo ṭhin a ni. Zirtirtu ṭhenkhat hetiang ching tlat hi sikul leh institute hrang hrangah sawi tur a tam mai. Zirlai taima tak tak te’n chung subject bikah chuan chaklohna leh beidawnna an tawng a,

ṭhenkhat phei chu an ban/ zirna tawp phah hlawl ṭhin. Mizote hi kan awm khawm chuan ‘society’ zalen tak kan ni a, Mizo zirlai bukna hmunah te chuan ṭhian fel lo chhar fuh palh a awm chawk bawk nen, nu leh pate’n kan fate zirna tur kan zawn sakin thlithlai uluk a ṭul em em a ni. Hetiang, India ram khawimaw laia an thil chinte hi kan ram, Mizoram ngeiah te kan lo ching ve fo mai ang tih te a ngaihtuah theih bakah zirlaibuah Mizo hnam zia pho lang chi a tam viau chuan hnam dang chhungkua Mizorama hnathawk leh sumdawnga awmte tan an fate sikul an kaltir a ṭul ve tho si a, harsatna an tawk thei tih pawh hriat tel a ṭha khawp ang.

Chi bing leh tlem zawkte chu humhalh a ṭulzia tu’n kan hai lo, Bru ral tlan ho pawh an duh lo chung chung Tripura aṭanga ko chhuak leh turin central sorkarin Mizoram state thu neitute a phut tih chanchinbuah kan hmu chamchi a nih hi. A hriate sawi danah chuan Tripura sorkar inawp dan leh kalphung mek khu kan Mizoram nen chuan tehkhin chi pawh a ni lo, eirukna tlem thu leh hnathawktute an tihtur leh mawhphurhnaa an rintlak thu pawh hahipa sawi tham a awm a ni ngei ang. Bru ral tlan te tan Mizorama haw leh chu duh chi a ni lo an ti hial a ni.

Sakhuanaa innekchepna hi India ramah hian a hluar bik pawh a ni mahna, bawng talh khap, christian-te tihduhdah leh sakhua bik chawi kan tumna thawm a lian hle a ni. A bikin Orissa State lamah kan Missionary-te tawrhna kan hre tam hle a, an khawtual mi christian-a inpete tawrhna pawh kan tuarpuiin a tiduhdahtute kan dem em em vek a ni. Kan Lalpa, Isua Krista thuchah chu “Ram tinah kal u la, thil siam zawng zawng hnenah Chanchin Ṭha hril rawh u” tih a ni mauh mai si a. Pathian thu hmu chiang leh huaisen, taima tan chuan a chhe ber huama feh chhuah a ṭul si ṭhin a le, sakhaw dang betute tan chuan mi hnawksak nih loh rual a ni lo a ni. Sakhaw dang vuantute hnen aṭanga nekchepna leh tihduhdahna han tawrh te hi chu thil awm rengah pawh a ngaih theih a, Pathian rawngbawl tak tak tur tan chuan ‘martar’ thlenga inhuam pawh a ṭul reng a ni.

Christian sakhuana lo pian chhuah dan hi Petera te aṭanga lo ding chhuak chho Kohhran kha kum zathum vel lai hnuah Rome sorkarin a nek tluk a; ‘Sabbath’ aiah ‘Sunday’; Kalhlen Kut aiah ‘Good-friday’; Kut chaw aiah Lalpa zanriah ‘sacrament’; Remna Kut aiah ‘X-mass’ tea a thlak sak theih aṭang khan Lal Isua Chanchin Ṭha leh Rome sakhuana inchawhpawlh (milem tel, etc.) kohhran, ‘Roman Catholic’ a lo piang chhuak a; chutaṭang chuan ‘Protestant Christian’ kohhran ‘denomination’ hrang hrang a lo piang chhawng leh ta ṭeuh mai a ni a. Thurin leh ngaihdan hrang a tam lutuk hi sakhaw dang vuantute’n Christian sakhuana an hmuhsit leh zah lohna chhan pakhat chu a ni reng a ni. Chutianga sakhaw dangte lak aṭanga nekchepna kan dem em em lai hian keimahni leh keimahni kan innekchepzia hi i ngaihtuah ngai emaw!

