I NGAIHTUAH TLANG TEH ANG U
Vanglaini, 2nd May, 2017 phek 6-naa (Pu) Lalchhandam’an ‘Politician-ten Pathian an sawi dan’ ka han chhiar a, “Zoram Kristian-te leh Mizo mipuite hi kan vanduai mang e” tih thu hian min deng tel nghal zat.
A chhan chu, kan hotute pahnih Lal Thanhawla leh Zoramthanga te Pathian hriat dan hian hmasawnna leh intodelhna a hawi tlat loh vangin vanduai intih loh theih niin ka hre lo. Sam 14:1 leh 53:1 ah “Mi a chuan a rilruin, Pathian reng a awm lo” a ti a (ṭhin) a. Mi a dik tak chuan ngaihtuahna fim leh fing an nei lo va, Pathian awm leh awm loh lam pawh an hre lo, an khawngaihthlak. A chhung ten huatah lo chang lo se, Hminghlua hian Pathian hming a lam ngai lo, Pathian a awm leh awm loh a hriat loh vang a ni.
Pathian hriat dan dik lova hria, a thu awih lo leh Amah ṭihna nei lova tlawn lungawi theiha ngai a; Lalpa hming lam chhen mai, mahni ham-
ṭhatna tur a niha sual pawisa lo leh thil sual tih timna nei miah lote hi helai Bible changin ‘mi a’ a tihte hi an ni a, a thu tlangpuiah pawh mihring ‘suahsualzia’ tih a ni reng a. Hetiang ang mihring, Pathian ṭih lo, mahni hmasial thiam tak leh lalna leh thuneihna ngaina a, hmang khawlote hi alawm Thufing 27:22-a “Mi a chu buh nen sumah sukin deng mah la, a at-na chuan a thlah lovang” a tih ni. An at-na chu Pathian an ṭih lohna hi a ni. Thuf 8:13-ah Lalpa ṭih chu sual huat a ni. 16:6-ah Lalpa ṭihna-in miin sual a kalsan ṭhin. Sual huat leh kalsan chu sawi loh, “Tangka sum ngainat hi sual tinreng bul a ni” (I Tim 6:10) tih pawisa zo lova Tuirial Hydel Project cancell ngai khawpa compensation late kha Babutea leh a lainate an ni lawm ni? Ek-in kal thei leh thirpal, Ai-i Puk... a, sawi sen a ni lo.
Jim Nelson Blake chuan, ‘Hnam ral tur zia chu, Dan mumal lohna, hna hmuh lohna, zirna tlahniam, induhsak bikna, culture tlachhia, Tradition hloh, hurna sual punlunna, sakhaw ngaihnepna leh nun hlut lohna’ te hi a ni a ti.
Mizoramah chuan Malaria aiin zu-in nunna a suat nasa zawk. Sorkar berin zu a zawrh avangin hmeithai leh fahrah an va pung chak em! A party lam ka sawi lo, Lal Thanhawla leh Zoramthangate pahnih leh an inner circle-ah hian thlan tur zawk ka hre lo. Ka duh lo ve ve. An party hian sorkarna siam ta se, pawn lam aṭang pawhin Party President an nih si chuan an thu a la lal tho ang tih ka ring. Nakkum 2018-ah MLA kan thlang dawn a ni a, Zoram mipui sukthlek en hian ‘Zuntei Nu siam ang’ tih ang vel bak kan ni leh lovang tih sawi a harin ka hria.
Zoram mipui lah hi Semlawma leh Semlawmi te kan nih avang hian NEDP/ SEDP nep phal lovin a tu emaw zawk hi an sorkar mai ka ring ru deuh roh a. He sem policy kian kawngpui a siam ṭha lo - doctor indaih lohna a phuhru lova, zirtirtu mamawh a ti ziaawm bawk lova. Sual tinreng bul, sum ngainatna kawng min kawhhmuh avang hian hma thlir a eng (bright) mawh khawp mai. Engtin nge ni ta ang? Third Front lo piang tur hi mipui lam hian leader-ah rin ngam, innghah ngamna kan hmu ang em? Hun kal tawh thlir chuan ‘hmu lovang’. Chuti nise, engtin? Rin ngam tur dap a ngai a ni mai. Pu HT Sangliana hi CM ni-a, Zoram siam ṭhat hnaa hruaitu atan sawm ni se, a bak chu ngaihtuah a har tawh lovin ka ring.
A thu hrimah Party mal sorkarah chuan ka beiseina hi a sang lo hrim hrim tawh. Thil tihsual chungah hremna hlen nghal mai a nih loh avangin, mihring fate thinlung chu thilsual ti turin a lo ngampa ṭhin a ni (Thuf 8:11). Pu Hawla leh Pu Zorama hian an nun an siam ṭhat hi ka ring thei lo, lungsi taka vote thlakna tur hre rih lo mah ila, sorkar nei ila ka tih chu United Legislature Pawl-ho pathum tal inzawmkhawmna sorkar, chutah pawh a te fal bik leh lian bik awm lo; Bible-ah pawh ‘hrui thum hrual chu a chat lawk lawk ngai love’ tih a ni angin, (Thuf. 4:12) Thawhhona hi a ṭha berin ka ring.
Pu Hawla sorkar hi chuan dictator/ monarchical government a ang tawh tlat.
- H. Lalnunsanga