Kohhran tin deuhthawah buai rukna neuh neuh a awm hi chu thukhatah dah ila. Tun 2017, April thla chhuak ‘Synod Newsletter’-ah khan Ral Vengtu ‘column’-ah Pawlchhuakte deusawhna leh hmusitna a lo lang a. Nie, Synod (Presbyterian Kohhran) hi Mizoram ‘Christian Denomination’ zingah chuan member ngah ber leh lian ber a ni a, ‘Church Institute’ an nih angin anmahni huangah chuan eng pawh an sawiin an inzirtir thiang a ni tih hi kan theihnghilh loh a ṭha. ‘Ral Vengtu’ huangah kan chhiar miau a, tu han huat theih a ni lo. Mahse, anni kohhran hi an huang pawn, sorkar rorelnaah, a bikin ‘MLTP Act’ leh ‘MLPC Act’ chungchangah hian an inrawlh lu deuh zawng a ni.

Synod Ral Vengtu hian an member-te zu in tur leh zuar tur hi an huang chhungah veng mai se, chutiangin, Kohhran dangte pawhin ti ve vek sela, an ven hneh phawt chuan pawn lamah buaina leh enghelh tur vak a awm a rinawm lo. Heti a nih lai hian, a bikin Presbyterian kohhran ‘pulpit’ tlangah sorkar hmalakna UID an sawi mawi chiam lawi bawk si a, an ‘member’ zinga UID duh lote tan chuan a tawrhhlelhawm hle ang le! Hman lai deuh aṭang tawh khan a bikin pawlchhuak ‘Sabbath’ hmangtute leh hnam dangte angte’n ‘Sunday’ nia dawr hawn an chin ṭan lai khan veng ṭhenkhatah dodalna an tawk ṭhin a nih kha. Entirnan, veng pakhatah (a veng i sawi lo mai ang, thu mu hnu te a ni tawh bawk a) Sunday-a Mizo dawr hawng duhte dawr kawtah Mizo ṭhalaite (kohhran ‘member-te’) ngeiin YMA ṭhuthleng hunga ṭhuin, mi dawr theih loh turin dawr kawt an khar sak tlat tawh a nih kha.

Kumin, 2017 kum thar hnuah pawh hian P&E Office kawmchhak, New Market huam chhunga hnam dang ‘Sunday’ nia alu kan leh papawr ilo zuarte kha inkhawm bangte tana chhun rilṭam laia dawr theih awmchhun an nih nen an lo reh duak ta mai a, eng vang tak ni ang maw? Zoramah ‘Sunday law’ kan puang a ni ber tawh zawk lawm ni le!

Addhaar chungchangah pawh hian mi tam tak rin lawk danah chuan Lal Isua ringtu inti Kohhrante ngei hi, NGO ang leh khawtlang rorelna anga Lal Isua ringtu inti ve tho, UID duh lote nek chepa tiduhdahtu turte an ni dawn tih a ni a, rinthu mai a ni rih a, i lo thlir phawt teh ang u. Engpawhnise, sakhuana a ni emaw, sorkar hmalakna a ni emaw, NGO hmalakna a ni emaw, midangte dikna chanvo kan nek chep em? kan huang pawnah kan che em? chi bing leh Kohhran bil riru zimte kan pu tlat em? tihte i inngaihtuah ngun ang u khai.

Misuaksualte remruat anga awm lo tur te, misualte kawnga ding lo tur te, hmusittute ṭhutphahahte phei chuan ṭhu hauh lo turin i fimkhur ang u; chuti lo zawng, thilsiam zawng zawng hnenah Chanchin Ṭha kan hril thei lo dah ang e.

- M.S. Dawngliana